Baibil stadika nani sakaia dukiara natka matsip ba
1. Baibil stadika kum kau sakras sa kaka, ¿dîa daukaia sip sa, bara dîa muni?
1 ¿Baibil stadika kum pliki sakaia ba karna mai munisa ki? Sip apia sma lukpara, ban pliki bas. Jehova ani uplika ra ai kupia lâka daukaia trai muni ba ra blisin munisa (Gal. 6:9). Natka matsip ba laki kaikbia nahki Baibil stadika nani sakaia dukiara.
2. Natka kau isti ba yus munbia kaka, ¿nahki Baibil stadika kum tâ krikbia?
2 Natka kau isti ba yus muns. Upla nani ba nu sa yawan ba La Atalaya bara ¡Despertad! yabi ba, sakuna witin nani nu âpu sa Baibil stadika nani yabi ba. Baha mita, kli smalkaia taki wama taim, Baibil stadika kum yabaia want sma ba wis. Bara kli wih kaiki uplika ra sin wis. Bara apia mai wibia kaka, ulbi sakanka nani brih waia sip sma. Kristian waitna kum marit uplika kum ra mani ailal piua ra wauhkataya nani ba yabi kan. Yu kum wauhkataya lâs takan ba swin taim, witin makabi walan: “¿Baibil stadika kum briaia want sma?”. Bara maritka nani ba âu win. Nanara baha maritka ba aihtabi takan sa.
3. ¿Dîa muni lukaia apia sa aidrubanka ra wih kaiki uplika nani ba pat Baibil stadi takisa?
3 Aidrubanka ra wih kaiki uplika ra aisas. Lukpara upla nani aidrubanka ra wih kaiki ba pat Baibil stadika kum brisa. Kristian waitna kum win: “Baibil stadiki aihkika ba aidrubanka watla ra sakri sa”. Mairin kum ai sringka lâka bri kan ba 15 mani aidrubanka nani ra wi kan ai luhpia mairin pat aihtabi takan ba aikuki. Naha mairka ba aidrubanka tâ kriki kan taim dimi kan, bara danh taki kan wal baku mahka wi kan. Yu kum, kristian mairin kum Baibil stadika yabaia want kan ba win. Mairka ba âu win, bara piu kum kum luan ra aihtabi takan. Kristian mairin ba win: “¡Dîa muni 15 mani bîla kaikri naha mairka ra Baibil stadika kum yabaia want kapri ba wiaia!”.
4. ¿Baibil stadika kum briaia dukiara, nahki wilin takaia sip sa?
4 Hilp munaia wilin bas. Kristian mairin kum ba upla wala nani ra yula kahbisa Baibil stadika nani yabaia. Bara, Baibil stadika ba danh takisa taim —stadika tâ bri uplika adarka wal— stadi tatakra ra makabi walisa: “¿Upla wala kum Baibil stadi takaia want ba, man kakaira sma ki?”. Natka wala kum ba sika kli wih kaiki uplika nani ra apia kaka Smalkisa bukka kum brisa kaka, makabi walaia ya uplika wala kaikisa naha bukka aisi kaikaia want sapa. Ban kra, smalki tataukra kum apia kaka tâura smasmalkra kum Baibil stadika kum yabaia sip apia sa kaka man hilp munaia sip sma ba wis.
5. ¿Dîa muni marit lalukra apia ba ra makabi walaia sa Baibil stadi takaia want sa sapa?
5 Marit lalukra apia nani ra aisas. ¿Kangrigisankam ra smalki tataukra nani bâra sa ai maya Jehova Witnis apia ba? Upla kum kum ba ai brinka apia sa ai maya ba smalkbia, sakuna upla wala wal Baibil stadi takaia want sa. Pain kabia, lalukra ba wal pas aisaia, baku yawan nu kabia nahki bara ahkia maya lalukra apia ba wal aisaia.
6. ¿Dîa muni wan pura sunaia sa Baibil stadika kum pliki sakaia dukiara?
6 Jehova hilpka makas. Aima kumi ra sin lukpara pura sunra ba bahki sa (Je. 5:16). Wan pura sunra nani ba Jehova kupia lâka kat sa taim, Witin walisa (1 Jn. 5:14). Kristian waitna kum taim uya âpu kan ba Jehova ra makaban hilp munbia Baibil stadika kum sakaia. Ai maya mairin ba wari taki kan stadi tatakra ba trabil ailal brisa kaka, ai maya waitna ba uya taim âpu kan ba mita tâ briaia sip apia kabia. Baha mita, dîa luki kan ba Jehova ra makaban. Witin nani pura sunra ba walan, bara wik wâl luan taim, tâura smasmalkra mairin kum waitna kum sakan Baibil stadi takaia want kan ba. Bara naha ba kristianka waitna mihta ra swin. Maya mairin ba aisisa: “Ya Baibil stadika kum tâ briaia karna sa lukisa kaka, kupia bukisna ban ai pura suni kabia bara dîa pali luki ba Jehova ra wibia. Yang nani lilia tara kum briri”. Ban trai munisma kaka, man sin Baibil stadika kum pliki sâkma, bara liliaka brima naha uplika ra hilp munma raya kaia ra auya yabalka ra impakaia (Mt. 7:13, 14).