Dîa daukram ba dukiara lilia lâka bris
1. ¿Dîa ba wan liliaka lâka mâyara takbia daukaia sip sa?
1 Gâd upla nani ra paskan “ai rayaka ba lilia daukbia ai warkka mâ nani ba wal” (Smas. 2:24). Sakuna, smalkaia warkka ra dîa dauki ba mâ pain sakras taim, yawan sari takaia sip sa bara spirit lâka ra mâyara takaia. ¿Dîa hilp wan munaia sip sa smalkaia warkka ba liliakira daukaia?
2. ¿Dîa muni smalkaia warkka dukiara pitka kat lukaia sa?
2 Lukanka pain bris. Wan kupia kraukaia sa Jisas naha tasba ra smalki tauki kan piua ra, upla wiria baman witin nina blikan, sakuna yawan nu sa ai warkka ba mâ pain sakan (Jn. 17:4). Mâ mamangkra maprika bîla ra, Jisas win upla manis ba King lâka smalkanka ba walbia apia (Mt. 13:3-8, 18-22). Sakuna, takaskraskira smalkisa kaka, mâ pain sâkbia.
3. Upla wiria baman wan walbia sin, ¿nahki “mâ pain” sakaia sip sa?
3 Nahki mâ ailal sakaia sip sa. Jisas maprika bîla ra, ya nani smalkaia warkka ba yamni kaiki ba ‘mâ pain sakisa’ (Mt. 13:23). Plawar mâ dusa kum pâwan taim, plawar mâ dusa lupia wala sakras, sakuna mâ raya nani lika sakisa. Sim baku, kristian nani smalkaia warkka wina mâ pain saki ba disaipil raya nani daukaia baman tânka apia sa. Sakuna, smalkaia warkka mâ pain ba kau yakabi ba tânka sa. Baha mita, “mâ pain” sakisa, naha wiaia want sa smalki tataukra nani ba uba lilia ai dara walisa, upla wala nani ba walras kabia sin. Yawan Jehova nina holikira daukaia warkka ba tâ baikisa (Ais. 43:10-12; Mt. 6:9). Uba lilia wan dara walisa Gâd warkka ba tâ baiki ba mita (1 Ko. 3:9). Bara “wan bîla baikra” wal dîa aisi ba Jehova yamni kaikisa (Hib. 13:15, 16).
4. Ban kra yawan nu âpu kabia sin, smalkaia warkka ra dîa daukan ba, ¿nahki mâ sakaia sip sa?
4 Ban kra smalkaia warkka ra saumuk mangkan ba pâwi ba kaikras. Jisas piua ra, upla kum kum ba witin smalkanka ba walan, sakuna Jisas heven ra wan ningkara pâwan. Sim baku, yawan King lâka saumukka mangkan ba piu luan taim uplika kupia ra pâwan, apia kaka piua luan ba ra uplika ba Jehova Witniska kum takan bara yawan nu âpu kan. Sakuna, yawan kasak lukisa dîa daukan ba mâ pain sâkbia. Baha mita, kaisa “mâ manis” sakaia bara marikaia yawan Jisas disaipilka sa (Jn. 15:8).