‘Smalkaia warkka ba takaskras kira dauks’
1. ¿Apastil Pal dîa samplika pain nani wan kan?
1 ‘Sturi yamni smalkaia warkka ba pain pali dauki bas.’ (2 Ti. 4:5.) Apastil Pal naha bîla alki takaskras Timoti ra win, kan witin naha samplika ba marikan. Pal 47 bara 56 manka ra misan warkka aima yumhpa ra daukan. Baku sin, Apastil Nani Sturka bukka ra wisa aima ailal Pal ‘sturi yamni ba takaskras kira smalkan’ (Ap.St 23:11; 28:23). ¿Yawan nahki sip sa sim baku daukaia?
2. ¿Nahki smalkaia warkka ba pain pali daukisa utla utla ra smalkisa taim?
2 Utla utla ra smalki sa taim. Upla kum kum naha smalkanka ba aima kumi ra sin walra sa, sakuna baha sât uplika kum sakaia want kaka wan awarka ba sins munaia sa. Baku sin, tutni piua ra apia kaka wik tnata lâs ra sip kabia pamali lalka nani ra smalkaia. Yawan trai kaikaia sa utla bani ra upla kum ra smalkaia, baha mita aitani sa utla kum ra wabia taim, upla âpu sa kaka ulbaia, bara awar wala nani ra wih kaikaia. Baku daukbia sin ban upla sakras sa kaka, teléfono bâk winaia sip sa, apia kaka wauhtaya kum ulbi swibia.
3. Upla ailal bâra pliska ra apia kaka ban wina smalkaia dukiara, ¿dîa sanska brisma ki?
3 Upla ailal bâra pliska ra apia kaka ban wina smalkisa taim. Yawan Jehova witniska nani ba ‘sins lâka kasak ba’ ya uplika walaia want bara smalkisa. Sam taim, “yabal ra” apia kaka ‘upla ailal bâra pliska ra’ sin smalkisa (S.L 1:20, 21). Trai munisa silp wan warkka daukisa piua ra sin daukaia. Bara yawan sip sa wiaia, ‘kau smalkaia dukiara wan taimka yus munisa’ (Ap.St 18:5). Baku natka ra, sturka yamni aisi smalkaia warkka ba ban daukisa (Ap.St 10:42; 17:17; 20:20, 21, 24).
4. Pura sunra bara aman luki kaikaia ba, ¿nahki hilp wan munbia smalkaia warkka pain pali daukaia?
4 Ban kra sip sa sringka lâka apia kaka nitka wala mita smalkaia warkka ba sip daukras kabia, sakuna wan âuya tikaia apia Jehova ai tânka brisa dîa muni sip apia sa (Law. 103:14). Sakuna baku wan takbia kaka, Jehova ra wan pura sunbia kupia karna lâka wankbia dukiara (Ap.St 4:29, 31). Diara wala sin sip sa hilp wan munaia silp wan stadika takisa piua ra aman luki kaikaia smalkaia warkka ba dukiara (Pil. 3:8). Naku dauki baman wan latwanka lâka ba kau tara takbia bara wan kupia aiska smalkbia.
5. ¿Yawan dîa daukaia sa Joel aisanka tnata aimakbia dukiara?
5 Joel bukka ra wisa Jehova yua tara bara sibrin kira ba kau balras kainara ai napakanka nani ba, smalkaia warkka ba takaskras kira dauki kabia (Joel 2:2, 7-9). Baha mita, smalkaia warkka ba ban dauki bas, kan naha ba aima wala ra kli daukbia apia.