¿Dîa muni yawan smalkisa ki?
1. ¿Latwan lâka ba nahki smalkaia warkka ra hilp wan munisa?
1 Gâd sturka yamni nani ba smalkaia ba wark kau painkira sa naiwa piua ra. Baku sin, naha warkka daukisa piua ra, yawan marikisa lâ wâl kau tara nani ba bîla walisa: Jehova bara wan walka ra latwan kaikaia (Mk. 12:29-31). Latwan lâka ba mita yawan ba takaskras kira smalkaia warkka ba daukbia (1 Jn. 5:3).
2. ¿Nahki smalkaia warkka ba wal yawan marikisa Jehova ra latwan kaiki ba?
2 Jehova ra latwan kaikaia. Wan Pânika kau painkira baku yawan kaiki ba mita, hilp wan munisa Witin tâwan aisaia. Mani 6.000 bilara Sitan Jehova dukiara saura aisan (2 Ko. 4:3, 4). Baha mita, upla manis lukisa Gâd upla nani ra hil pauta kum ra blikisa, Gâd ba kumi ra yumhpa sa, bara upla nani dukiara lukras. Baku sin, upla ailal ba lukisa Gâd âpu sa. ¡Baha mita, yawan want pali sa upla nani ba tânka kasak ba lan takbia bara wan Aisa painkira ba ra sin kakaira takbia! Yawan Witin witniska nani ba mita Jehova kupia ba lilia daukisa bara Sitan ba kuninkira baku takisa (S.L 27:11; Hib. 13:15, 16).
3. ¿Nahki natka ra smalkaia warkka ba wal wan walka ra latwan lâka marikisa?
3 Wan walka ra latwan kaikaia. Yawan upla kum ra smalkisa taim, latwan lâka marikisa. Upla nani ba nit pali sa sturi yamni nani ba walaia, kan piu karna nani ra iwisa. Upla manis ba Jona piua ra Ninibi uplika nani baku sa, witin nani ba “ai tânka briras banhwi ba bâra sa” (Jon. 4:11). Wan smalkanka nani ba upla ra hilp munisa lilia iwaia bara ai rayaka pain kum briaia (Ais. 48:17-19). Upla ra bîla kaikanka kum yabisa (Ro. 15:4). Witin nani ba dîa lan taki ba alki daukbia kaka “swaki sakan kabia” (Ro. 10:13, 14).
4. ¿Dîa ba Jehova ai âuya tikbia apia?
4 Tuktan pain nani ba ai aisa yapti ra yu bani ai latwanka lâka marikisa, dis yu kumi baman apia. Sim baku, Gâd bara wan walka ra latwan kaikisa kaka, sanska nani yus munbia kau smalkaia dukiara, piu kum kum ra baman lika apia. Takaskras kira smalki kabia (Ap.St 5:42). Jehova Gâd baha latwanka lâka ai âuya tikbia apia (Hib. 6:10).