Prapit Emus samplika wina lan taks
1. ¿Nahki Emus samplika ba wan kupia bukaia sip sa?
1 ¿Skul uya dimras kapram ba tawan, apia kaka pamali umpira kum wina balisma ba mita smalkaia warkka ba sip daukras baku damra walisma ki? Baku sa kaka, Emus samplika ba wina kupia karna lâka ba briaia sip sma. Witin ba sîp nani main kakaira kan ba mita mani bilara piua kum kum ra baman wark taki kan, sakuna Jehova witin ra maisa pakanka tara kum yabaia dukiara yus munan (Em. 1:1; 7:14, 15). Naiwa piua ra sin Jehova upla umpira nani ra yus munisa (1 Ko. 1:27-29). Prapit Emus samplika ba, ¿nahki smalkaia warkka ra hilp wan munbia?
2. ¿Dîa muni smalkaia warkka ra mapara buan lâka bara kabia sin ban dauki kaia sa?
2 Mapara buan lâka bâra kan sakuna ban dutki kan. Emus ba Israel kiamka 10 yahbra tani ra iwi kan ba mapara dahra aisanka nani win. Bara Amasías, bîp wainhka lupia nani ra mayuni sepadka kan ba, naha walan taim Emus ra win mahka ai watla ra wabia, witin nani ra nais munbia apia, kan upla sut ba ai rilidianka brisa (Em. 7:12, 13). Emus warkka takaskaia dukiara, Amasías ba prapit wina dîa walan ba king Jeroboam ra sât wala wih win (Em. 7:7-11). Sakuna Emus ba sîa briras kan. Naiwa piua ra, rilidian tâ bri uplika nani pulitik asla takanka bâk hilpka plikisa Jehova napakanka nani ra rau sauhkaia dukiara. Sakuna, Jehova pramis wan munisa dîa wan sauhki tikaia sip aiklabaia dukia wal wan mapara balbia kaka ai tâura wabia apia (Ais. 54:17).
3. ¿Dîa maisa pakanka wâl ba naiwa yawan smalkaia sa?
3 Gâd klala yabia bara kaina piua blisinka nani dukiara aisan. Emus ba Israel kiamka 10 yahbra tani ra iwi kan ba mapara lâ ai purara balaia kan ba dukiara dahra aisan, sakuna witin ai nina bri bukka ba ulbi tnata prakan lâs bîla nani ba Jehova pramiska painkira nani dukiara aisisa (Em. 9:13-15). Yawan sin Gâd ‘lâ daukaia yuaʼ ba dukiara smalkisa, sakuna naha ba “king lâka sturka yamni” naha tasba aiska ra smalkaia bri ba pîska kum sa (2 Pi. 3:7; Mt. 24:14). Armagedan ra Jehova saurka lâka ba âpu daukbia taim, paradais ba balbia (Law. 37:34).
4. ¿Jehova kupia lâka daukbia kaka dîa yamnika bribia ki?
4 Mapara buan lâka tila ra King Lâka smalkaia ba Jehova kupia lâka yawan daukaia want ba mapara sa (Jn. 15:19). Baha sât warbanka nani bara kabia sin, Emus ra yus munan baku, yawan ra sin Jehova ban yus wan muni kabia Ai kupia lâka daukbia dukiara (2 Ko. 3:5).