Prapit Oseas samplika wina lan taks
1. Jehova kupia pihnika bara umpira kaikan lâka wan mariki ba wina, ¿dîa daukaia wan kupia bukisa?
1 Jehova dukiara, ¿dîa sât sakripaiska nani daukaia wilin sna ki? Ban kra Witin kupia pihnika bara umpira kaikan lâka manis wan mariki ba tâwan, naha makabi walanka dukiara luki kaikram sa (Law. 103:2-4; 116:12). Oseas ba wilin kan Jehova bîla walaia. Baha mita, ai rayaka ra sakripais nani daukan. ¿Yawan nahki Oseas samplika ba tnata lukaia sip sa?
2. ¿Nahki Oseas samplika pain ba nina blîkbia smalkaia warkka ra?
2 Piua saura tilara kabia sin smalkaia. Oseas maisa pakanka nani ba Israel kiamka 10 kan ba nani ra yabaia kan. Bahara upla aihkika ba Jehova ra mayunras kan. Israel kingka, Jeroboam 2 ba, ai daukanka nani Gâd nakra ra saura kan. Bîp wainhka lupia nani mayunanka ban daukan, Jeroboam 1 dauki kata baku (2 Ki. 14:23, 24). Bara king wala nani iwan ba kumi sin spirit lâka warkka dukiara diara daukras kan. Lâs kat 740 yawan piua nina manka ra, naha kingka lâka ba sauhki tikan. Gâd bahki nani ra mayuni kan tilara, Oseas ba 59 mani Jehova ra kasak lâka ni mayunan. Oseas baku, upla nani ba walaia want apia bara wan mapara kabia sin, ¿mani bani smalkaia warkka ba dauki kabia ki? (2 Ti. 4:2.)
3. ¿Nahki natka ra Oseas rayaka ba marikan Jehova umpira wan kaiki lâka ba?
3 Jehova umpira kaikan lâka wan mariki ba ra luks. Jehova mita Oseas ra win: Rug lâka ra kahwan mayam ba wal bris (Os. 1:2). Ai maya mairin Gómer ba Oseas ra luhpa kum baiki yaban; sakuna talia sa kli luhpa wâl baikan ba witin luhpia apia kan. Oseas ba wilin takan ai maya ra padin munaia. Naha samplika wal kaikisa nahki Jehova Israel kingka nani ai kupia laki kan taim, umpira kaikan lâka marikan (Os. 3:1; Ro. 9:22-26). ¿Yawan wilin sa upla sât sât ra marikaia Jehova umpira wan kaiki Gâdka kum sa? (1 Ko. 9:19-23.)
4. ¿Dîa sakripaiska nani daukaia wilin sa Jehova ra wan tingkika lâka marikaia dukiara?
4 Jehova napakanka manis sakripais daukan sa. Sampla baku, skul tara dimaia bara lalah manis daukaia warkka kum sut ba swin sa. Naha sut ba daukisa kan witin nani kau smalkaia warkka daukaia want sa. Wala nani marit takras apia kaka luhpa baikras Kingka lâka tâ baikaia dukiara. Ban kra lukma, Oseas daukan baku, yang sip daukamna apia. Sakuna Jehova kupia pihnika lâka wan mariki ba bara Ai spiritka holikira ba ra kasak lukbia kaka, Witin yus wan munaia sip sa diara ailal daukaia, sim Oseas ra takan baku (Mt. 19:26; Pil. 2:13).