Wauhkataya nani upla kum ra yabi ba wal Baibil stadika kum tâ krikaia
1. ¿Dîa muni Jehova asla takanka ba wan kupia bukisa upla nani ra wauhkataya nani ba brihwi yabaia?
1 Upla manis ba yawan wal Baibil stadika kum briaia want apia, sakuna wan wauhkataya nani aisi kaikaia laik sa. Baha mita, mani ailal wina Jehova asla takanka ba smalki tataukra nani ra kupia bukisa upla nani ra wauhkataya nani ba kati bani brihwi yabaia. ¿Dîa muni? Kan wauhkataya nani aisi kaiki ba wina upla nani ba Gâd Bîla ba nu takan daukisa (1 Pi. 2:2). Ban kra, diara kum aisi kaikbia ba wina upla kum ra kupia nikbaia sip sa Baibil stadi takaia.
2. ¿Wauhkataya brihwi yabi uplika nani ra nahki hilp munbia?
2 Tânka kasak mâ ba mangkaia. Wauhkataya nani uplika ra swih mahka waia watlika ra, kau pain sa uplika wal aisaia trai munbia, bara baku tawa tawa yabal ba kwâkisa. Naha natka bâk uplika dukiara nu takbia nahki iwi ba, ai brinka nani bara ai lukanka nani. Baku yawan nu kabia uplika wal dîa aisaia bara nahki daukaia (S.L 16:23). Baha mita, yawan pain ridi takaia sa. Wauhkataya nani ba wina tânka kum plikbia bara ani tikska yus munbia ba tânka sirpi kum marikaia. Baku tânka kasak mâ ba ai kupia ra mangkan ba pâwbia (1 Ko. 3:6). Aima bani uplika ra wih kaikbia yua ba, ani ulbi sakanka swin ba, baku sin ani ulbanka lalka aisan, Baibil tikska yus munan ba sut ulbaia sa.
3. Wan uplika ra wauhkataya nani brihwi yabi ba, ¿piu an bîla ra kli wih kaikbia?
3 Piu an bîla ra kli wih kaikbia. Wauhkataya nani upla ra brihwi yabi ba dukiara kati bani daukaia sa. Bara sip sa kaka, uplika ba ani pitka kat nu takan dauki ba laki kaiki, pat pat wih kaikaia sa. Sampla baku, wauhkataya nani yabram ba wina wik kum apia kaka wâl lubia taim, uplika ra kli wih kaikaia sip sa bara wiaia: “Dis mai marikaia want kapri wauhkataya maikri bâra tânka painkira kum taki ba”. Naha ba uplika ra brinka bukbia ulbanka lalka kum aisi kaikaia. Ban kra witin wibia baha ba pat aisi kaikan sa, uplika ra makabi walbia aisi kaikan ba dukiara dîa lukisa, bara sim tânka dukiara wira aisaia sip sa. Upla kum wan ulbi sakanka aisi kaikaia ai brinka sa kaka, wauhkataya sirpi kum, wauhkataya tara, apia kaka buk kum baha kati ra yus muni ba yabaia sip sa.
4. Wauhkataya nani brihwi yabi uplika wal, ¿nahki Baibil stadika kum tâ krikaia sip sa?
4 Bîla kaikaia apia sa uplika mita Baibil stadika kum wan makabia. Yawan mita witin nani ra makabaia sa. Kaina ra uplika apia wan win kabia kra sin, aima kum kum ra La Atalaya wauhkataya ra “Preguntas sobre la Biblia” taki ba laki kaikaia trai munbia. Ban kra, baha natka bâk dur tâ ba kat Baibil stadika kum tâ krikaia sip sa. Sakuna Baibil stadika ba sip daukras kaka, ban wauhkataya nani ba uplika ra brihwi yabi kabia hilp munaia dukiara.