Tâ Bri Daknika Wauhkataya blikan ba

Gâd suliarka latwankira nani:

Uba lilia wan daukisa naha manka tâ kriki ba piua ra mai ulbaia. Mani 2014 ba kau danh takras ba ra, 100 mani alkan kabia wan Kingka latwankira Jisas ai waihla nani tilara king aimakan ba wina (Law. 110:1, 2).

Mani bani Watch Tower Bible and Tract Society of Pennsylvania aidrubanka dauki ba ra, smalkaia warkka manka tâ krikan lamara daukan taim, Traducción del Nuevo Mundo bîla lalakra nani mita inglis Baibilka kli laki kaikan ba ulbi sakan, naha sika Baibil kau pain ba tasba aiska ra upla aihkika briaia sip ba. Jehova ai luhpia nani spirit hulikira ni bâk sakan nani ra yus munan Traducción del Nuevo Mundo Baibilka kasak ba sâkbia dukiara (Ro. 8:15, 16). Naha daukan ba mita, Baibil pranakira kum sa, ¿rait apia?

Mani ailal piua wina, Tâ Bri Daknika Aulbrika nani bri ba Baibil bîla lakanka ba ai warkka pali sa. Naiwa, Traducción del Nuevo Mundo Baibilka ba 121 bîla aisanka nani ra ulbi sakisa, aiska apia kaka pis ra. Kupiam bukisa Jehova ra tingkikam lâka marikma naha Baibilka brisma ba tâwan. Yu bani aisi kaiks bara kupiam wal aisi bangs; baku lika, Baibil dawanka, Jehova Gâd, pali lamara kama. (Je. 4:8).

Sari wan daukisa kan muihni lakri manis ba pât wahwanka nani lui ba dukiara, bara wan tânka brisa dîa muni karna munisa ai walka aikuki lilia takaia. Sampla kum, Asia kuntrika wina pamalika rayaka kum saura pali takan, ban wina yaptika ba ai wîna ul ba pruan. Daktar pain pain nani witin dukiara diara sip daukras kan. ¡Sari lâka tara sa! Maya waitna ba 24 awar ba main kaiki kaia sa, luhpia waitna bara mairin wâl, kristian baku sampla pain kum yabisa ai aisika nani ra latwan lâka ni tâ baiki ba ra. Naha pamalika samplika pain ba baku, man nani sut kasak lukankam lâka trabil nani mita traikam kaiki ba pura luram ba mita lilia lâka briaia sip sma (Je. 1:2-4). Yawan bâk sakan uplika apia kaka sîp wala nani daknika wina kabia sin, Jehova wan wisa kaina piua ra lilia kabia trabil nani wahwi luan ba mita, kan Witin raya kaia lâka prisantka ba wankbia (Je. 1:12).

Mani luan ra 19.241.252 upla nani Jisas Pruan Kupia Kraukanka ra balan. ¡Uba lilia pali sa nahki upla manis Jehova ra bara Jisas ra kulkanka yabaia dukiara, mani bîla ra Gâd uplika nani mapara Aidrubanka Kau Tara ba ra asla takan! Baku sin uba lilia sa Kakamuk kati bara Lih Wainhka kati ra Papaskra ba ra mayunanka tara yaban 2.000.000 pura tâ baiki smasmalkra warkka daukan taim. Uba lilia wan daukisa tâ baiki smasmalkra warkka daukbia nani ba impaki pura kakaira ba wih kaikbia taim, tâura smasmalkra wala nani wal aidrubanka aiska ra kabia. Spirit lâka ra sinskira nani ba ai tânka pain brisa smalkaia warkka bara kristian warkka wala nani tilara taki kaia ba kulkanka tara brisa. Naha dukia nani sika hilp wan munbia Dibil warkka ba batakaia, kan witin plikisa wan kasakka lukanka ba mayara iwbia bara yabalka pain ba wina wan aimawahkaia (1 Ko. 15:58).

Baku sin, uba lilia sa nu takaia mani luan ra 277.344 aihtabi takan bara nanara raya kaia yabalka ra wapisa tasba aiska ra ai muihni lakri aikuki (Mt. 7:13, 14). Naha uplika raya nani ba hilpka nitsa kasak lukan lâka ra karna kabia dukiara (Ko. 2:7). Pana pana wan walkara tâ baiki kabia tnata yua ba kat trabil nani mapara ban bapi buaia dukiara (Mt. 24:13). Baibil ba wan blikisa: “Si brabrira nani ba tâ baikma, swapnikira nani ba hilp muni bangma, bara upla sut wal kupiam alki takaski bri bas” (1 Tes. 5:14). Lâs ra yawan ban wan pura suni wiaia: “Man king aimakaia ba yarka balbia” (1 Tes. 5:17; Mt. 6:10).

Bîla kaikisa man nani naha Anuario 2014 bukka ba aisi kaiki yamnika manis brima, bara man nani kumi bani, Jehova ra kasak latwan kaiki sma ba wan latwanka lâka maikisa.

Muihkam nani wina,

Jehova Witniska nani Tâ Bri Daknika ba