¿Jehova nahki ai kaikisa?
1. ¿Nahki tânka ra Baibil ba lukinglas kum baku sa?
1 ¿Aima an lukinglas kum ra wih kaikisma ki? Yawan aihkika ba yu bani daukisa, kan baku dîa pain apia ba wapnika mangkisa. Baibil ba lukinglas kum baku sa. Aisi kaikbia kaka, yawan dîa sât uplika ba param sakisa, naha uplika sika Jehova kaikisa (1 Sa. 16:7; Je. 1:22-24). Gâd Bîla ba “wan sulka bara wan spiritka biara pali ba kat dimi wisa” (Hib. 4:12). Yu bani Baibil aisi kaikaia bara luki kaia sin hilp wan munbia smalki tataukra lankira takaia. ¿Dîa muni baku sa? (Law. 1:1-3.)
2. ¿Baibil ba nahki hilp wan munbia wan daukanka nani laki kaikaia?
2 Baibil ba Lukinglas kum baku yus muns. Baibil ra taki uplika nani samplika ba hilp wan munisa kaikaia ani daukanka nani ba Gâd mapara painkira sa. Sampla baku, king Debit ba Gâd nina mayunanka tara yaban (1 Sa. 17:45, 46). Prapit Aiseya sibrin âpu kira wilin takan plis saura kum ra wih smalkaia (Ais. 6:8, 9). Jisas ba ai Aisika ra uba latwan kaiki kan ba mita, ai warkka ba liliakira daukan, bara karbanka wirha saura kum baku kaikras kan (Jn. 4:34). Patitara kristianka nani ba takaskras kira smalkan, Jehova ra kasak lukan bara takaskras ai warkka nani daukan (Ap.St 5:41, 42; 2 Ko. 4:1; 2 Ti. 4:17). Naha samplika nani ba ra luki kaikbia kaka, yawan dîa sât uplika ba kaikaia hilp wan munbia bara baku wan warkka ba kau pain daukbia.
3. ¿Dîa muni wan rayaka ra dîa chens munaia nit ba aihni pali daukaia sa?
3 Wan daukanka saura ba wapnika mangkaia. Param sa, yawan lukinglas kum ra kaikisi dîa saura ba saki, wapnika mangkras kaka yus âpu sa. Jehova ra makabaia sip sa hilp wan munbia dîa saura kum bâra sa kaka kaikaia wapni takaia dukiara (Law. 139:23, 24; Lk. 11:13). Kau piu wiria baman brisa bara upla nani pruaia sip sa. Bamna, mahka dîa wan rayaka ra chens munaia nit ba daukaia sa (1 Ko. 7:29; 1 Ti. 4:16).
4. Upla kum Gâd Bîla ba sitnika kat laki kaikisa, bara daukanka saura kum bri ba wapnika mangki sa kaka, ¿baha uplika wal dîa takisa?
4 Wan kupia bîla lukanka nani —Jehova kaiki ba— kulkanka kau tara brisa upla lata tani ba wal (1 Pi. 3:3, 4). Upla kum Gâd Bîla ba sitnika kat laki kaikisa, bara daukanka saura kum bri ba wapnika mangki sa kaka, ¿baha uplika wal dîa takisa? “Witin sin wawalra ai auya tiwi ba apia sa, sakuna wark dadaukra” bara dîa dîa baha uplika daukbia ba lilia kabia (Je. 1:25, Dawan Bila LRW 1986). Kasak pali, smalki tataukra kau lankira bara liliakira kabia, Jehova prana ba param marikisa sim lukinglas ra kaiki ba baku (2 Ko. 3:18).