Prapit Nahum samplika wina lan taks
1. ¿Nahum bukka ba wina dîa lan takisa?
1 Ninibi patitara tawanka tara sauhkan yuika nani ba, wan marikisa Nahum dahra aisan ba kat, Jehova ai waihla nani ra pana munaia lâka yabisa. Bara waihla kau saura pali ba sin Witin mapara sip buras sa (Nah. 1:2, 6). Nahum dahra aisanka ba pain laki kaiki lisin pain nani lan takisa smalkaia warkka daukaia dukiara.
2. ¿Yawan smalki sturka ba nahki yamni baman brisa?
2 Maisa nihkaia bara bîla kaikanka yabaia. Nahum bukka ba Ninibi Asiria kuntrika kapitalka prautkira mapara lâka daukaia baman sturka kum sa talia (Nah. 1:1; 3:7). Ban sakuna, baha dahra aisanka ba sturi yamni nani bri kan Jehova uplika nani dukiara. Nahum, naha nina “Maisa nanihkra” tânka bri ba, witin bui Ju uplika nani ra kasak win ai waihla ba isti tiwan kabia. Baku sin, win Jehova “pât bri uplika nani yukuwaika watla kum sa” (Nah. 1:7). Smalkaia warkka ra, yawan sin sturi yamni brih taukisa bara upla kupia bukisa Jehova ra plikbia ai kan kahbia dukiara (Nah. 1:15).
3. Nahum baku, ¿yawan nahki sip sa sampla bara maprika lilka yus munaia smalkisa taim?
3 Sampla bara maprika lilka nani yus munaia. Jehova Nahum ra win Tebas (apia kaka No-amón) samplika yus munbia Idsip tawanka kum kan, kuna Asiria uplika nani sauhki tikan kan, bara sim baku Ninibi ra takaia kan (Nah. 3:8-10). Naha tasba lâs tnata piua ra iwi ba tânka aisisa taim, Baibil dahra aisanka nani kasak aimakan ba yus munaia aitani sa, baku lika upla kaikbia Jehova pramiska nani ba tânka sitnika kat aimakisa. Sampla baku, Babilon wihki Media suldiarka nani wal asla taki Ninibi mapara aiklaban mani 632 ra yawan piua nina ra. Lî karna auhwan ba mita Tigris awalka lisamra dingki tawan simint kutbanka tara sait kum ba slingban. Baku natka ra Ninibi ra alki pura luan Jehova dahra aisan baku takan (Nah. 1:8; 2:6).
4. ¿Yawan smalkisa taim nahki sip sa klir bara isi aisaia?
4 Sturi aisanka ba klir bara isi kaia sa upla ai tânka bribia dukiara. Nahum dahra aisanka ulban ba tânka sut klir marikisa bara upla kupia bukisa (Nah. 1:14; 3:1). Sim baku, dîa sturi aisi ba isi kaia sa upla ai tânka briaia dukiara (1 Ko. 14:9). Upla kum ra pas trip wih smalkisa taim, klir pali wis dîa dukiara balram sa. Baku sin Baibil stadi tatakra nani ra hilp munbia Jehova ra bara ai bîla ba sin kau kasak lukaia dukiara, bamna ai tânka bribia dîa lan taki ba ai rayaka ra hilp munisa (Ro. 10:14).
5. ¿Nahum dahra aisanka ba nahki hilp wan munisa Jehova ra kasak lukaia dukiara?
5 Nahum Baibil bukka witin ulban ba ra, Jehova dahra aisanka nani rait aimaki ba dukiara, klir pali kaikisa bara witin baha kasak luki kan. Sitan tasbaya iwanka natka, danh taki auya ba ra, Jehova pramiska na wan maisa nihkisa: “¡Upla kumi sin âpu sa Ai mapara aima wâl buaia! (Nah. 1:9).