Smalki tataukra baku ban pâwi kaia sa
1. ¿Patitara wina dîa samplika pain nani kaikan sa smalki tataukra pain kum kaia dukiara?
1 Kristian nani ba smalki tataukra baku kau pain ai warkka daukaia sa. Baha mita, Jisas ai disaipilka nani ra hilp munan smalkaia warkka pain daukbia dukiara (Lk. 9:1-5; 10:1-11). Aquila bara Priscila ba Apolos wal sim sât daukan, tnaya ra bri si kau “Dawan yabalka tânka param pali smalkan” (Ap.St 18:24-26). Timoti ba mani ailal smalkaia warkka ba dauki kan, baha mita Pal witin ra kupia bukan trai munbia smasmalkra lankira takaia, baku lika “upla sut mita kaikbia” witin nahki ai warkka pain dauki kan ba (1 Ti. 4:13-15). Mani ailal Gâd warkka daukan kabia sin, smalkaia natka dauki ba kau pain dauki waia sa.
2. Smalki tataukra wala nani wina lan takaia dukiara, ¿dîa daukaia sip sa?
2 Wala nani wina lan takaia. Natka kum yawan kau lan takaia sip ba sika, upla wala nahki dauki ba kaiki (S.L 27:17). Baha mita, smalkaia taki wabia taim, wan pânika nahki smalki ba pain walaia. Baku sin, smalki tataukra kau lankira nani ra pain smalkaia dukiara, hilp makabaia sip sa bara wan wibia taim aman pali walbia (S.L 1:5). ¿Karna wan munisa upla kum sakaia kli wih kaikaia dukiara, Baibil stadika nani tâ krikaia apia kaka smalkaia warkka sât walan nani ba ra ba tila ra kum tâ baikaia? Dakni tâ bri ba uplika wal apia kaka smalki tataukra lankira kum wal aisaia sip sa hilp wan munbia dukiara. Amya tikpara Jehova spiritka holikira ba sip sa hilp wan munaia lankira takbia dukiara. Baha mita piua bani ra makabi kaia sa (Lk. 11:13).
3. ¿Yawan nahki wan dara walaia sa kupia kraukanka kum yawan makabras kan wankisa taim?
3 Kupia Kraukanka pain kum wan wibia kaka praut takaia apia sa, yawan makabras kan wankbia sin (Smas. 7:9). Apolos baku, bawan lâka marikbia bara tingki sin wibia kupia kraukanka wankan uplika ra, bara dîa hilpka wanbia ba briaia. Naha ba sinskira daukanka kum sa (S.L 12:15).
4. ¿Dîa tâwan Jisas win yawan ba trai muni kaia sa smalki tataukra kau pain takaia?
4 Yawan pâwi ba Gâd ba mayunra brisa. Jisas ai disaipilka nani ba smalki tataukra baku pâwbia dukiara, praki kaikanka kum daukan. Witin ba wain dusa kum sa bara ai nina blablikra nani bâk sakan ba dusa tnawa nani mâ ailal saki ba baku sa win, bara Aisa ba ani tnawa sip ai mâ sakras ba dauhbi klin daukisa ai “mâ kau sâkbia” dukiara (Jn. 15:2). Wain nasla dawanka kum brinka sa ai dusa nani ba mâ pain ailal yabia, sim baku Jehova ai brinka sa wan “bîla baikra” ni wibia kaka, smalkaia warkka ba natka ailal ra kau pain daukbia (Hib. 13:15). ¿Yawan dîa bribia smalki tataukra lankira takbia kaka? Jisas ansika wankisa: “Bamna man nani mâ manis sakuna ba ra, Aisiki ba mayunra brisa” (Jn. 15:8).