**Smalkaia warkka kau pain daukaia sip sa: upla kum ra La Atalaya bara ¡Despertad! ban yabaia trai kaiks**

¿Dîa muni daukaia sa? Upla ailal ba wauhkataya nani aisi kaikaia ai brinka sa, sakuna want apia sa Baibil stadi takaia kan ai rilidianka ra pain ai dara walisa, apia kaka taim âpu sa. Wauhkataya nani ban aisi kaiki ba mita, Gâd Bîla lan takaia want kabia (1 Pi. 2:2). Ulbanka tânka kum witin kupia alkaia sip sa, apia kaka ai rayaka sins munaia. Minit kum kum uplika ra wih kaikbia ba wina pain ai dara walbia bara sim piua ra hilp wan munbia nu takaia dîa tânka dukiara aisaia ai brinka sa. Bara tawa tawa, Baibil stadika kum tâ krikaia.

Nahki daukaia:

Kati bani La Atalaya wauhkataya nani lâs balan ba uplika ra yas. Ban kra, kati bîla ra yu wala wih kaikaia sip sma witin dîa aisi kaiki ba kau laik kaikbia dukiara. Naha ba daukma wauhkataya swiram ba wina apia kaka raya balan ba yabaia. Dîa dauki sma ba pain ulbi swis (Gâd Warkka Dauki wauhkataya, Siakwa kati 2014, wahia 3 ba kaiks).
Uplika ra wih kaikma bani ba ridi taks. Wauhkataya wih swiaia baman watlika ra, uplika wal aisas bara trai muns pânikam lâka marikaia baku sip kama uplika ra kau hilp munaia.
Baibil stadika kum tâ krikaia sanska kum takbia kaka bris. Bara wauhkataya nani swisma uplika tila wina Baibil tânka kum dukiara dîa luki sma ba mamkabi walbia kaka, stadi takaia ulbi sakanka kum ansika mariki ba aikuki laki kaiks. Kau waras sma bara, makabi walanka kum dauks bara yu wala kli bal kaikma taim uplika wal laki kaiks. Pat pat upla kum wal Baibil yus muni tânka kum aisisma, apia kaka stadi takaia ulbi sakanka kum wal laki kaiki sma kaka pat Baibil stadika kum dauki sma. ¿Uplika ra Sturka yamni nani wauhkataya tara ba wal nahki stadika dauki ba dukiara pat marikram sa ki? ¿Dîa muni Baibil stadi takaia sa? bara ¿Baibil stadika nani ba nahki dauki banhwisna? lilkika nani pat marikram sa. Uplika ba patitara stadi takaia brinka apia kan kaka sin, ai rayaka sins takaia sip sa, diara nani ba sât wala takaia sip sa. ¿Dîa yamnika brima naha daukaia trai munma kaka?

Kati kum bilkara daukaia trai muns:

Ya ya wauhkataya nani ban yabaia sip ba uplika nina uls. Witin nani ra wauhkataya lâs balan ba yas, bara uplika ra wis wauhkataya raya balbia taim kli sal yama.