Tâ Bri Daknika Wauhkataya blikan ba

Wan muihni lakri laitwankira nani:

“Yang nani piu sut man nani dukiamra Gâd ra tingki wisna, bara sin puri sunra nani ra man nani sut dukiamra kupi kraukisna. Gâd wan Aisa mawanra kupi kraukisna, man nani nahki kasak lukan lâka wal wark takram ba, nahki latwan lâka wal wark daukram ba, bara nahki pali sin kainamra diara bîla kaikanka lâka ba Dawan Jisas Kraist kat ban bapi brisma.” (1 Tes. 1:2, 3.) ¡Naha bîla nani ba pain pali marikisa nahki mai luki banhwisna ba! Jehova ra tingki yabisa man nani dukiamra, bara warkkam pain dauki banhwisma ba tâwan.

Mani luan aiska ra, man nani takaskraskira “kasak lukan lâka wal wark takram” bara “latwan lâka wal wark daukram” King lâka tâ baikaia dukiara. Man nani tila wina manis kau daukaia plikisma smalkaia warkka ra. Sampla baku, muihni lakri kum kum smalki tataukra nit bâra wih smalkisa, sim ai kuntrika ra apia kaka plis wala ra. Bara wala nani upla ailal bâra pliska nani ra smalkisa. Bara kristian manis ba, Jisas Pruan Kupia Kraukanka piua ra, impaki pura kakaira wih kaikan taim bara Sikla kati 2014 ra warkka tara daukan piua ra, Tâ baiki smasmalkra baku wilinkira daukan. Kumi bani nitka sât sât brisa, kuna Jehova ra kupiam aiska wark taki sma ba lilia bîla maikisa (Ko. 3:23, 24). ¡Man nani kasak lukan lâka wal wark takisma ba tâwan sanska painkira kum sa Jehova ra tingki wiaia!

Baku sin, yang nani tingki tara yabisna man nani “latwan lâka wal wark daukram” ba Jehova ra mayunaia pliska nani mâkaia dukiara. Gâd uplika nani ba kau tara takisa mita naha pliska nani mâkaia ba aitani pali sa (Ais. 60:22). Luki kaiks, mani luan ra baman smalki tataukra 8,201,545 alkan, bara Baibil stadika nani 9,499,933 tâ brin. Naha pâwanka takan ba mita, Betel apiska ailal ba kau tara apia kaka raya paskaia sa. Baku sin, ¡Aidrubanka Watla nani kau mâkaia nitka sin bâra sa! Bara sim piua ra, tasba aiska ra bîla lakaia apiska nani sin nit takisa, baku bîla lalakra nani ba ai pliska kat iwi wark takaia sip sa.

Tâura aisan ba ra luki, ¿dîa daukaia sip sa tâ baikaia dukiara? Ban kra, sip sa wilin takaia wark kum kum tâ baikaia. Sakuna utla mâkaia tânka brisa apia kaka briras kabia sin wan yuyaka nani ba wal tâ baikaia sip sa (S.L 3:9, 10). Tempel watla paski kan piua ra, Israel uplika nani diara uba brih balan kan ba mita, maisa pakan danh brih balbia apia (Imp.St 36:5-7). Naha sât samplika nani ba wan kupia kat dimisa baku sin wan kupia bukisa. Muihni lakri laitwankira nani, naha warkka holi “latwan lâka wal wark daukram” ba mita kli sanska wankisa Jehova ra tingki wiaia.

Wan muihni lakri nani nahki ai warkka takaskras kira dauki ba bara bapi buanka lâka kaikaia ba rait pali wan kupia kat sabisa. Sampla baku 1950 manka wina, Corea del Sur tani ra kristian wahma nani ra silak ra mangkan sa piu wiria apia kaka wihka ra, naha ba kristian baku war bara pulitik lâka tâ baikras ba tâwan. Mani ailal luan wina kristian waitna manis naha sât trabilka mapara ban bapi buan sa. ¡Witin nani nahki trabil nani mapara bui ba samplika kaiki wan kasakka lukan lâka kau karna daukisa!

Eritrea kuntrika ra, kristian waitna yumhpa ba 20 mani pura silak ra sa. Baku sin, kristian mairin nani ai luhpia sirpi aikuki piua kau wiria silak ra kan. Baha nani ra silak watla wina sâkbia dukiara diara manis daukan, sakuna nawas kat diara takras sa. Sakuna wan muihni lakri nani ban kasak lâka ra sa. Bara trabil kau saura piu ra sin witin nani ban kasak sa. Witin nani dukiara ban puri suni banhwi kamna (Ro. 1:8, 9).

Param sa, man nani aihkika ba kasakkam lâka tâwan silak ra apia sma. Sakuna, pat almuk takan trabilka nani, siknis nani, pamali lalukra apia nani ba mampara bui sa bara trabil manis silp bri kama sin Jehova ra kasak banhwisma (Je. 1: 12). ¡Uba pain dauki sma! Ban bapi bûi sma ba tâwan bara takaskras wark takisma ba mita, kli sanska tara kum wankisa Jehova ra tingki wiaia.

Param sa, kasak lukan lâka wal warkkam ba, latwan lâka ra wark taki banhwisma bara bapi buan lâka marikram ba mita, aitani sa Jehova ra tingki wiaia kan Witin ba yamni sa (Law. 106:1). Uba latwan mai kaiki banhwisna bara man nani dukiamra puri suni banhwi kamna, Jehova mita alki mai bri kabia, yamni mai munbia ban kaia Gâdka ra mayunma dukiara.

Muihkam nani wina,

Jehova Witniska nani Tâ Bri Daknika ba