KRISTIAN RAYAKA KAT IWAIA | ¿SMALKAIA WARKKA MANKA AULA RA DÎA DAUKAIA WANT SMA KI?
Tâura smasmalkra apia kaka tâ baiki smasmalkra takaia
Spirit lainka ra warkka nani alkaia trai munisa taim, wan karnika ba tnatka pain ra yus munaia sip sa (1Ko 9:26). Kainara dîa daukaia pain luki kaikaia ba wan taimka pain yus munaia hilp wan munisa, tasba tnata kau aimakras ba ra (Epe 5:15, 16). Pamalikam mayunra ra, ¿smalkaia warkka manka aula ra dîa daukaia want sma ba laki kaikaia sip sma? Hilp mai munaia dukiara, naha Ridi takaia wauhkataya ra ulbanka sât sât ridi munan sa, puram sunra wal laki kaiki, spirit lainka ra warkka nani alkaia trai munma dukiara (Je 1:5).
Tânka kum baku, ¿pamali tila wina kum pan tâura smasmalkra kaia dukiara, pamalikam aiska asla wark takaia sip sa ki? Awar nani daukaia karna mai munbia lukisma kaka, tâura smasmalkra kum kum sim sât trabilka nani tilara smalki tauki nani ba wal aisas (S.L 15:22). Ban kra pamalikam mayunra ra tâura smasmalkra kum ra paiwaia bara ai sturka walaia sip sma, baha ningkara nahki awar nani daukma ulbi swiaia sip sma. Man piua luan ra tâura smasmalkra kapram kaka, ¿kli tâ krikaia sip sma lukisma ki? Ban kra rayakam ra diara kum kum chens takan ba mita, nanara daukaia sip sma.
¿Pamalikam tilara upla kum sip sa ki kati kum apia kaka kau piua yari tâ baiki smasmalkra takaia? Karnika âpu damra walisma kaka, yu bani wiria smalkaia sip sma. Wik bilara wark takisma, apia kaka skul dimisma ba mita smalki taki waia sanska uya briras sma kaka, bakisan maiki katka kum apia kaka wik 5 bri katka kum ra tâ baiki smasmalkra takaia sip kama. Tâ baiki smasmalkra kaia want sma katka nani ba kalindar kum ra mark muns, bara nahki awar nani daukma ba sin ulbi swis (S.L 21:5).
¿Jehova mita kristian mairin kum nina Aamand ra nahki main kaikan? ¿Baha ba dîa wan smalkisa?