Baibil stadika tâ krikaia dukiara septiembre kati ra smalkaia warkka tara ba

Septiembre kati ra, ¡Man lilia bas ban kaia ra! wauhkataya tara ba wal Baibil stadika tâ krikaia dukiara smalkaia warkka tara kum daukbia, bara yawan dîa sip ba kat trai munbia upla kau ailal wal stadika ba tâ krikaia. Baha kati ra sip sa tâ baiki smasmalkra baku 30 awar nani smalkaia. ¿Baha warkka tara ba yawan nahki daukbia?

• Upla wal pas trip aisisa piua ra. Wauhkataya tara nina sait ba yus muns uplika kau nu takan daukbia dukiara, bara trai muns marikaia wan Baibil stadika ba nahki daukisa. Wan auya tiwaia apia sa yawan kli wih kaiki uplika nani, apia kaka piua luan ra yawan wal aisan uplika nani ra. Ban kra pas taim stadi takaia want apia kan, kuna nanara lika wauhkataya tara bara stadi takaia tnatka raya ba laik kaikbia. Utla kum upla âpu sa kaka, wauhkataya tara ba swiaia apia sa, bara kau nu takan daukras uplika ra blikaia sin apia sa. Baha kati bilkara Kangrigisan Warkka Pura Kaiki Daknika ba, smalki taki waia aidrubanka nani kau aima ailal daukaia sip sa.

• Sans wala nani ra. Kangrigisan ba truk lupia wal smalkisa kaka, ¡Man lilia bas ban kaia ra! wauhkataya tara ba trukka ra mangkbia. Upla kum wauhkataya tara ba aisi kaikaia want sa kaka, tânka mariks Baibil stadika kum mana luha briaia sip ba. Bîla prahni ra wis wan Baibil stadika ba nahki daukisa, apia kaka makabi wals ahkia witin ra tânka marikaia sip sa sapa. Smalkaia warkka pura kakaira ba smalki tataukra lankira nani kum kum ra makabaia sip sa wark apiska nani ra wih Baibil stadika tâ krikaia warkka ba daukbia. Baku sin, man silp trai munaia sip sma, wark pâmnika nani apia kaka upla wala nani wal Baibil stadika tâ krikaia.

Jisas wan win disaipil nani daukaia bara lan daukaia (Mt 28:19, 20). Yawan bîla kaikisa, naha smalkaia warkka tara, ¡Man lilia bas ban kaia ra! wauhkataya tara yus muni daukbia ba hilp wan munbia Jisas dîa win ba kat daukaia.