Luhpa Pain Kum, Bara Saura Kum — INTERNET RA ULBI SAKANKA NANI Watchtower

Sturka 6

Luhpa Pain Kum, Bara Saura Kum

NANARA Kên Ebel wal ra kaiki kais. Wal sut pawan sa. Kên ba insla mamankra takan. Witin plun ma sirpi nani bara dus ma sat sat nani mangki kan.

Ebel ba syîp nani paki kan. Witin syîp lupia nani ba main kaikaia laik kan. Naha nani ba pawi tara taki kan pyua ra, witin syîp daknika tara kum main kaikaia bri kan.

Yu kum Kên Ebel wal, Gâd mawanra prisantka kum brihwan. Kên ba witin plun ma nani mangki kan ba brihwan. Bara Ebel ba syîp kau pain bri kan ba brihwan. Jehova ba, Ebel ra bara prisantka brihwan kan bara yamni kaiki kan. Sakuna Kên ra bara prisantka brihwan kan bara yamni kaikras kan. Dia muni sapa nu sma ki?

Ebel prisantka ba kau pain kan Kên prisantka ba wal. Baha purkara sin Ebel ba upla pain kan. Witin ai muihka ra bara Jehova ra latwan kaiki kan. Sakuna Kên ba upla saura kan; ai muihka ra latwan kaikras kan.

Baha mita, Gâd bui Kên ra win ai rayaka ba sins munbia. Sakuna Kên Gâd dia win ba bila walras kan. Gâd Ebel ra baman yamni kaiki kan ba dukyara witin uba ai kupia sauhkan. Yu kum Kên mita Ebel ra win: ‘Kaisa unta ra waia.’ Bara unta ra wih, wal man kan pyua ra, Kên mita ai muihka ra prukan. Witin uba karna prukan ba mita, ba kat ikan. Kên daukan ba saura pali kaikras sma ki?

Ebel ba pruan, sakuna Gâd witin ra kau ban lukisa. Witin upla pain kan ba mita, Jehova witin ra ai auya tikras. Baha mita yu kum Jehova Gâd bui Ebel ra kli raya bukbia. Baha pyua ra Ebel ba kli prubia apia. Witin sip kabia tasba ra raya ban kaiara iwi kaia. Rait apia naha sat uplika ra kakaira takaia pain kabia?

Sakuna upla nani Kên baku ba Gâd yamni kaikras. Witin ai muihka ra ikan ningkara Gâd mita ai pamalika lama wina laiura bliki panis munan. Witin plis wala ra iwaia wan pyua ra, ai lakrika kum brihwan, ai maîa baku briaia.

Pyu nani luan bara Kên ai maîa wal luhpa ailal sahwan. Bara Adam Iv luhpia wala nani ba sin marit taki mahka luhpa sahwi bangwan. Baha mita pyu kunhku bilara tasba ra upla ailal bara kan. Kaisa witin nani kum kum dukyara lan takaia.

Blasi sturka 4:2-26; 1 Jan 3:11, 12; Jan 11:25.