Sturka 14
Ebraham Kasak Lukan Laka Marikan Ba
MAN Ebraham naha ra dia dauki ba kaikisma? Witin kiru kum bri ba wal ai luhpia ra ikaisa talia sa. Sakuna dia muni baku daukisa? Kaisa Ebraham Sara wal nahki naha luhpia brin ba pas kaikaia.
Amya tikpara, Gâd mita witin nani ra luhpa kum yabaia pramis munan kan. Bamna Ebraham Sara wal uba almuk kan ba mita baha ba sip apia talia kan. Sakuna upla mapara daukaia sip apia dukya ba, Gâd lika daukaia sip sa. Bara Ebraham baha ra kasak luki kan. Baku bamna dia takan?
Gâd naha pramiska daukan wina, mani kum luan. Ebraham ba 100 bara Sara 90 mani bri kan pyua ra bibi lupia kum baikan, nina Aisak makan. Gâd pramiska ba aimakan kan!
Sakuna Aisak ba pawi tara takan pyua ra, Jehova mita Ebraham kasakka lukan laka ba traika kaikan ra dingkan. Gâd bui winan: ‘Ebraham!’ Bara Ebraham pana win: ‘Nara sna!’ Bara Gâd bila: ‘Luhpiam unsak, Aisak ba brih, il kum mai marikamna ba ra was. Bara baha ra witin ra iki, sakripais kum dauki aik.’
Baha mita Ebraham ba uba sari takan kaia sa, kan witin uba ai luhpia ra latwan kaiki kan! Bara amya tikpara, Gâd mita Ebraham kyamka nani ra Kenan tasbaia ra iwbia pramis munan kan ba. Sakuna Aisak prubia sa kaka, nahki baha ba tnata aimakaia sip kan? Ebraham ba ai tanka briras kan, sakuna witin ban Gâd bila walan.
Ilka ra wan pyua ra, Ebraham ba Aisak mihta wilki altar daukan kan ba purara mangkan. Bara witin kiru ba brih ai luhpia ra mahka ikai kan. Sakuna baha minitka ra Gâd insalka kum mita witin ra win: ‘Ebraham, Ebraham!’ Bara Ebraham bila: ‘Yang nara sna!’
Gâd bila win: ‘Wahmika ra insauhkpara bara saura sin munpara. Nanara kaikisna man yang ra kasak lukisma ba, kan man luhpiam unsak ba, yang ra aikaia alki takaskras kapram ba dukyara.’
Ebraham ba Gâd ra kasak lukan laka tara bri kan! Witin nu kan Jehova ba diara sut daukaia karnika bri kan bara Aisak ra kli prura wina bukaia sip kan. Sakuna rait pali ba, Gâd brinka apia kan Ebraham ba ai luhpia Aisak ra ikbia ba; baha mita dus kum lamara kan bara yaban syîp kum aiblakwan, bara Ebraham ra win Aisak watlika ra baha syîpka ba ikbia.
Blasi sturka 21:1-7; 22:1-18.