Sturka 28

Bibi Moses Ra Swaki Sakan

KAIKI KAIS bibi lupia kum ini, tyara kum mihta taura alki bri ba! Witin ba Moses. Tyara painkira ba ya sapa nu sma ki? Witin ba king Fero luhpia mairin.

Moses yaptika mita bibika lupia na ra yukuki bri kan kati yuhmpa alkan kat, kan want apia kan Idsipt uplika nani mita ikbia. Moses ra yukukan ba wina kli sakaia sip kan nu kan, baha mita Moses ra swaki sakaia dukyara witin naku daukan.

Witin pataki kum li dimras kan paskan. Bara Moses ra baha bilara mangki, Nail awalka un ra klisang dusa nani pawi kan tilara swin. Bara Miriam ra win, dia takbia sa sapa lama wina biki kaiki kabia.

Wihka apia kan Fero luhpia mairin ba Nail awalka ra aihtabaia wan. Bara witin patakika ba klisang nani tilara awi kan kaikan. Bara witin ai albilka mairin kum ra taui win: ‘Patakika ba wih alki sal aik.’ Bara alki bribalan pyua ra, witin patakika bukutban taim, bibi painkira kum bilara kan kaikan! Sakuna bibika lupia ba ini kan bara king luhpia mairin ba ai kupia ra latwan kaikan. Bara want apia kan bibika lupia ba ra ikbia.

Baha ningkara Miriam ba lamara balan. Witin lilka ra ba kaikaia sip sma. Miriam mita Fero luhpia mairin ra makabi walan: ‘Yang wih Hibru mairin kum pliki bribalamna ki, tukta na tyala dakaki maikaia?’

Bara king luhpia mairin ba win: ‘Pliskam baku dauks.’

Bara Miriam ba plapi wih ai yaptika ra win. Bara Moses yaptika ba balan taim, king luhpia mairin mita win: ‘Naha bibika na brih man paki aik bara yang mai aibapamna.’

Baha mita, Moses yaptika ba witin silp ai luhpia ra main kaiki kan. Bara Moses ba pawi mani aitani bri kan pyua ra, Fero luhpia mairin ra brisi yaban, bara witin ai luhpia baku brin. Baha mita Moses ba king Fero watla ra pawan.

Impakan sturka 2:1-10.