Sturka 79

Danyal Layan Nani Tilara

KAIKI KAIS! Danyal pât ra talia sa. Sakuna layan nani ba mita witin ra saura munras! Nu sma dia muni? Bara ya mita witin ra layanka nani tilara lulkan ki? Kaisa kaikaia.

Nanara waitna kum nina Darius ba Babilun ra king aimaki kan. Witin mita Danyal ra uba yamni kaiki kan, kan Danyal ba uba upla pain bara sinskira kan ba mita, bara king mita Danyal ra wihta tara kum baku ai kingka ra mangkan. Baha mita waitna wala nani tumi, naku munan:

Witin nani Darius ra win: ‘King, yang nani brinki sa man lâ kum mangkma bara wibia, 30 dis bilara upla kumi sin gâd wala bara upla wala ra mayunaia apia, ban sakuna, man ra baman, kingki painkira. Bara ya naha lâka alki briras sa kaka layan nani tilara lulkan kabia.’ Darius nu apu kan dia muni waitnika nani ba naha lâka want kan sapa. Sakuna witin pain kaiki, lâka ba ulban. Nanara lâka ba, sins munaia sip apia kan.

Danyal naha walan taim, witin yu bani dauki kan ba baku ai watla ra wih ai pura sunan. Waitnika saura nani ba nu kan, Danyal ba Jehova ra ai pura suni swiaia apia kan ba. Witin nani ba lilia bangwi kan, kan luki kan baha lâka wal Danyal wina prî taki bangwbia.

King Darius ba waitnika nani dia muni lâka ba want kan ba nu takan pyua ra, uba sari takan. Sakuna witin lâka ba sins munaia sip apia kan, baha mita Danyal ra layan nani untika ra lulkbia blikan. Sakuna king mita Danyal ra win: ‘Mayunisma Gâdka ba mita, swaki mai sakbia.’

Darius baha tihmika wari taki, sip yapras kan. Yu wala titan, witin layan nani untika ra plapi wih win: ‘Danyal, Gâd rayakira napakanka! Mayunisma Gâdka ba layan nani bila wina swaki mai sakan ki?’ Darius bara bui ba man kaikaia sip sma.

Bara Danyal mita win: ‘Gâd bui ai insalka ra blikan layan nani bila prakaia, saura ai munbia apia dukyara.’

King ba uba lilia taki, Danyal ra untika ba wina sakbia blikan. Baha ningkara, waitnika nani Danyal ra saura muni prî takaia luki kan ba ra, layanka nani untika ra lulkan. Witin nani kau maya kat kauhras kan, layanka nani ba mita pâli alki dusa sut kriki tikan.

Ningkara, king Darius mita ai kingka aiskara naku ulbi blikan: ‘Upla sut Danyal Gâdka ra kulki kabia. Witin sain tara nani daukisa. Bara Danyal ra layan nani wina swaki sakan.’

Danyal 6:1-28.