Sturka 116

Nahki Raya Ban Kaiara Iwaia Ba

MAN nu sma ki naha tuktika mairin lupia na ai panika aikuki dia aisi kaiki ba? Sim naha Baibil sturka nani bukka aisi kaikisma na. Bara sim naha sturka “Nahki raya ban kaiara iwaia ba” aisi kaiki bangwisa.

Man nu sma dia lan taki bangwisa ki? Pas ba, yawan raya ban kaiara iwaia sa kaka, Jehova bara ai luhpia Jisas dukyara lan takaia sa. Baibil ba naku wisa: ‘Naha ba raya ban kaia laka sa. Gâd kasakkira kumi ba bara ai luhpia Jisas Kraist ba dukyara lan takaia.’

Sakuna nahki Jehova Gâd bara ai Luhpia Jisas dukyara lan taki bangwaia sip sa ki? Tnatka kum ba, Baibil sturka nani bukka na ta wina tnata kat aisi kaikaia. Bukka na Jehova bara Jisas dukyara kasak wan smalkisa, rait apia? Bara witin nani diara daukan bara daukbia nani ba dukyara sin wan aisisa. Sakuna buk wala sin aisi kaikaia sa.

Lilka ra buk wala tasba ra bri ba kaikisma ki? Baha ba Baibil. Naha bukka sturka nani ra Baibil tikska nani taki ba, upla kum aisi kaiki maikbia yas. Yawan Jehova dia want ba kat daukaia dukyara bara raya ban kaia laka briaia dukyara maisapahkanka aiska Baibil ra wankisa. Baha mita yawan Baibil ba yu bani aisi kaiki kaia sa.

Sakuna Jehova Gâd bara Jisas Kraist dukyara lan takaia baman apia sa. Yawan sip sa witin nani dukyara bara ai smalkanka nani dukyara sin ailal nu takaia, sakuna kau raya ban kaia laka ba briras kaia. Dia wala nit sa sapa nu sma ki?

Yawan dia lan taki ba wan rayaka ra sin alki brih daukaia sa. Judas Iskariat ba ya kan ba nu sma ki? Witin ba apastil nani 12 saki brin ba kum kan. Judas ba Jehova bara Jisas dukyara tanka ailal bri kan. Sakuna witin ra dia takan? Pyu nani luan ba ra, witin gridikira takan bara Jisas ra lalah ma 30 mana atkan. Baku bara Judas ba raya ban kaia laka ba bribia apia.

Sturi 69 ra, yawan Gehasai dukyara lan takan ba, kupiam krauki sma ki? Kwala bara lalah nani ai dukya apia kan ba briaia want kan. Naha nani briaia dukyara kunin aisan, bara Jehova bui klala yaban. Bara yawan ai lâka alki briras sa kaka, klala sin wankbia.

Sakuna Jehova dukya ba ban kasak kat dauki uplika pain nani sin bara kan. Yawan witin nani baku kaia want sa, rait apia? Samyuil tuktan lupia daukanka ba, tnatka kum yamni sa. Kupiam krauki bas yawan sturi 55 ra kaikata baku, Samyuil mani walhwal apia kaka dis matsip bri kan Jehova tentka watla ra wih dukya dauki ta krikan pyua ra. Baha mita tuktan lupia kama sin Gâd dukya daukaia dukyara aitani sma ba.

Param sa, yawan sut ba Jisas Kraist nina blikaia want sa. Sturi 87 ra mariki ba baku, witin tuktan kan pyua ra sin tempel bilara dimi, upla wala nani ra ai Aisa heven ra ba dukyara smalki kan. Witin daukan ba baku tnata luki dauki kap. Yawan ya ya nani ra aisaia sip ba ra, Jehova wan Gâdka painkira dukyara bara ai Luhpia Jisas Kraist dukyara sin aisi kap. Yawan naha sut daukbia sa kaka, sip kabia Gâd tasba ra paradais raya daukbia ba ra raya ban kaiara iwaia.

Jan 17:3; Lawana 145:1–21.