Lisin 9

Gâd uplika ba klin kaia sa

Dia muni tanka sut ra yawan klin kaia sa ki? (1)

Spirit laka ra klin kaia ba dia tanka sa ki? (2) Wan daukanka mapara klin kaia? (3) Wan sinska ra klin kaia? (4) Bara wan wîna tara mapara klin kaia? (5)

Dia bila taski aisi bangwras kaia sa ki? (6)

1. Jehova Gâd ba klin bara hulikira sa. Witin bila kaikisa ai uplika daukanka, lukanka, wîna tara ba bara spirit laka mapara sin klin bangwi kabia (1 Pita 1:16). Gâd nakra ra klin kaia dukyara trai kaikaia sa. Tasba uplika taski tilara yawan iwisa. Baha purkara, wan swapnika mapara sin aiklabisa. Sakuna wan swapbiara.

2. Spirit laka ra klin kaia: Jehova ra mayunbia kaka, rilidian kuninkira smalkanka bara daukanka tila wina laiura kaia sa. Yawan rilidian kuninkira wina taki, ta baikras pali kaia sa (2 Korint 6:14-18; Param marikan 18:4). Gâd tanka kasak ba pat lan takan bara, aman kaiki kaia sa kunin smalki nani ba kli kunin wan munbiara (2 Jan 10, 11).

3. Wan daukanka mapara klin kaia: Jehova want sa ai uplika ba kristian kasakkira baku ban tauki bangwi kabia (1 Pita 2:12). Yawan dia dauki ba sut, yukuwi dauki kabia sin witin kaikisa (Hibru nani 4:13). Rug takaia bara tasba daukanka taski wala ba wina sin laiura kaia sa (1 Korint 6:9-11).

4. Wan sinska ra klin kaia: Wan sinska ra lukanka klin bara sunu ni bangkbia sa kaka, wan daukanka sin klin takbia (Pilipai 4:8). Sakuna diara taski man lukisa kaka, diara saura atia dauki kabia (Matyu 15:18-20). Lilia kaia dukyara diara wan sinska taski daukbia ba wina sin laiura kaia sa. Baibil stadi takbia kaka lukanka sunu ni wan sinska bangkbia.

5. Wan wîna tara mapara klin kaia: Yawan kristian nani ba Gâd warkka dauki ba mita wan wîna tara bara wan kwalka ba sin klin bri kaia sa. Tailit ra diman ningkara apia kaka plun piras bara kangbras kainara sin wan mihta sikbaia sa. Wamtla ra tailit apu sa kaka, unta salhki muni kana ba bikaia sma (Kli smalkan 23:12, 13). Wan wîna tara klin bri kaia ba, siknis takbia apia munisa. Kristian watla nani ba latara bilara sin klin bara asla kaia sa. Taun bilara kau klin bangwi kaia sa.

6. Wan aisanka klin kaia: Gâd uplika ba kunin aisaras. Kuninkira nani ba Gâd Kingka laka ra dimbia apia (Epesus 4:25; Param marikan 21:8). Kristian nani ba kas aisaras. Sturi bara pulan bila nani taski sin walras bara aisaras. Wark ra, kul ra bara ai lamara iwi uplika tilara aisanka kau klin bri bangwisa (Epesus 4:29, 31; 5:3).

[Wahya 18 bara 19 lilkika nani ba]

Gâd uplika ba tanka sut ra klin kaia sa