Lisin 4

Nahki yawan God ra kakaira kaia sip sa

Yawan Jehova ra kakaira takaia sip sa Baibil aisi kaiki ba wal. Piu ailal luan ra, God upla nani kum kum saki brin witin ai lukanka nani ulbia dukiara. Baha ulbanka nani ba kaiki bangwisa sa Baibil baku. Naiwa piuara yawan sip sa God ra kakaira takaia Baibil aisi kaiki ba wal. Naha na Jehova bila aisanka ba brisa, apia kaka ai bila blikanka ba, baha mita God Bila baku kakaira sa. Yawan Baibil aisi bara kasak lukaia sa kan Jehova ba aima kumira sin kunin aisaras. “God sip apia sa kunin aisaia” (Hibru nanira 6:18). Baku bara, God Bila aisanka ba rait laka brisa.​—Jan 17:17.

Baibil ba prisantka kum kau mana pali yawan God wina brin ba. Waungtaya ulbanka kum aisa latwankira kum wina ai luhpia nanira bliki baku sa. God pramiska naha Tasba na plis aihkakira kum daukaia bahara iwaia dukiara wan aisisa, wibia sa kaka, paradais kum. Wan wisa God piu luanra daukan ba, nanara dauki ba, bara kaina piuara daukbia ba ai luhpia kasak lalukra nani dukiara. Wan patka nani wapni mankaia dukiara sin hilp wan muni sa bara lilia laka ba pliki sakaia sin.​—2 Timoti 3:​16, 17.

Jehova Witniska nani ba God panika nanisa; Baibil smalki ba tanka briaia dukiara hilp mai muni bangbia. Baibil stadi takaia wantsma kaka witin nanira wiaia baman sa. Mana mai kulkbia apia mai smalki ba dukiara (Matyu 10:8). Ba purkara, sipsa Kristian asla takanka nanira waia. Naha nani na mayunaia pliska nina King laka Watla nani maki bara dauki bangwisa. Kristian asla takanka nanira wisa kaka, God tanka laka briba kau isti pali paubia.

Yawan God ra kakaira kaia sipsa diara nani paskan bara luki kaiki wal. Tanka marikanka ba nakusa, Baibil ba wisa: “God ba heven nani bara Tasba ba paskan” (Genesis 1:1). Jehova “heven nani ba” paskan, bara Yu ba sin paskam. Bansa kaka, naha na dia wan marikisa God dukiara? Jehova ba karnika ailal pali brisa. Witin baman sipkan diara karnakira pali Yu ba baku paskaia. Bara wan marikisa Jehova ba sinskira sa, kan Yu paskaia ba sins laka nitsa, lapta bara ingni sin wanki sa, bara aima kumi sin daswras.

Jehova paskanka nani ba marikisa witin latwan wan kaikisa. Luks dus ma sat ailal sutra Tasbara bâra ba. Jehova dus ma satka kumi baman wankaia sipkan, apia kaka kumi sin apia. Ban sakuna, Jehova dus ma nani sat ailal wankan paskanka satkira, yahpika, kalatka, bara aunhka nani. Naha wan marikisa Jehova latwan wan kaikisa, bara sin uba kupia pihnikira, yamni mamunra sa bara kupia painkira sin.​—Salmo 104:24.