Pât Wahwanka Nani Sut Ba Pat ai Tnata Aimakuya!

Aima kum kum rayakam ra, bankra makabi walram: ‘Dia muni pât wahwanka nani uba ailal sa?’ Mani tausin nani bilara, upla kiamka nani ba pât nani ailal wahwan wâr nani wina, umpira laka, pât saura tara nani, lâ krikan laka, kasak apia laka, siknis nani, bara prura ba. Andat mani luan ba bilara upla nani ba kau pât wahwanka nani kaikan pyu wala nani sut purkara. Naha pâtka wahwanka nani ba tnata aimakbia ki?

Wan maisa nihkikira ansika wanki ba sika: Au, bara pat pali! God Bila, Baibil ba, wisa: “Saurakira nani ba bara apia kabia  [...]. sakuna praut apu nani ba tasba na ai dukia bribia, bara rait pain pali ai liliaka laman laka ailal ra bribia.” Nahki pyu wihka kat iwan kabia? ‘Kasakkira nani ba tasba na ra brih iwbia, bara bankaiara witin nani ba tasba purara iwan kabia.’—Lawana 37:10, 11, 29.

God saurka laka nani bara pât wahwanka nani ba kitbi sakbia ninkara, Tasba na paradais kum ra lakan kabia. Upla nani sip kabia bankaiara rayakaia lilia laka ra bara sunu pali kaia ai wîna tara mapara. God Bila ba kaina manas wisa: “Witin nani ai nakra laya ba diki sakbia, bara prura ba bâra kli apu kabia, sari laka ba bara inanka bila tara nani wîna latwanka nani sin kli apu kabia.”—Param marikan 21:4.

Baha Tasba raya ra, pruan nani ba kat sin rayaka laka ra kli bukan kabia baha blisinka nani ba aikuki briaia. “Prura wina kli bukaia tanka ba bara kabia kasakkira nani bara kasak apia nani dukiara.” (Wark nani 24:15) Baha mita Jisus Kraist saura dadaukra ai kupia laki witin ra kasak lukan bara sip kata wiaia: “Man yang wal paradais ra kama.”—Luk 23:43.

Dia muni pât wahwanka nani ba ta krikan?

Kan God ba kaina dukiara diara painkira kum upla nani bribia wisi luki daukan kaka, dia muni witin swin pât wahwanka nani ta krikan? Dia muni witin pât nani ba ban swin wihka wan?

God Adam Iv wal ra paskan pyua ra, witin kasak kat paskan wîna tara ra bara sinska mapara. Witin nani ra paradais giardinka kum ra mangkan ai auyapah laka warkka daukaia yaban. Baibil ba wisa: “God kaikan diara nani sut witin paskan kan ba bara, kaiks! Sut ba uba pain kan.” (Blasi sturka 1:31) Witin nani God bila walan kata tuktan nani kasakkira baman sahwaia kan, bara tasba paskanka aiska na paradais kum ra tawaia kan, bahara upla nani ba sip kata bankaiara iwaia kupia kumi laka ra bara liliakira laka ra.

God Adam Iv wal ra prisantka aihkakira kum mangkan witin nani silp ai kupia laka daukanka ba naha na upla paskan ba taka baku. Witin nani robot nani (apia kaka misin) baku ai dara walras apia kan. Ban sakuna, witin nani lilia ban banghwikaia kan silp ai kupia laka daukanka ba kasak kat yus munan kata God lâka nani ba alki brih wal. God aisi wiba baku: “Yang, Jehova, man God kam sna, witinka mai smalki ba man yamni munan laka ba brima dukiara, witin man nani ra mai mariki ba anira minan taibi wapaiasma ba.” (Aiseya 48:17) Silp wan kupia laka daukanka ba saura yus munuya taim pâtra dimaya sip sa, upla nani ra paskras kan God lâka munuhta wina tnayara tawi diara nani daukbia ba pain takbia. Baibil ba wisa: “Tasba uplika kumi sin dukia apia sa ai yabalka ba. Ai dukia sin apia sa ai mina lulkanka nani brih wiba.”—Jirimaia 10:23.

Sari pali, yawan pas almuka nani ba luki banghwan, witin nani sip banghwikaia God lâka munuhta ba wina tnayara tawi, diara nani daukbia ba kau ban pain kabia. Sakuna witin nani God gabamintka laka ba lulki swin pyua ra, God kau ban swiras kan witin nani wîna tara kasak kat paskan kan ba bankabia. Bara witin nani mahka mayara iwan bara tnata kat almuk taki bara prui banghwan. Yawan na witin nani ai luhpia sa bara yawan sin baku takan.—Rom 5:12.

Purara karnika mangki brih iwanka mapara aisanka tara ba

Dia muni God Adam Iv wal ra sauhki tiki bara waitna mairin wala paski ta krikras kan? Kan paskanka aiska pura ra karnika mangki brih iwanka ba God dukia sa, witin ai raitka sa ta briaia ba, kuna ta wina mapara buan kan. Makabi walanka kan ba: Ya ba ta briaia raitka ba brisa bara ya ta brinka ba aitani sa? Aisi ban wabia kaka: Upla nani ba sip kaia kan kau diara pain daukaia God ta briras kan kata? Kan witin nani ra pyu aitani yaban ai prika laka aiska ba pain brih wabia, baha mita God sip kata witin nani ai painka dukiara bankaiara swiaia ai laka munuhtara, apia kaka witin nani silp ai kupia laka ra swiaia. Upla nani ra pyu aitani yaban traikaiki banghbia pulitik daukanka sat sat, asla iwanka tanka nani ra, lahla lainka ra bara rilidian paskanka sat sat nani ra God ta brinka ba wina saitra tawi daukbia.

Baha wina dia takan? Mani tausin nani upla sturka laki kaiki bara wan wisa panis nani ba kau kau taki aula. Andat mani luan ra upla pamalika ba panis nani kau saura ba wahwan pyu nina ra luan ba wal. Milian nani rayaka tikan Tasba Aiska Wârka Wal ba bukan pyua ra. Andat milian nani purkara sakripais daukan wâr nani ra. Lâ krikanka bara rau munan laka ba ailal pali sa. Drug nani tankas yus muni ba siknis kum sa, waitna mairin wal prawi siknis saki ba kau ban ilihwi auya. Ten milian upla nani prui banghwisa mani bani plun wahwi bara siknis taki. Pamali rayaka ba bara lâ kat yamni iwan tanka ba plis sut ra baiki tikan sa. Upla gabamintka kumi sin wapni daukaia ansika yabaia apu sa trabilka nani na dukiara. Witin nani kumi sim sip apia sa almuk takaia tanka ba, siknis nani bara prura ba apu tikaia.

Wan taimka nani na Baibil win ba baku sa. God Bila ba tanka marikisa, wan pyua na naha “las yua nani ra” iwanka tnatka baku, “alki daukaia karna pyua nani balbia taim.” Baibil win baku, “upla saura dadaukra bara pul mamunra nani ba saura wina kau saura taki kabia.”—2 Timoti 3:1–5, 13.

Pat pali pât wahwanka ba tnata mangbia

Diara aisanka nani sut taki ba marikisa, upla God wina tnayara diara dauki kaiki ba sari pali ai pyua tnata alkuya. Param pali marikan sa upla gabamintka ba sip apia sa pain waia God ta briras kaka. God gabamintka laka ba baman sip sa kupia kumi laka bribalaia, lilia laka, wîna tara ra sunu laka, bara raya ban kaia laka. Bamna God Jehova watawanka laka bara pât wahwanka nani swin ban taki ba tnata aimakaia ba lamara aula. Pat pali God upla nani bisniska ra ai mihta dingkbia naha iwanka tnatka aiska auyapah apia bara sauhki tiki wal.

Prapit ulbanka Baibil ra naku wisa: “Baha kingka nani pyua ra [upla gabamint ra nanara iwi nani ba] heven Godka ba kingka laka kum mangbia [heven ra] aima kumi ra sin sauhki tikan kabia apia... akbi tikan kabia bara tnata mangkbia naha kingka laka nani ra [gambamint ra naiwa nanara iwi nani ba], bara witin baman ban tnata apu kaia ra takasbia.” (Daniel 2:44) Jehova ai karnika purara mangki brih iwi pura luanka ba, witin wihta aimakaia raitka ba, ai kingka laka heven wina ba bakku sika, Baibil smalkanka lalka kau tara kulkisa. “Las yua nani ra sainka nani” sainka kau tara takbia ba dukiara, kaina manas Jisus win: “King laka sturka yamni nani ba tasba ra upla iwanka aiskara smalki banghbia witnis aisanka baku nisan nani sut ra, bara ninkara tnata ba balbia.”—Matyu 24:14.

Tnata ba aimakbia pyua ra, ya raya lubia? Baibil ansika yabisa: “Wapni nani ba tasba ra iwi banghbia, bara pât luha nani baman witin purara takaski banghbia. Mana aibapanka baku, saurakira nani ba Tasba wina klaki sakan kabia.” (Sins laka 2:21, 22) Wapni nani ba sika God kupia laka dukiara lan taki dauki banghwi ba. Jisus Kraist win: “Naha tanka ba raya ban kaia laka sa, God kasakkira kumi ba dukiara lan taki ba, bara witinka man bui blikram ba, Jisus Kraist.” (Jan 17:3) Au, tasba na lui auya ... kuna ya God kupia laka dauki ba ban kaiara bara sa.”—1 Jan 2:17.