Israel nisanka Kenan ra diman

ISRAEL uplika nani ba Kenan tasbaya ra dimras kainara, Jehova Ebraham ra pramis munan baha tasbaya ba yabaia. Jasua Israel uplika nani ra tâ bri kan Pramis Tasbaya ra dimbia dukiara.

Gâd aitani lukan Kenan uplika nani ba sauhki tikan kabia, kan witin nani ba uba upla ra rau muni kan bara rug lâka sâtka manis dauki kan. Baha mita, Israel uplika nani ra adar yaban Kenan tawanka nani sut sauhki tikbia.

Baha tasbaya ra kau dimras kainara, Jasua ba biki kakaira wâl blikan. Naha nani ba Jeriko tawanka ra diman bara Rahab watla ra takaskan. Naha mairka ba nu kan witin nani ba Israel uplika kan, baha mita yukukan. ¿Dîa muni? Ai uplika nani swaki sakaia dukiara Jehova dîa sainka nani daukan dukiara walan kan. Baha mita, Rahab ba Jehova ra kasak luki kan. Rahab witin nani ra makaban pramis munbia witin bara ai pamalika ba iki tikbia apia Jeriko tawanka sauhki tikan kabia piua ra.

Piu luan ba ra, Israel uplika nani ba Kenan tasbaya ra wan bara Jeriko mapara war aiklaban. Jehova daukan Jeriko kutbanka nani ba kauhbia, bara Israel war aiklaklabrika nani ba tawan uplika nani iki tikan. Sakuna Rahab bara ai pamalika ba swakwi takan. Mani 6 bilara Jasua bara ai uplika nani ba war aiklabi Pramis Tasbaya aihkika ba pura luan. Baha wina, Israel kiamka kumi bani ra ai tasbaya pîska nani yaban.

Yu kum, Jasua pruaia lamara kan piua ra, Israel uplika asla daukan. Jasua witin nani ra win Gâd dîa daukan ba patitara napakanka nani dukiara. Baku sin witin nani kupia bukan Jehova ra kasak kaia. Jasua bara ai uplika nani pruan ningkara, Israel uplika nani ba Jehova mapara buan bara gâd bahki nani ra mayunan. Mani 300 bilara, witin nani ba Gâd lâka nani krikan. Bara saura dauki kan piua ra, Jehova mita filisteo nani mihta ra swin bara waihla wala nani ra sin. Sakuna Israel uplika nani ba ai kupia laki kan piua ra, Jehova swaki sasakra kum yabi kan. Sut ba ra, swaki sasakra 12 bâra kan. Witin nani ra wihta nani nina mâki kan.

Wihta Nani bukka ra naha swaki sasakra nani dukiara wan aisisa. Pas ba wihta Otoniel bara wihta kau karnakira ba sin takisa: wihta Samson. Naha bukka diara kum wan marikisa: Jehova bîla walbia kaka, wan rayaka ba pain kabia; sakuna baku daukras kaka, pât nani bribia.

(Jasua, Wihta Nani bara Libait Lâka 18:24, 25 wina sakan sa.)