Israel nani king kum makaban

SAMSON pruan ningkara, Israel tasbaya ra wihta bara prapit raya kum takan, ai nina Samuil. Israel uplika nani ba nisan wala nani baku kaia want kan. Baha mita, king kum makaban. Jehova naha ba pain kaikras kan, sakuna Samuil ra win Saúl ba king baku mangkbia. Naha waitnika ba bawikira kan, sakuna baha wina tara pulan lâka brin bara Jehova bîla walras kan. Baha mita, Jehova Saúl ra pain kaikras bara Samuil ra win Saúl sirka ra wahma Debit ba king baku mangkbia. Mani ailal luan ba ra, Debit king aimakan.

Yu kum, Debit ai muihni nani ra kaikaia wan. Witin nani ba Saúl war aiklaklabrika nani tilara kan. Debit bahara wan taim kaikan Israel uplika nani ba si bri kan. ¿Dîa muni? War aiklaklabra kum ai nina Goliat Pilistain wina kan ba Israel uplika nani ra si brin dingki kan, bara Gâd mapara bûi kan. Debit ai kupia baikan. Baha mita waitnika mapara war aiklabia win, sakuna witin ba wahma lupia kum kan. Debit ai mihta ra walpa kum kum brih praukpraukia ra mangkan. Baha wina, waitna tarka tara mapara buan. Naha waitnika ba 9 pît pura bri kan. Goliat Debit ra kaikan taim lawaska kikan, sakuna Debit witin ra win Jehova nina brih war aiklabi kan. Debit walpa kumi Goliat ra lulkan bara lalkamhka ra diman. Bara waitnika ba kauhan taim, Debit ba wih filisteo purara buan bara sordka ba alki lal dakban. Filisteo wala nani ba baha kaikan taim, sibrin taki mahka plapan.

Debit si briras naha daukan ba Saúl kaikan piua ra, war aiklaklabra nani tilara kulkanka yaban. Sakuna piu luan ba ra, Debit war aiklabanka ailal pura lui kan ba mita, Saúl mahka witin ra tuman bara ikaia want kan. Debit ai rayaka swaki sakaia dukiara plis wala ra plapan. Bara Debit plis kum wina plis wala ra Saúl ikbia apia dukiara tauki kan, sakuna ban Saúl ra kulki kan. ¿Dîa muni? Kan witin nu kan Jehova mita Saúl ba king baku mangkan. Piu luan ba ra, Saúl war aiklabanka kum ra pruan. Baha mita, Debit king takan Jehova mita pramis munan kan baku.

Debit want kan Jehova dukiara tempel kum paskaia. Gâd win Debit baha daukbia apia, ai luhpia Salaman ba daukbia. Debit tempel ba sip paskras kan, sakuna Jehova witin ra pramis munan ai kingka lâka ba sât wala kabia king lâka wala nani ba wal. Debit kiamka wina Swaki sasakra kum takbia. Naha ba Eden giadinka ra Jehova pramis munan kan. Naha waitnika ba Misaya kabia, wibia sa kaka, Wahbi Sakan Uplika ba. Bara Jehova Kingka lâka ra aimakbia. Naha ba ban kaia ra ban kabia.

Debit Jehova ra tingkika lâka yabaia dukiara, lalah pauni bara pihni ba apahkan bara naha nani wal tempel watla ba paskan. Baku sin, lawana ailal paskan, Jehova ra mayunaia dukiara. Debit pruaia lamara kan piua ra, Jehova ra kulkanka tara yaban. Witin naku aisan: “Dawan spiritka ba yang bîli bâk aisisa; ai bîla aisinka ba yang twisi ra sa” (2 Samuil 23:2).

(1 Samuil, 2 Samuil, 1 Kronikas, Aiseya 9:7, Matiu 21:9, Luk 1:32 bara Jan 7:42 wina sakan sa.)