Kraist pruanka

JISAS mani yumhpa pura bakriki bilara smalki tauki kan ningkara ai rayaka mahka yabaia kan. Ju rilidianka tâ bri uplika nani ba natka kum plikan Jisas ra ikaia dukiara, sakuna witin nani ba upla nani ra sîa bri kan, kan upla sut mapara Jisas ba prapit kum kan. Sitan Judas kupia nikban Jisas ba upla saura nani mihta ra mangkbia. Naha waitnika ba apastil 12 tila wina kum kan. Rilidian tâ bri uplika nani ba silbar lalahka mâ 30 wal witin ra aibapan.

Insal luan yua tihmika ra, Jisas ai apastilka aikuki asla takan naha yua kulkaia dukiara. Naha wina Jisas Judas ra makaban baha wina taki wabia. Ningkara, kulkanka raya kum daukan: Dawan Tutnika Pata. Jisas ai mihta ra brit kum brih ai pura sunan ningkara, ai disaipilka 11 ra laki yaban. Witin win: “Naha sika wîni tara, man nani sut dukiamra yan kabia ba. Naha na yang ra luki, dauki bas”. Baha wina, kap kum ra wain laiki ai disaipilka nani ra yaban ningkara win: “Naha kapka na sika lâ raya daukan ba yang tâilia mita, bara sut dukiamra laiwi ba” (Luk 22:19, 20).

Baha tihmika ra Jisas ai apastilka nani ra diara tânka manis smalkan. Lâ raya kum witin nani ra yaban: pana pana latwan kaikaia kan. Jisas win: “Man nani pana pana walkam ra latwan kaikisma kaka, upla sut kaikbia man nani ba yang disaipilki nani sma”(Jan 13:34, 35). Jisas ai apastilka nani ra win sari takbia apia witin ra dîa takbia ba dukiara. Baha wina Jisas witin nani dukiara ai pura sunan. Ningkara, lawana nani Gâd dukiara aiwanan bara Getsemani giadinka ra wan.

Baha pliska ra Jisas ai lula kriki Jehova ra ai pura sunan. Ban wina suldawa daknika kum balan, war aiklabaia dukia manis bri kan. Baku sin, prîs nani balan Jisas ra priski brih waia. Jisas ya sapa nu takaia dukiara, Judas Jisas ra kiawalan. Suldawa nani ba Jisas ra priskan, bara apastil nani ba taki plapan.

Ju wihtika nani mawanra Jisas win witin ba Gâd Luhpia kan. Wihta nani ba win Jisas kunin tara kum aisi kan. Baha mita, pruaia kan. Baha wina Pailat mawanra brih wan. Naha waitnika ba Rom tâ uplika kum kan. Witin mapara Jisas pâtkas kan, sakuna upla nani Jisas ra ikbia makabi kan ba bîla walan.

Jisas ra plis kum ra brih wan, ai nina Golgota mâki ba. Bahara Rom suldawika nani mita dus kum ra saban. Ban wina, yu lapta ingnika ba tihmia takan. Jisas pruan tutnika ra tasba nikbanka tara kum takan. Jisas wîna tara ba tasba untika kum ra bikan bara yauhkika kan taim, prîs nani ba untika ba prakan bara suldawa nani swin main kaikbia dukiara. ¿Jisas baha pliska wina takaia sip apia kan ki? Apia pali. Baha yua ra sain kau pranakira ba mahka takaia kan.

(Matiu 26 bara 27, Mark 14 bara 15, Luk 22 bara 23 bara Jan 12 wina 19 wina sakan sa.)