Tasba na kli paradais kum takbia

BAIBIL bukka lâs ba sika Param Marikanka bara bîla kaikanka lâka wankisa. Apastil Jan naha bukka ba ulban, bara prapit aisanka manis brisa. Baku sin Gâd nahki ai kupia lâka daukbia wan marikisa.

Pas prapit aisanka ra, Jisas pruan wina buan ba, kangrigisan nani ra kupia bukisa bara smalkisa. Prapit aisanka wala ra wan marikisa Gâd iwaika pliska bara spirit uplika nani ba Jehova ra mayunisa.

Gâd kupia lâka daukaia lamara sa piua ra, Sîp Luhpia (Jisas Kraist) ba wauhkataya kum brisa bara naha ba sîl 7 brisa. Sîlka nani 4 kwâkuya taim, aras nani uli waitnika 4 takisa. Pas waitnika ba sika Jisas. Witin ba King baku mangkan sa bara aras pihni kum purara ulisa. Baha wina, waitnika yumhpa wala nani ba kalatka sât sât brisa. Naha nani ba tânka sa war aiklabanka, plun wahwanka, siknis nani sin. Naha sut ba naiwa piua nani ra kau kaikisa, kan tnata yua ba lamara sa. Sîl numba 7 kwâkan taim, trumpit binka nani aima 7 puhban ba walisa. Naha tânka sa Gâd lâka nani daukbia ba. Naha nani ba wina klala 7, apia kaka Gâd lawanka 7 ba takan sa.

Ningkara, Jan ba tuktan lupia kum aisubi takan ba kaikisa. Naha ba Gâd Kingka lâka ba heven ra tâ krikan ba tânka sa. Baha wina, war aiklabanka kum takan, Sitan ai lasika aikuki heven wina kangbi sakisa bara naha tasba ra lulkan. Baha wina, bîla baikra kum walisa: “Tasba ra iwi nani ba mapara alai pali kabia”. ¿Dîa muni? Kan Dibil ai kupia baikan sa piu wiria baman brisa bamna (Param Marikanka 12:12).

Jisas sîp luhpia kum baku heven ra takisa bara witin wal upla 144.000 bâra sa bara ‘witin wal aimaki kabia’. Param Marikanka ra yawan lan takisa naha uplika nani pramis munan balaia kiamka tilara sa bara upla 144.000 banhwisa (Param Marikanka 14:1; 20:6).

Baha wina, tasba gabamintka nani ba Armagedan dukiara asla takisa, naha sika ‘Gâd witinka karnika sut bri ba war aiklabanka’. Baku sin, tasba gabamintka nani ba Jisas aras pihni purara uli bara insal nani mapara buisa. ¿Ya nani win takisa? Tasba gabamintka nani ba war aiklabanka ba lus tiwisa bara Sitan ra priskisa. Jisas bara 144.000 uplika nani wal tasba ra 1.000 mani king aimakbia, bara naha piua danh takbia taim, Sitan sin sauhki tikan kabia (Param Marikanka 16:14; 20:4).

¿Jisas 1.000 mani king aimakbia piua ra, upla nani dukiara dîa daukbia? Jan ansika wankisa: “[Jehova] witin nani nakra laya ba sut dikbia, bara prura kau âpu kabia, inanka, pura mata inaia lâka, latwanka sin; kan diara almuk nani ba sut lui wan sa” (Param Marikanka 21:4). ¡Rait pali tasba na paradais kum takbia!

Baku natka ra, Param Marikanka bukka ba Baibil ulbanka lalka wankisa: Misaya Kingka lâka bâk Jehova ai nina ba holikira daukbia, bara marikbia Witin baman ai raitka brisa king aimakaia.

(Param Marikanka wina sakan sa.)