¿Nahki muni Gâd lamara waia sip sa?

1. ¿Gâd pura sunra nani sut ba walisa ki?

Gâd nisan sut ra paiwisa Witin lamara bal ai pura sunbia (Lawana 65:2). Sakuna, Witin ba pura sunra nani sut ba walras bara pain sin kaikras. Sampla baku, waitna kum ai maya ra saura munisa kaka, ai pura sunra ba walbia apia (1 Pita 3:7). Baku sin, Israel uplika nani diara saura nani ban dauki kan taim, Gâd ai pura sunra ba walras kan. Param sa, wan pura sunaia lâka ba kulkanka tara brisa. Sakuna, upla saurka lâka tara dauki kabia sin, Gâd ai pura sunra ba walaia sip sa ai kupia lakbia kaka. Aiseya 1:15 bara 55:7 aisi kaiks.

2. ¿Nahki natka ra wan pura sunaia sa?

Wan pura sunaia ba Jehova ra mayuni ba natka kum sa. Baha mita, Witin ra baman wan pura sunaia sa (Matiu 4:10; 6:9). Yawan saurka luha apia ba mita, Jisas nina ra wan pura sunaia sa, kan witin wan saurka dukiara pruan (Jan 14:6). Jehova want apia sa yawan sim bîla aisi, apia kaka wauhtaya kum aisi kaiki baku wan pura sunbia. Witin want sa wan kupia aiska wina daukbia. Matiu 6:7 bara Pilipai 4:6, 7 aisi kaiks.

Wan Papaskra ba wan pura sunra nani walaia sip sa, wan kupia wina aisi dauki kabia sin (1 Samuil 1:12, 13). Jehova wan paiwisa piu bani ra wan pura sunaia, titan bara tihmia ra, plun piaia piua ra, bara trabil nani brisa taim. Lawana 55:22 bara Matiu 15:36 aisi kaiks.

3. Aidrubanka nani ba, ¿nahki hilp wan munisa Jehova lamara kaia?

Jehova lamara waia isi apia sa, kan yawan Gâd ra kasak lukras uplika nani tilara iwisa. Sakuna, baha sât uplika nani Gâd kupia kumi lâka naha tasba ra brih balaia pramis munan ba dukiara lawaska kikisa (2 Timoti 3:1, 4; 2 Pita 3:3, 13). Baha mita, muihni lakri wala aikuki taim luaia sa, baku pana pana wan tâ baiki wan kupia bukbia. Hibru Nani 10:24, 25 aisi kaiks.

Gâd ra latwan kaiki uplika nani wal taukisa taim, hilp wan munisa Gâd lamara waia. Jehova Witniska aidrubanka nani ba sanska painkira wankisa muihni lakri wala kasakka lukan lâka ba wina yamnika sakaia. Roman 1:11, 12 aisi kaiks.

4. ¿Man nahki sip sma Gâd lamara waia?

Baibil wina dîa lan takram ba ra luki kaiki baman Gâd lamara waia sip sma. Luki kaiks Witin paskanka nani, smalkanka, bara Ai pramiska nani wina dîa lan takaia sip sma. Yawan bahara luki kaiki wan pura sunisa kaka, hilp wan munbia Gâd latwanka lâka bara sinska lâka nahki tara ba kaikaia. Jasua 1:8 bara Lawana 1:1-3 aisi kaiks.

Gâd ra kasak lukisma kaka baman, Witin lamara waia sip sma. Bara kasak lukan lâka ba, sim upla kum ai rayaka bri ba baku sa. Ai wîna tara pain kabia dukiara, yu bani plun piaia nit sa. Baha mita, yawan dîa lan takan ba wan kasakka lukan lâka tâ baiki ba yu bani laki kaikaia sa. Matiu 4:4 bara Hibru Nani 11:1, 6 aisi kaiks.

5. ¿Gâd lamara kaia ba wina dîa yamnika sâkbia?

Ya uplika Jehova ra latwan kaiki ba Witin main kaikisa. Jehova karnika brisa dîa sât trabilka saura nani wan kasakka lukan lâka bara raya ban kaia ra iwaia bîla kaikanka bri ba sauhkaia sip ba wina wan kan kahbaia (Lawana 91:1, 2, 7-10). Daukanka kum kum ba wan wîna tara bara wan liliaka lâka ba trabil ra wan dingkaia sip ba wina Jehova wan kupia kraukisa. Witin iwaia natka kau pain ba wan marikisa. Lawana 73:27, 28 bara Jems 4:4, 8.