¿Man sibrin sma bara yakan damra walisma kaka dîa daukaia sip sma?

Lilka ra tuktika ba kaiks. Yakan sa an sirang iwan sa talia ¿rait apia? ¿Man piu kum si briram sa ki?... Yawan ra sin baku takan sa. Baibil wisa Gâd pânika nani ba kat sin sibrin kan, bara yakan ai dara wali kan. Tila wina kum ba Ilayas kan. Kaisa laki kaikaia dîa takan ba.

Ilayas ba patitara piua ra Israel ra iwi kan, Jisas kau aisubi takras kainara. Ahab Israel kingka ba, Jehova Gâd kasakkira ba ra, mayunras kan. Witin bara ai maya Jezabel, Baal ra mayuni kan, gâd bahki kum ba. Ba mita Israel uplika aihkika ba sin Baal ra mayuni kan. Kwin Jezabel ba uba saura kan, upla sut Jehova ra mayuni kan nani ra ikaia want kan. Bara Ilayas Jehova ra mayuni kan na ra, ¡witin ra sin ikaia want kan! ¿Ilayas dîa daukaia sip kan? ¿Man kapram kaka dîa daukma?...

¡Witin uba laihura wan! Upla iwras tasbaya ra plapan bara walpa untika kum ra yukuwan. ¿Dîa muni yukuwan?... Kan sibrin kan. Kuna sibrin lukaia apia kan. ¿Dîa muni? Witin nu kan Gâd ba witin ra hilp munbia. Kainara pat daukan kan. Yu kum Ilayas ba witin ra ai pura sunan. Gâd walan, ba mita kasbrika wina pauta klauhan blikan. Jehova uba karnakira sa ¿rait apia? Âu sika. ¡Ba mita Ilayas sip kan kasak lukaia!

Ilayas ba walpa untika ra kan taim, Jehova witin ra walan: “¿Dîa muni nâra sma?”. Ilayas pana win: “Kainara upla ailal bîlam wali kan, kuna nanara yang baman daukisna. Bara yang ra sin ai ikbia sibrin brisna”. Witin lukan Gâd dukia dadaukra nani sut ra ikan kan. Kuna Jehova pana win: “Apia, man baman apia sma. Upla 7000 bâra sa yang ra kau ai mayuni ba. Si bripara, kan wark kum brisna man dukiamra”. Gâd baha win taim, ¿Ilayas nahki ai dara walan?... ¡Uba lilia ai dara walan kaia sa!

Ilayas ra dîa takan ba dukiara luks. ¿Yawan dîa lan takisa?... Sam taim man yakan damra walaia sip sma apia kaka sibrin kaia. Baku sa taim, ¿dîa lukaia sip sma? Man yakan apia sma ba, kan pâna ailal brisma Jehova ra latwan kaiki ba, bara man ra sin. Bara amya tikpara Jehova uba karnika brisa bara piua bani hilp mai munbia. Diara pranakira sa baha nu takaia ¿rait apia?...