Jisas ba piua sut ra bîla wali kan

¿Papa bara mama bîla walaia ba, ban isi sa ki?... Sam taim karna sa, ¿rait apia? Sakuna, ¿nu sma dîa hilp mai munaia sip sa? Jisas daukan ba baku daukaia. ¿Nu kapram witin ba piua bani Jehova bara ai aisika nani bîla walan?... Kaisa Jisas dukiara kau lan takaia.

Jisas tasba ra kau balras kan taim, witin ba ai Aisika Jehova wal heven ra kan. Kuna tasba ra balan taim, Jisas ba aisa bara yapti sin kum bri kan. Witin nani ba Josep bara Meri kan. ¿Nahki witin nani Jisas aisika takan ba, nu takan mai daukisa?...

Jisas naha tasba ra aisubi takbia dukiara, Jehova sain kum daukan. Jisas heven ra kan, bara Jehova Jisas rayaka ba brih, Meri biara ra mangkan. Kati 9 tilara, ai yapti biara bilara pâwan, sim bibi nani ra taki ba baku, ningkara aisubi takan. Baku tnatka ra Meri, ai bibika baikan. Witin bara Josep wal Jisas ra pakan.

Jisas 12 mani bri kan taim, ai Aisika Jehova ra uba latwan kaiki kan ba diara kum wal marikan. Naha ba takan Jisas bara ai pamalika ba Jerusalem ra laihura impakan taim. Bahara Jehova ra mayunaia wan kan. Mahka utla ra kli auya kan taim, Josep Meri wal ai tânka brin Jisas ba witin nani wal waras kan ba. ¡Plis kumi sin ra sakras kan! ¿Josep Meri wal dîa daukan lukisma?...

Witin nani isti muni Jerusalem ra kli tawi wan Jisas ra pliki sakaia. Yu yumhpa ra plis sut ra plikan. ¡Witin nani uba sari kan! Kuna las kat sakan. ¿Nu sma ani ra kan?... Tempel ra. ¿Dîa muni bâra kan? Kan baha pliska ra Jehova dukiara diara ailal lan takaia sip kan. Jisas ba Jehova ra uba latwan kaiki kan ba mita want kan witin kupia lilia daukaia. Jisas kau pâwi almuk takan taim, ban Jehova bîla wali kan, kuna isi apia kan. Upla kum kum witin ra saura munan ba mita. ¿Jisas ba Josep bara Meri ra sin, bîla walan lukisma?... Âu, Baibil wisa, witin ba baku daukan.

¿Kaikram Jisas ba piua sut ra bîla walan?... Baha ba diara tara kum wan smalkisa: Papa bara mama bîla walaia sma, isi apia kabia sin. ¿Man baha daukma?...