¿Ya nani ba Jisas sturka dukiara ulban?

Lilka ra waitna nani bâra ba kaiks. Witin nani ba Matiu, Mark, Luk, Jan, Pita, Jems, Judas bara Pal. Witin nani sut Jisas taimka ra iwi kan, bara witin sturka ba dukiara Baibil wauhkataya nani ra ulban. ¿Naha waitnika nani dukiara kau nu takaia want sma?...

Witin nani tilara, yumhpa ba Jisas wal pâna kau pain kan an witin wal smalkan. Witin nani ba apastil Matiu, Jan bara Pita kan. ¿Lilka ra mihtam wal kulkaia sip sma?... Matiu Jisas rayaka sturka dukiara buk kum ulban, an Jan sin. Bara Jan, Ribilisan (Param Marikan) bukka ba ulban bara wauhtaya yumhpa sin, naha nina nani bri kan Pas Jan, Sekan Jan bara Jan ulban Yumhpika ba. Apastil Pita ba wauhtaya wâl ulban: Pas bara Sekan Pita ba. Sekan wauhkataya ra, Pita ba diara painkira kum dukiara aisisa. Heven wina Jehova Jisas ra aisan ba witin walan: “Naha sika yang luhpi, witin ra uba latwan kaikisna bara witin dukiara uba lilia sna”.

Lilka ra waitna wala nani taki ba sin Jisas dukiara ulban. Tila wina kum ba Mark. Mebe kra, Jisas ra priski alkan taim, witin ba kaikan. Wala ba Luk. Witin ba daktar kan, bara Jisas pruan ningkara kristian takan talia sa, apia kaka Jisas disaipilka.

Jisas muihnika sirpi nani tilara, wâl ba witin dukiara sin ulban. ¿Nu sma ya nani kan?... Lilka ra takisa, Jems bara Judas nina bri kan. Tâura Jisas smalkanka ra kasak lukras kan. ¡Jisas ba wira grisi takan lukan! Kuna ningkara witin ra kasak lukan bara ai disaipilka nani takan.

Nanara Pal ba dukiara aisabia. ¿Lilka ra kaikisma? Kau kristian takras kainara Saulo nina mâki kan. Witin kristian nani ra misbara kaiki bara saura muni kan. ¿Nahki Jisas disaipilka takan ba nu takaia want sma?... Yu kum, yabal ra impaki auya kan taim, heven wina bîla baikra kum witin ra aisan. ¿Ya witin ra aisan? ¡Jisas pali kan! Bara witin ra makabi walan: “¿Dîa muni yang ra kasak ai luki uplika nani ra uba saura munisma ki?”. Pal nu takan chens takaia kan ba, ba mita kristian takan. Piua luan ningkara, Baibil bukka 14 ulban, Roman wauhkataya wina Hibru Nani wauhkataya ba kat.

¿Yawan yu bani Baibil aisi kaikaia want sa rait apia?... Bahara Jisas sturka dukiara ailal aisisa. ¿Rait apia kau lan takaia want sma witin dukiara?...