King Lâka kum tasba aiska ra king aimakbia

Tisku pali king lâka kum tasba aiska ra aimakbia. ¿Nu takaia want sma ani sa?... Gâd Kingka Lâka ba. Tasba ba paradais kum ra daukbia, plis painkira kum kabia. ¿Naha Kingka Lâka dukiara kau nu takaia want sma ki?...

Pas ba, ¿king kum ba dîa sa? Gabamint tâ bri uplika kum sa. Gâd Kingka Lâka ba king kum brisa. ¿Witin ba ya sa?... ¡Jisas sika! Witin ba heven ra sa, bara tisku tasba aiska ra king aimakbia. Kuna ¿Jisas ba king pain kum kabia ki? ¿Yawan lilia kabia witin ba tasba ra king aimakbia taim?...

¡Âu sika! Tasba ba paradais kum kabia taim, war aiklabanka nani âpu kabia. ¡Upla nani ba war aiklabia apia! Upla kumi sin siknis taki prubia apia. Blain nani ba sip kabia kaikaia, bara upla sip walras nani ba walbia. Upla nani sip wapras nani ba wapbia bara srutwaia sip kabia. Upla nani sut diara pain pibia. Daiwan nani sin aiklabia apia, bara yawan witin nani wal pulaia sip kabia. Bara diara wala sin: upla ailal pruan wina kli bubia. Baha tânka sa Rebeca, Rahab, Debit, Ilayas bara upla kau ailal pruan wina kli bubia. ¿Rait apia witin nani ra kakaira takaia want sma?...

Jehova latwan mai kaikisa bara witin want sa man lilia kama. Witin dukiara lan taks bara dîa mai smalki ba bîla wals. Daukma kaka, ban kaia ra iwma. ¿Paradais ra iwaia want sma?...