SMALKANKA 07
¿Yawan nahki sip sa Jehova ra kakaira takaia?
Man Jehova dukiara lukisma taim, ¿witin nahki sa lukisma? ¿Gâd ba kulkanka tara bri ba mita man wal sip asla takras lukisma, slilma nani ra man sip lamara waras baku? ¿Apia kaka, diara karnakira tara sim alwani karnika ba baku sa? ¿Rait pali Jehova nahki sa ki? Baibil ba Jehova daukanka yamni nani ba wan wisa, baku sin witin nahki mai luki ba marikisa.
1. ¿Dîa muni Gâd ra wan nakra ni yawan sip kaikras?
“Gâd ba Spirit sika” (Jan 4:24). Jehova yawan baku apia sa, wîna tara bara dusa sin âpu. Witin spirit kum sa heven ra iwi ba, baha pliska sin wan nakra ni yawan sip kaikras.
2. ¿Jehova daukanka painkira kum kum bri ba ani sa ki?
Yawan ba Jehova ra sip kaikras sakuna, witin ra kakaira takisa taim latwan kaikisa, kan witin ba daukanka painkira brisa. Baibil wisa: Jehova “kasakka lâka ba latwan kaikisa, ai uplika kasak nani ba sin lulki swiras” (Lawana Nani 37:28). Baku sin, witin “lika kupia swapni bara sin pihni pali sa”, kau ni upla pât wahwi nani wal (Jems 5:11). “Kupia lukra kriwan bara bîla kaikanka sin âpu takan uplika ba lamara Dawan [Jehova] bâra sa, witin baha uplika nani ba swaki sakaia dukiara” (Lawana Nani 34:18). Bara, ¿nu kapram ki yawan dîa dauki ba wal sip sa Jehova sarka paskaia, apia kaka ai kupia lilia daukaia? Ani uplika saura daukbia kaka, Jehova kupia kriki sarka paskbia (Lawana Nani 78:40, 41). Sakuna ani uplika diara yamni daukbia ba Jehova kupia lilia daukbia (Sins Lâka 27:11).
3. ¿Jehova nahki marikisa latwan wan kaiki ba?
Jehova daukanka painkira kau tara ba sika latwan lâka ba. Baha mita, Baibil wisa “Gâd ba latwan lâka sa” (1 Jan 4:8). Baibil ra Jehova ai latwanka lâka ba wan marikisa, bara diara paskan ba wal sin (Apastil Nani Sturka 14:17 aisi kaikma). Nahki kasak pain wan paskan ba dukiara luks. Yawan kalat sât sât painkira kaikaia sip sa, miusik painkira walaia, bara plun auhni sin piaia. Witin want sa wan rayaka ba lilia kabia.
KAU LAN TAKS
Kaisa kaikaia Jehova nahki diara tara prana daukisa. Baku sin, witin ai daukanka painkira nani nahki wan mariki ba laki kaikbia.
4. Spirit holikira ba Gâd karnika aiawi ba
Yawan wan mihta yus munisa wark daukaia dukiara, sakuna Jehova ai spiritka holikira ba yus munisa. Baibil wiras spirit holikira ba Gâd sa, kau ni Gâd karnika sa, witin diara sut daukaia yus muni ba. Luk 11:13 bara Apastil Nani Sturka 2:17 aisi kaikma, bara naha dukiara aisi banhma:
Gâd ba ai spiritka holikira ba ani uplika makabia kaka yabia. Baha mita, ¿man dîa lukisma, spirit holikira ba Gâd sa ki, apia kaka witin karnika sa? ¿Dîa muni baku lukisma?
Jehova ai spiritka holikira wal diara prana tara daukisa. Lawana Nani 33:6 bara 2 Pita 1:20, 21 aisi kaikma, bara naha dukiara aisi banhma:
¿Nahki tnatka ra Jehova ai spiritka holikira ba yus munan sa?
5. Jehova daukanka painkira nani ba yawan kaikaia sip sa
Moses ba upla kasakkira baku Gâd kupia lâka daukan. Baku kan kuna, witin Papaskrika ba ra kau kakaira takaia want kan. Baha mita, Moses Jehova ra win: “Warkkam daukaia tânka brisma ba mairiks. Baku mika, yang bui man ra kasak lukamna” (Impakan Sturka 33:13). Jehova pana ai daukanka painkira nani ba Moses ra win. Impakan Sturka 34:4-6 aisi kaikma, bara naha dukiara aisi banhma:
¿Ani daukanka painkira nani ba Jehova bui Moses ra win?
¿Jehova daukanka painkira nani ba wina ani kau painkira kaikisma?
6. Jehova upla dîa nit ba dukiara lukisa
Hibru uplika nani ba patitara piua ra Gâd uplika nani kan ba, Idsip tasbaya ra alba kan. Witin nani pât wahwi kan ba kaiki, ¿Jehova nahki ai dara walan? WALAIA DUKIARA sturka ba walma bara Baibil aisi kaikanka ba aisi kaikma, apia kaka Impakan Sturka 3:1-10 baman aisi kaiki banhma. Baha wina naha dukiara aisi banhma:
Jehova upla nani pât wahwi ba kaiki sari ai dara wali ba dukiara, ¿man dîa lan takisma? (Bors 7 bara 8 ba kaikma).
¿Man lukisma Jehova rait pali upla nani ra hilp munaia want sa? ¿Witin upla nani hilp munaia sip sa lukisma? ¿Dîa muni man baku lukisma?
7. Jehova diara sut paskan ba ra ai daukanka painkira nani kaikaia sip sa
Jehova ai daukanka painkira nani ba witin diara paskan bâk wan marikisa. LILKA ba kaikma. Ningkara Roman 1:20 aisi kaikma, bara naha dukiara aisi banhma:
¿Paskanka ra Jehova daukanka painkira nani ba kaikisma?
UPLA KUM KUM NAKU LUKISA: “Gâd ba karnika kum sa plis sut ra sa, sakuna witin ra kakaira takras sa”.
¿Man dîa lukisma?
¿Dîa muni baku lukisma?
DÎA LAN TAKRAM
Jehova spirit sika, baha mita wan nakra ni witin ra sip kaikras. Witin daukanka painkira nani brisa, baha tilara latwan lâka ba kau tara sa.
Wan kupia krawaia
¿Dîa muni wan nakra ni Jehova ra sip kaikras?
¿Spirit holikira ba dîa sa ki?
¿Jehova ani daukanka painkira nani brisa?
KAU PLIKI KAIKS
Jehova ai daukanka painkira bri ba kaiki witin ra kau kakaira taks.
“¿Yawan nahki sip sa Gâd ra kakaira takaia?” (La Atalaya núm. 1, 2019)
Yawan nahki nu sa Jehova ba plis nani sut ra âpu sa.
“¿Gâd ba plis nani sut ra bâra sa ki? ¿Plis bani ra witin ra kaikaia sip sa ki?” (jw.org ra kaiks)
Nahara kaiks, dîa muni Baibil wisa spirit holikira ba Gâd karnika sa.
Waitna blain kum sip kasak lukras kan Gâd upla nani ra luki ba. Nahara nu taks, dîa muni witin ai lukanka ba chens munan.
“Nanara lika wala nani ra hilp munaia sip sna” (La Atalaya octubre 1, 2015)