¿Nahki kristian nani ba sturi yamni nani ba smalkisa?

Tisku piua ra Jehova mita ai Kingka Lâka bâk upla nani sut trabilka nani ba âpu daukbia. Baha sturka ba yamni pali sa, baha mita upla bani baha tânka briaia sa. Jisas want sa ai nina bliki uplika nani sut ba baha sturka yamni ba upla nani sut ra smalkbia (Matiu 28:19, 20). Baha adarka Jisas yaban ba, ¿nahki muni Jehova witniska nani ba bîla walisa?

1. ¿Naiwa piua ra nahki Matiu 24:14 aisi ba aimakisa?

Jisas ba naika piua dahra aisan: “King Lâka sturka yamni na tasba aiska ra smalkan kabia” (Matiu 24:14). Jehova witniska nani ba liliakira baha smalkaia warkka ba daukisa. ¡Yawan ba tasba aiska ra karna trai munisa bîla aisanka 1.000 kau purkara smalkaia! Naha warkka tara na aitani kat daukaia dukiara karna trai munaia sa. Jehova hilpka tara wal baman daukaia sip sa.

2. ¿Yawan dîa sakripaiska nani daukisa upla sut ra smalkaia dukiara?

Anira upla bâra ba, baha kat yawan wisa. Pas kristianka nani daukan baku, yawan ba “utla wala nani ra sin” smalkisa, utla kumi sin swiras (Sturka Nani 5:42). Yawan ridi taki utla bani ra smalkisa, baha mita mani bani upla milian, milian ra smalkaia sip sa. Sakuna aima manis upla nani ba utla ra apia sa, baha mita anira upla ailal tauki pliska nani ra sin yawan smalkisa. Piua bani yawan chans plikisa upla sut ra Jehova tânka bara ai kupia lâka ba smalkaia.

3. ¿Ya nani mihta ra sa sturi yamni nani smalkaia warkka ba?

Kristian rait aihwa nani sut mihta ra sa sturi yamni nani ba upla ra smalkaia. Smalkaia warkka ba yawan kasak tara kulkisa. Yawan dîa sip ba kat karna trai munisa smalkaia, kan baha wina upla sip sa swak takan lâka ba briaia (1 Timoti 4:16 aisi kaikma). Upla kumi sin lalah mana wankras, kan Baibil bila: “Man nani prisant briram; bamna warkka daukma ba ra mana bripara” (Matiu 10:7, 8). Upla bâra sa wan walras ba. Sakuna smalkaia warkka ba ban yawan daukisa, kan Jehova bîla walisa bara witin ra lilia sakisa.

KAU LAN TAKS

4. Yawan karna trai munisa upla sut ra pliki bara smalkaia

LILKA: Tasba pliska kau laihura ba kat smalkisa (7:33)

• ¿Jehova witniska nani smalkaia warkka dauki ba wina man dîa painkira kaikisma?

Matiu 22:39 bara Roman 10:13-15 aisi kaikma, bara naha dukiara aisi banhma:

• Yawan upla wala ra smalkisa taim, ¿nahki marikisa witin nani ra latwan kaiki ba?

• ¿Smalkaia warkka dauki uplika nani ra Jehova bui nahki kaikisa? (Roman 10:15 ba kaiks).

5. Gâd hilpka wal warkka ba daukisa

Diara ailal wan marikisa Jehova mita smalkaia warkka tâ bri ba. Nueva Zelanda kuntrika ra dîa takan ba kaisa kaikaia. Yu kum titan ra mairin kum Jehova nina mâki ai pura sunan kan, bara makaban upla kum bal witin ra smalkaia. Sim yua tutni kan taim Jehova witnis kum nina Paul, utla utla ra smalki kan bara baha mairka wal turi aisan. Paul wisa “mairka ba ai pura sunan awar yumhpa ningkara ai watla ra wari”.

1 Korint 3:9 aisi kaikma, bara naha dukiara aisi banhma:

• Naha sturka painkira mariki ba baku, ¿yawan nahki nu sa Jehova bui smalkaia warkka ba tâ brisa?

Sturka Nani 1:8 aisi kaikma, bara naha dukiara aisi banhma:

• ¿Dîa muni yawan Jehova hilpka ba nit sa smalkaia warkka daukaia dukiara?

¿Nu kapram ki?

Wik bilara asla aidrubanka nani ra wan wisa nahki upla ra smalkaia. Baha aidrubanka nani ra pat dimram kaka, ¿man dîa lukisma ridi wan dauki ba dukiara?

6. Smalkaia warkka daukaia ba Gâd wina adar kum sa

Pas kristianka nani piua ra, waihla nani ba Jisas nina blablikra nani ra alki takaskaia trai munan. Sakuna baha piua kristianka nani ba “wihta nani mawanra sturi yamni” nani smalkaia warkka ba lâ kat bapan (Pilipai 1:7). Naiwa piua ra sin, Jehova witniska nani ba baku daukisa.a

LILKA: Wihta mawanra lâ kat smalkaia warkka ba bapisa (2:28)

Sturka Nani 5:27-29, 31-42 aisi kaikma, bara naha dukiara aisi banhma:

• ¿Dîa muni yawan smalkaia warkka ba swiras kabia? (bors 29, 38 bara 39 ba kaiks).

DÎA LAN TAKRAM

Jisas bui ai nina blablikra nani ra adar munan nisan nani sut ra sturi yamni nani ba smalkaia. Jehova ai uplika ra hilp munisa baha warkka daukaia.

Wan kupia krawaia

• ¿Tasba aiska ra nahki sturi yamni nani ba smalkisa?

• ¿Smalkaia warkka dauki yawan nahki upla nani ra latwan kaiki ba marikisa?

• ¿Man lukisma smalkaia warkka ba lilia wan sakaia sip sa? ¿Dîa muni baku lukisma?

KAU PLIKI KAIKS

Kaiks nahki Jehova witniska nani ba tawan tara nani ra smalkisa.

París kuntrika tara ra upla ailal tauki pliska ra smalkisa (5:11)

¿Nahki Jehova witniska nani ba hilp munisa war sîa plapan uplika nani ra?

Spirit lâka ra hilp munisa war sîa plapan nani ra (5:59)

Wals nahki lakri mairin kum ba lilia pali sa ai rayaka aiska ra smalkaia warkka kau dauki ba mita.

Lilia sna naha warkka briri ba mita (6:29)

Lan taks nahki lâ watla nani ba chans yaban sa sturi yamni nani ba smalkaia.

“Gâd Kingka Lâka smalki nani ba lâ watla ra wisa” (El Reino de Dios ya está gobernando, sapta 13)