Pamalikam ba lilia kaia sip sa (pîska 1)

Marit takan nani ba ai brinka sa, marit lâka liliaka deka ra ai dara walan baku, ai rayaka aiska ra sin lilia kabia. Bara baku kaia sip sa. Kristian maritka nani ba baha pain nu sa, bara karna wark takisa Baibil dîa wi ba kat daukaia dukiara.

1. ¿Maya waitna ra, Baibil ba dîa smalkanka yabisa?

Jehova maya waitna ra pamali lalka warkka yaban (Epesus 5:23 aisi kaikma). Bara dîa dîa wahbi saki nani ba ai pamalika yamnika dukiara kabia want sa. Baibil ba maya waitna nani ra naku smalkisa: “Mayam mairin ra latwan kaiki kaia sma” (Epesus 5:25). ¿Naha dîa tânka sa? Maya waitna ai maya mairin ra latwan kaikisa kaka, upla mawan ra, bara witin nani yakan sa piua ra sin, latwan lâka marikisa. Ai maya mairin ra kaina kahbisa bara ai nitka nani main kaikaia dukiara, karna wark takisa, ai wîna tara lainka ra, bara nahki ai dara wali ba ra sin lukisa (1 Timoti 5:8). Baha nani sut purkara, ai maya mairin spirit nitka ra luki, hilp munisa (Matiu 4:4). Tânka kum baku, sip sa mayam mairin wal aikuki puram suni, Baibil aisi kaikaia. Maya waitna ba latwan lâka wal ai maya mairin ra main kaikisa kaka, Jehova wal pâna lâka bri ba kau karna takisa (1 Pita 3:7 aisi kaikma).

2. ¿Maya mairin ra, Baibil ba dîa smalkanka yabisa?

Gâd Bîla ba wisa, maya mairin ba “ai maya waitna ra kulkaia sa” (Epesus 5:33). ¿Nahki daukaia sip sa? Sip sa lukaia ai maya waitna daukanka pain nani ra, bara ai pamalika dukiara nahki karna wark taki ba ra sin. Baku sin dîa dîa wahbi saki nani ba tâ baiki, rispik lâka marikaia sip sa. Witin ra yamni muni, witin dukiara pain aisisa, ai maya waitna ba lalukra apia kabia kra sin.

3. ¿Maritkam lâka ba, nahki karna daukaia sip sma?

Marit nani dukiara Baibil ba naku wisa: “Wâl ba ai wîna kumi baku takbia” (Matiu 19:5). Naha tânka ba sika, traika kaikanka nani witin nani ra sait sait ra brih waia sip ba mapara, karna aiklabaia. Baha mita aikuki taim luaia sa. Baku sin nahki ai dara wali ba, bara dîa luki ba, ai kupia kwâki, latwan lâka wal pana pana aisaia sa. Diara sut purkara Jehova bara ai maya ra pas kulkisa. Wâlsut ba aman kaiki taukaia sa, upla wala wal uba lamara, bara uba aikuki taim luaia apia dukiara.

KAU LAN TAKS

4. Maya waitna, mayam mairin ra latwan kaiki main kaiks

LILKA: Maya waitna, mayam mairin ra latwan kaiks, wînam pali ba baku (9:53)

• Maya waitna ba ai maya mairin ra latwan kaiki, luki ba, ¿dîa tnatka nani wal marikaia sip sa?

Kolosi 3:12 aisi kaikma bara naha dukiara aisi banhma:

• Maya waitna ba ai maya mairin ra, ¿nahki tnatka ra naha daukanka nani marikaia sip sa?

5. Maya mairin, mayam waitna ra latwan kaiki rispik muns

Baibil ba smalkisa, maya mairin ba ai maya waitna ra rispik munaia sa, ai maya waitna ba lalukra apia kabia kra sin. 1 Pita 3:1, 2 aisi kaikma bara naha dukiara aisi banhma:

• Mayam waitna ba lalukra apia sa kaka, man want sma witin Jehova kupia lâka daukbia. ¿Ani tnatka ba kau pain sa lukisma: piua bani witin ra smalki kaia, apia kaka daukankam pain nani ba wal rispik lâka mariki, witin kupia alkaia? ¿Dîa muni man baku lukisma?

Maya waitna wihki maya mairin wal aikuki, wahbi sakanka pain nani daukaia sip sa. Âu sika, sam taim sim dukia lukras sa. Baku sa taim, maya mairin ba rispik lâka bara ai kupia swapnikira wal, dîa luki ba aisaia sip sa. Sakuna, ai kupia krauki kaia sa, pamali dukiara dîa pain wahbi sakaia warkka ba Jehova maya waitna ra yaban. Bara maya waitna dîa wahbi saki ba, maya mairin tâ baikbia Jehova want sa. Baku tnatka ra pamali ba lilia kabia. 1 Pita 3:3-5 aisi kaikma bara naha dukiara aisi banhma:

• Maya mairin ai maya waitna ra rispik lâka marikisa taim, ¿Jehova nahki ai dara walisa?

6. Marit nani ba trabil nani pura luaia sip sa

LILKA: Marit nani ba nahki sip sa ai maritka lâka ba karna bapi briaia (5:44)

• ¿Lilkika ra dîa nani marikisa ai maritka lâka ba pain waras kan?

• ¿Dîa nani daukan ai maritka lâka ba kau karna daukaia dukiara?

1 Korint 10:24 bara Kolosi 3:13 aisi kaikma. Tikska nani aisi kaikbia ningkara, kumi bani dukiara naha aisi banhma:

• Marit lâka kau karna daukaia dukiara, ¿nahki naha smalkanka alki daukaia sip sa?

Baibil ba wisa, yawan pana pana kulkaia sa. Baha dukiara nit sa upla wala nani ra latwan lâka bara rispik lâka marikaia. Roman 12:10 aisi kaikma bara naha dukiara aisi banhma:

• ¿Marit nani ba ai maya mita rispik lâka pas marikbia bîla kaikaia sa ki? ¿Dîa muni baku lukisma?

DÎA LAN TAKRAM

Latwan kaiki, rispik lâka mariki, Baibil dîa smalki ba praptis munisa kaka, maya waitna bara maya mairin ba wal lilia kaia sip sa.

Wan kupia krawaia

• ¿Maya waitna ba dîa daukaia sip sa ai maritka lâka lilia kabia dukiara?

• ¿Maya mairin ba dîa daukaia sip sa ai maritka lâka lilia kabia dukiara?

• Man marit sma kaka, maritkam lâka kau karna daukaia dukiara, ¿ani smalkanka nani Baibil wina saki ba hilp mai munaia sip sa?

KAU PLIKI KAIKS

Pamalikam lilia kabia dukiara, smalkanka nani kaiks.

Pamalikam ba lilia kaia sip sa (Wauhkataya)

Maritkam lâka ra Gâd Bîla walaia yamnika ba, miusik lilkika kum ra nahki mariki ba kaiks.

Latwan aihwa ba (4:26)

Laki kaiks, mayam waitna wahbi sakanka nani ba rispik munaia dîa tânka sa.

“¿Jehova maya waitna nani ra pliska yaban ba, mairin nani dîa muni rispik munaia sa?” (La Atalaya mayo 15, 2010)

¿Nahki marit kum trabil tara nani bara divors lâka ba pura luan?

Gâd hilpka wal wan maritka lâka swaki sakan (5:14)