SMALKANKA 53
Lilia takaia piua brisma ba Jehova yamni kaikbia
Jehova ba Gâd liliakira kum sa (1 Timoti 1:11). Witin brin daukisa yawan lilia kabia, bara rayaka sin pain kum bribia. Witin want sa wan warkka nani daukbia ningkara, wirâ wan wingka puhbia, bara piua kum saki ris bribia. Yawan naha smalkanka ra kaikbia, nahki tnatka ra liliakira wan taimka pain yus munaia, bara Jehova kupia lilia dauki tnatka ba sin.
1. ¿Nahki lilia takaia wahbi sakisa piua ra, dîa ba wan kupia krauki kaia sa?
¿Lilia takaia wisi dîa daukaia laik sma ki? Upla kum kum laik sa utla ra takaski, buk kum aisi kaiki kaia, miusik wali kaia, so kum kaiki kaia, apia kaka Internet ku diara kaiki kaia. Bara wala nani ba ai pânika nani wal diara dauki kaia want sa, ban kra, kirhbi taukaia, apia kaka awala ra yawi puli kaia laik sa. Dîa sât brinka bri kabia kra sin, dîa wahbi sâkbia ba “Dawan dîa brin dauki ba” ra aman lukaia sa (Epesus 5:10). Yawan baha ba param kaikaia sa. ¿Dîa muni? Kan upla ailal lilia takaia wisi dîa wahbi saki ba, Jehova misbara kaiki dukia nani tilara sa, wibia sa kaka, rau munan lâka, rug lâka bara sukia lâka nani ba (Lawana Nani 11:5 aisi kaikma). ¿Pain wahbi sakaia dukiara, dîa ba hilp wan munbia?
Jehova ra latwan kaiki pânika nani yawan wahbi sakisa kaka, witin nani ba hilp wan munbia lilia takaia dukia nani pain wahbi sakaia. Smalkanka 48 ra lan takan baku, “sinskira nani wal tauki bas, bara sinskira kama”. Tani wala ra, Jehova ra kulkras nani wal taukisma kaka, “mai sauhki mai tikbia” (Sins Lâka 13:20).
2. ¿Dîa muni aitani sa lilia takaia piua ba pitka kat mangki bri kaia?
Yawan lilia taki tnatka nani ba pain kabia sin, wan taimka uya tikbia apia aman kaikaia sa. Kan baku daukras kaka, diara nani kau tânka tara bri ba daukaia pliska âpu kabia. Baibil wan kupia bukisa “piua brisma na pain yus muni bas” (Epesus 5:15, 16 aisi kaikma).
KAU LAN TAKS
Lilia takaisa piua ra, pain wahbi sakaia dukiara dîa daukaia sip sa sapa laki kaikbia.
3. Lilia takaia dukia saura nani wina sait ra kap
¿Dîa muni wahbi sakaia lan kaia sa? LILKA ba kaikma bara naha dukiara aisi banhma:
Patitara aiklabanka nani kaiki, upla nani lilia taki kan baku, ¿naiwa piua ra lilia takaia tnatka kum kum wal nahki ai talia sa?
Lilkika ra, ¿lilia takaia tnatka nani dukiara Danny ba dîa lan takan?
Roman 12:9 aisi kaikma bara naha dukiara aisi banhma:
¿Naha borska na nahki hilp wan munisa lilia takaia dukia nani wahbi sakisa taim?
¿Ani daukanka nani Jehova misbara kaikisa ki? Sins Lâka 6:16, 17 bara Galesha 5:19-21 aisi kaikma. Aisi kaikbia ningkara, tikska kumi bani dukiara naha aisi banhma:
Tikska ra taki daukanka nani tila wina, ¿ani nani ba naiwa piua ra upla kau laik sa?
Lilia takaia dukia nani nahki pain wahbi sakaia
Silp mamkabi wals:
¿Dîa sât sa? ¿Jehova misbara kaiki dukia nani sa ki?
¿Ahkia? ¿Kau tânka tara bri dukia nani daukaia sanska aikras kabia ki?
¿Ya wal? ¿Jehova ra latwan kaikras uplika nani wal uba taim luamna ki?
Trabil wina swakwaia kaka, dîa sip ba kat laihura takaia sa. Baha mita lilia takaia dukia nani saura wan munaia sip ba wina sin laihura kaia sa
4. Taimkam ba pain yus muns
LILKA ba kaikma bara naha dukiara aisi banhma:
Lilkika ra kristian waitnika ba diara saura daukras kan, ¿kuna ai taimka dîa sât yus muni ba nahki witin ra ambuk muni kan?
Pilipai 1:10 aisi kaikma bara naha dukiara aisi banhma:
Lilia takaia wisi piua an wahbi saki bribia laki kaikaia dukiara, ¿naha tikska ba nahki hilp wan munaia sip sa?
5. Lilia takaia dukia sunu nani wahbi sâks
Lilia takaia dukia kum kum ba Jehova pain kaikras, kuna wala ailal bâra ba lika witin laik kaikisa. Bara yawan baha nani wal lilia takaia sip sa. Smasmalkra 8:15 bara Pilipai 4:8 aisi kaikma, bara naha dukiara aisi banhma:
¿Lilia takaia dukia sunu nani tilara, man ani ba laik sma?
Tnatka sunu nani wal yawan lilia takaia sip sa
UPLA KUM KUM NAKU LUKISA: “¿Sukia lâka, rau munan lâka apia kaka rug lâka bri dukia nani wal lilia takaia ba, rait pali saura sa ki? ¡Daukaia ba lika saura sa!”.
¿Man dîa wima?
DÎA LAN TAKRAM
Jehova ai brinka sa, yawan lilia takaia wisi diara sunu nani wahbi saki, lilia kabia.
Wan kupia krawaia
¿Kristian nani ba dîa sât lilia takaia dukia nani wal prawras?
Yawan lilia taki tnatka nani ba uba wan taimka tikbia apia dukiara, ¿dîa muni aman kaikaia sa?
¿Man Jehova kupia lilia dauki tnatka nani wahbi sakaia want sma ki? ¿Dîa muni?
KAU PLIKI KAIKS
¿Lilia takaia tnatka nani wahbi sakaia ba ya mihta ra sa?
Aisi kaiks, lilia taki taimkam pain luaia dukia nani ba nahki pain wahbi sakaia.
“¿Yawan lilia taki tnatka nani ba sunu banhwisa ki?” (La Atalaya octubre 15, 2011)
Kaiks dîa tâwan waitna kum lilia takaia tnatka kum kum lulki swin ba. Ai rayaka sturka “Upla ra misbara kaikaia lâka wina pri takri” ba aisi kaiks.
“Baibil ba upla rayaka chens munisa” (La Atalaya febrero 1, 2010)
Lilia takaia dukia nani sukia lâka wal blakwanka bri ba dukiara, mairin kum nahki sins lâka wal pain wahbi sakan ba wirâ kaiks.