Waitna nani ra sin smalkaia trai munisa
1. King laka warkka ba tawan dia nitka tara bara sa ki?
1 Las yua nani na ra King laka warkka ba kau pawi auya bara, ta bribia wisi waitna nani spirit laka ra aitani pawan kau nit sa (Mark 4:30-32; W.n 20:28; 1 Tim. 3:1-13). Sakuna plis kum kum ra lika, —mairin nani numbika wal praki— waitna nani wiria man King laka maisapahkanka ba alki daukisa. Tasba ra kyamka kum kum lukanka ra, rilidian tanka ba luhpa nani ra smalki pakaia warkka ba, mairin warkka sa lukisa. Maîa waitna bisniska lika apia wisa. Yawan nahki muni sip sa waitna nani kupia nikbaia ai spiritka laka nitka kaiki, yawan asla mayunbia?
2. Pâl, Pita sin waitna nani ra smalkaia trai munan ba mita, dia pain takan?
2 Waitna nani ra smalkaia want sa. Pamali lalka kum tanka kasak ba alki brisa taim, ai pamalika tila wala nani pana sin kasak mayunra ra tauisa. Luki kaiks: Gâd warkka dauki kan tawan silak watla ra dingkan taim, Pâl Sailas wal silak watla main kaiki waitnika kum ra smalkan. Bara dia takan? Waitnika, bara ai watla uplika sut sin tahbi daukan (W.n 16:25-34). Pâl Korint ra smalkan taka, “Krispus, prias watla wihtka ba, ai watla uplika sut aikuki Dawan ra kasak lukan” (W.n 18:8). Jehova Pita ra yus muni Kornilius ra smalkan. Kornilius ba sika, Rom suldawa daknika kaptinka kum “Gâd ra sibrin luki mayuni kan”. Kornilius, ai taya nani, bara ai panika nani sin aikuki aihtabi takan (W.n 10:1-48).
3. Pilip daukan baku, “wihta tara” bara kum ra smalkaia sip sma ki?
3 Waitna nani “wihta” bangwi nani ra smalkaia ba, las ra diara pain takaia sip sa (1 Tim. 2:1, 2). Naha tanka ra yu kum Jehova insalka kum bui Pilip ra win, Itiupia kwinka lalahka main kaiki kan waitna “wihta tara” kum ba ra wih smalkbia. Pilip wan taim, waitnika ba “Aiseya wauhkataya wina aisi kaiki kan” walan, bara Pilip mita mahka Jisas dahra sturka yamni ba tanka marikan. Itiupia wina wihta tara na Jisas disaipelka takan, bara ai tasbaia ra impaki wan taim, sturka yamni smalki wan talia. Bara kwin mairin ra, ai suliarka nani sut ra sin smalkan kaia sa. Uba lilia kan naha nani sut, kan tnatka wala ra sturka na walaia sip apia muni kan (W.n 8:26-39).
4. Nahki muni yabia waitna nani ba sin sturka yamni ba walbia?
4 Nahki witin nani ra sakaia? Waitna nani ba, ai warkka pliska ra kau takaski ba mita, sip sma taimkam ridi daukaia kau wira saiwan, satadi sandi ba, apia kaka pri yua nani ra wih smalkaia? Bisnis dauki pliska nani ra smalkuya taim, sip wan munisa uya ai watla ra takaskras waitnika nani ra smalkaia. Kristian waitna nani ba sin sip sa trai munaia ai warkka panika nani ra aman kaiki smalkaia. Bara utla utla smalkuya taim —kau pali pat pat smalki pliska nani ba ra— kristian waitna nani ba sip sa pamali lalka ba wal aisaia makabaia.
5. Waitna kum Baibil tanka kau nu takan dauk’sa sakbia kaka, kristian mairin kum ba dia daukaia sa ki?
5 Kristian mairin kum waitna kum wal aisi, waitnika ba kau nu takan dauk’sa kaka, mairin ba yakan waitnika ra kli wih kaikaia apia sa. Witin sip sa ai maîa waitna wal, apia kaka Smalki Tataukra wala wal kli waia. Waitnika ba kau pawi auya sa kaka, ban kra kau pain kabia kristian waitna kum bui stadika ba kli wih kaiki kabia swiaia.
6. “Upla kau ailal Kraist ra bribalaia dukyara”, Pâl baku yawan dia daukaia sip sa ki?
6 Tanka walaia want ba pliks. “Upla kau ailal Kraist ra bribalaia dukyara” apastil Pâl ba upla tnatka ba aman luki, dia walaia nit kan ba kat smalkan (1 Kor. 9:19-23). Sim baku, yawan aman luki kaikaia sa waitna kum wal aisi, dia ba ai kupia kau alkaia sip sa. Bara baha kat ridi takaia. Naha tanka ra, lalah trabilka, gabamint pain kum, bara ai pamalika pain pât apu kabia dukyara waitna nani uba lukisa. Baku sin, dia dukyara yawan raya sa, tasba na wal dia takbia, bara diakan panis ba Gâd swin ban takisa tanka ba dukyara sin luki bangwisa. Dia kau luki ba tanka yawan aman luki kaiki smalkbia sa kaka, kau wilin kabia King laka sturka ba walaia (Sins.l 16:23).
7. Maîa waitna lalukra apia kum aidrubanka ra wisa kaka, yawan sut ba nahki help tara kaia sip sa?
7 Maîa waitna lalukra apia nani ra. Kristian mairin daukanka pain ba, ai maîa lalukra apia kupia ra karnika tara brisa. Sakuna kangrigisan ra yawan kumi bani ba sin sip sa help tara kaia (1 Pi. 3:1-4). Maîa waitna lalukra apia kum, ai maîa wal aidrubanka ra auya taim, yamni pana laka ra yawan witin ra wih lakula wiaia ba sip sa ai kupia alkaia. Aidrubanka ra wan ba sika, sip sa marikaia witin tanka kasak ba plikisa, bara ban kra Baibil stadi takaia sin wilin kabia.
8. Kristian waitna nani ba nahki muni sip sa kasak tanka ra luki, maîa waitna lalukra apia kum ra help munaia?
8 Tnatka wala ra sin, maîa waitna kum kum ba, taura spirit tanka aisaia uya laik apia, sakuna kaikram taim, kristian waitna kakaira kum wal lika bahamuna aisaia wilin takisa. Kangrigisan kum ra, rilidian laka mapara tar baiwan kan pamalika kum bara kan, bara kristian waitna kum kum trai munan baha watla ra wih, maîa waitna lalukra apia ba ra dia kau aisaia laik kan ba dahra aisaia trai munan. Witin tawa tawa trai munan spirit tanka nani dukyara sin aisaia. Bara naiwa kat lika lalukra apia kata ba pat aihtabi takan sa. Sturka wala kum ra sin, kristian waitna kum ba, pana laka ra maîa waitna lalukra apia kum ra help munan ai watla kaupinka ba paskaia. Baha pitka kat waitnika ra luki help munan ba mita yaban Baibil stadika kum ta krikan (Gal. 6:10; Pil. 2:4). Man ba kristian waitna kum sma kaka, trai munisma maîa waitna lalukra apia kum ra help munaia?
9. Kristian waitna nani ra kau lan dauki ba wina dia takisa?
9 Kristian waitna nani ra lan dauki. King laka sturka wali, Jehova warkka alki sin dauki waitnika nani ba, sip sa ‘prisant baku yan’ nani ba tilara kaia. Wibia sa kaka, kangrigisan bilara baha almukka nani Jehova uplika tawan ai sinska, ai karnika aiska sin yabi ba kum kaia sip sa (Epe. 4:8; Lawana Nani 68:18). Waitnika nani na sika, sepad kum baku, ai kupia wilinkira ni kangrigisan ba main kaikisa (1 Pi. 5:2, 3). Muihni-lakri sut ra kasak blisin tara kum sa!
10. Ananaias bui Pâl ra help munan ba wina nahki upla ailal yamnika tara sakisa?
10 Luki kaiks: Kristian nani ra rau sasauhkra kan ba wina, Gâd bui Sâl ra blikan “Ju apia uplika nani tilara” smalkbia (Rom 11:13). Baha mita, taura lika Ananaias ba Sâl ra smalkaia want apia ikan. Ban sakuna, Ananaias ba Dawan bila walan, bara ningkara baha rau sasauhkra ba apastil Pâl takan. Bara mani ailal luan wal baku, Pâl smalkan ba wina upla tausin tausin witin ra walan ba help munan. Bara naiwa pyua ba kat sin, Gâd spiritka bak Pâl wauhkataya nani Baibil ra ulbi swin ba wina upla milian milian ai yamnika sakisa (W.n 9:3-19; 2 Tim. 3:16, 17).
11. Dia muni waitna nani ra smalkaia wisi, yawan dia dia sip ba kat daukaia trai munaia sa?
11 Baha mita, waitna nani ra smalkaia wisi dia dia daukaia nit ba, yawan sip ba kat daukaia trai munaia sa. Baku dauki, Jehova bui kasak help wan muni ai blisinka bribia. Kan ai Kingka laka warkka kau pawi wabia dukyara daukisa!