“Man taura smasmalkra kum pain kaia sip sma”
1. Smalki tataukra mairin kum ba dia win?
1 “Wark kum uba lilia bara spirit laka ra yamnika ailal ai sakan ba sat sakaia apia kapri.” Amerika waupasa sait, Chile kuntrika ra smalki tataukra mairin kum nina Kati B. Palm, ta kum wina ta wala kat mani ailal smalki tauki kan ba naku aisan. Baha sat rayaka yamnika ailal saki ba ra luki, bankra upla kum mai wibia: “Man taura smasmalkra kum pain kaia sip sma”.
2. Tanka mariks dia muni spirit warkka nani auyapah laka tara yabisa?
2 Rayaka kum auyapah laka bri ba. Jisas Kraist mapara ai Aisa kupia laka daukaia ba plun kum baku karnika yabi kan (Jan 4:34). Bahamna witin pain nu kan dia aisi kan ai disaipilka nani ra smalki kan taim rait aihwa rayaka ba Jehova warkka dauki wina balisa. Kasak sika, wan rayaka aiska ni Gâd warkka daukisa kaka wan rayaka ba lilia sa. Bara kau upla ra help munaia dukyara wan taimka wan karnika, bara diara sut bri ba yabisa kaka wan liliaka ba kau tara takisa (W.n 20:31, 35).
3. Smalkaia warkka ra kau pyua luisa kaka dia yamnika bribia ki?
3 Baku sin, smalkaia warkka ra kau pyu luisa taim Baibil stadika ta krikaia bara ta briaia sip kabia, baha ba lilia tara wan sakisa. Sakuna upla nani ba walaia laik apia baku damra walisma kaka, kaikma upla nani ba sat wala takisa man smalkaia warkka ra kau lan bara pain aisi daukisma taim. Taura smasmalkra baku mani kum alkma taim Taura Smasmalkra Kulka ra nahki smalkaia ba dukyara lan mai daukbia bara kau pain smalki kama (2 Tim. 2:15). Ban tamra wama kaka, tanka kasak saumukka nani naiwa mangkisma ba yu kum pawi bal takbia (Smas. 11:6).
4. Wahma tyara nani pat ai kulka tnata alki ba dia pali ba laki kaikaia sa ki?
4 Wahma tyara, luki kaiks. Kulkam dimisma ba pat tnata alkisma kaka, kainam dukyara pat luki kaikram sa ki? Nawas kat taimkam ba kul warkka dia sanska maiki ba wal iwisma. Kul prakbia taim baha taimka takbia ba wal diaura yus munma ki? Kampani kum ra rayakam aiska wark takaia watlika ra, dia muni puram suni taura smasmalkra warkka daukaia laki kaikras sma ki? Lan takma ba —upla ai iwanka tnatka sat wala ra smalkaia, trabilkam nani pura luaia, daukankam wapni kaia bara pain aisi upla ra smalkaia— rayakam aiska yamnika brima.
5. Aisa yapti bara kangrigisan ba dia tnaka ra taura smasmalkra warkka ba ta baikaia sip sa ki?
5 Aisa yapti, luhpiam nani ra pyu aiska smalkaia dukyara ta baikisma ki? Luhpiam nani King laka ba taura ai rayaka ra bribia dukyara daukankam bara aisankam pain marikisma ba witin nani ra baha kasak help munbia (Mat. 6:33). Ray, ai kulka tnata mangkan taim taura smasmalkra warka ba alki brin, witin bila: “Yaptiki ba pyu bani luki kan taura smasmalkra warkka ba uba pali auyapah laka sakisa”. Sakuna kangrigisan ba taura smasmalkra warkka kau yamni kaiki ta baiki sa kaka baha warkka daukaia sip kabia. Josep, Ispail kuntrika wina, tanka marikisa: “Kangrigisanki ra taura smasmalkra warkka ra wan taimka aiska dingkaia ba wahma tyara nani mapara kau pain sa luki bangwi kan. Baha warkka dukyara pain aisi kan tawan, bara bakahnu nahki warkka daukaia ba help ai munan taka, maipara kau isi takan baha warkka ta krikaia”.
6. Nawas kat taura smasmalkra warkka daukaia brinkam apia sa kaka dia daukaia sip kama ki?
6 Mina prukanka nani nahki pura luaia. Bankra upla kum wiaia sip sa: “Taura smasmalkra kaia ba kupi bukras sa”, man sin baku lukisma kaka Jehova ra aisas nahki damra walisma bara naku wis: “Yang nu apu sna baha warkka ba daukaia sip kamna sapa, sakuna kupiam laka daukaia want sna” (Lawana 62:8; Sins.l 23:26). Baha wina, Jehova helpka ai Bila ra, ai asla takanka ra sin pliki saks. Taura smasmalkra aihkika nani ba ta krikan taim, ta baiki smasmalkra baku “dauki kaikan” bara uba lilia ai dara walan ba mita pyu aiska warkka dauki tilara dimaia tnatka plikan (Lawana 34:8).
7. Kati bani 70 awar dingkaia makaban ba daukaia sibrin brisma kaka, dia daukaia sip kama ki?
7 Bankra sibrin mai daukisa kati bani ra 70 awar dingkaia makaban ba sip daukras kaia. Smalki tataukra wala sim trabilka bri ba wal dia muni baha nani wal aisaras? (Sins.l 15:22.) Baha wina awar nani daukaia sip sma ba kum kum paski bris. Bankra smalkaia dukyara diara wala nani uba nit apia kan dauki kapram ba wina taim pliki sakaia ba isi pali kaikma (Epe. 5:15, 16).
8. Dia muni pyua kum kum ra wan rayaka laki kaikaia pain sa ki?
8 Rayakam laki kaiks. Wan rayaka ba sat wala takisa baha mita kumi bani yawan wan rayaka laki kaikaia sa. Tanka mariki, kampani wina wark tnata mangkaia baila sma ki? Randi lika kau ai pyua apia kan kampani warkka swin, witin bila: “Baku takri tawan maritki mairin wal taura smasmalkra warkka daukaia sip kapri bara nit pliska kum ra tawi bangwri. Blisin manis briri sa... sakuna sut tila wina kau pain ba sika kupi dara walra kum pain brisna”.
9. Marit nani ba dia pali ba laki kaikaia sa ki?
9 Marit nani kum kum, ai rayaka pain laki kaikisi ai dara walisa, wal sut kampani warkka apia kaka insla warkka pyu aiska daukaia nit pali apia sa. Wel au, pamali nani ba ai iwanka tnatka kau isi daukaia sa, sakuna baha sakripaiska daukbia ba lika bahki ra takasbia apia. Bisi pali, smalkaia warkka ra kau daukaia wisi Jan maritka mairin kampani warkka dauki kan ba swin. Jan ba aisisa: “Diara kau pain ba sika, nu kaia maritki mairin ba yua aiska spirit dukya warkka man daukisa”.
10. Kristian nani ra dia ba kupia bukisa taura smasmalkra warkka ra lukaia?
10 Latwan laka bara kasak lukan laka marikanka. Yawan mapara wark wala kau tara apu sa, smalkaia warkka ba, kan Jehova baku ai brinka sa. Tisku, naha tasba daukanka saura ba sauhki tikan kabia bara ya ai nina maki wini ba baman swaki sakan kabia (Rom 10:13). Yawan sut tawan diara ailal daukan ba mita, wan kupia aiska ni Witin ra tingki yabi bara uba latwan kaikisa kaka, dia ai Luhpia adar yaban ba kat daukbia (Mat. 28:19, 20; 1 Jan 5:3). Tnata yua nani ra iwi ba kasak nu kaia ba sut ra wan kupia bukisa pyu wiria man brisa bamna, tanka aiska ra tasba dukya man yus munaia watlika ra dia sip ba kat kau smalkaia (1 Kor. 7:29-31).
11. Man taura smasmalkra kum pain kaia sip sma mai wibia kaka nahki damra walaia sma ki?
11 Taura smasmalkra warkka daukaia ba wan asla takanka wan paiwi ba mita yawan daukisa tanka baman apia sa, sakuna Jehova ra baman mayuni ba tanka sa. Baha mita, “Man taura smasmalkra kum pain kaia sip sma” upla kum mai wibia kaka, yamnikam ra luki aisan baku luks. Jehova ra puram suns bara laki kaiks naha sat warkka yamnikira wala nani karna wark taki ba tilara dimaia.
[Wahya 4 ulbanka ba]
Aisa yapti, luhpiam nani ra pyu aiska smalkaia dukyara ta baikisma ki?
[Wahya 5 ulbanka ba]
Yawan mapara wark wala kau tara apu sa, smalkaia warkka ba, kan Jehova baku ai brinka sa.