Wan kupia wal aisaia ba: Gâd warkka takaskraskira daukaia help wan munisa
1. Jisas ra dia help munan ai lukanka ba smalkaia warkka ra baman mangkaia?
1 Jisas tutni kum pyua ra upla sikniskira raki kan bara lasa nani kangbi saki kan. Disaipel nani yauhkika wala kat Jisas ra pliki sakan. Bara witin ai warkka aihkakira nani daukbia dukyara disaipel nani Jisas ra bik taki win: “Sut mai plikisa”. Sakuna, Jisas want apia kan sturi yamni nani smalkaia warkka wina upla kum mita ai kupia lakbia. Jisas win: “Kaisa taun wala wan lamara nani bara, sturi yamni ba baha ra sin smalkaia, kan yang baha dukyara balri.” Jisas ra dia help munan ai lukanka ba smalkaia warkka ra baman mangkaia? Witin ai kupia wal aisaia dukyara titan pali bui kan (Mark 1:32-39). Nahki muni wan kupia wal aisaia ba help wan munisa takaskraskira smalki kristianka kum kaia?
2. Smalkaia warkka ra takaskraskira daukaia dukyara, diaura wan kupia wal aisaia sa ki?
2 Diaura wan kupia wal aisaia sa ki? Jisas kaikan upla nani ba “sarikira bara helpkas bangwi kan, syîp nani sepadkas baku” (Mat. 9:36). Sim baku, yawan lukaia sip sa upla nani ba nahki sturi yamni nani ba walaia nit sa. Yawan kau pyu wiria baman bri ba ra lukaia sa (1 Kor. 7:29). Jehova daukanka painkira nani bara ai warkka nani ra sin lukaia sa, baku sin Jehova Witniska kum kaia ba diara tara sa, bara tanka manakira nani yawan Baibil wina lan takan ba ra sin lukaia sa, kan naha tanka nani ba upla ailal yawan smalki pliska ra kau nu apu sa (Lawana 77:11-13; Ais. 43:10-12; Mat. 13:52).
3. Ahkia wan kupia wal aisaia sa ki?
3 Ahkia wan kupia wal aisaia sa ki? Jisas daukan baku, kristian kum kum ai kupia wal aisaia dukyara titan pali buisa. Kristian wala nani tihmia ra kau wih yapras ba ra daukisa (Bla.st 24:63). Yawan wark ailal daukaia bri kabia sin, wan kupia wal aisaia dukyara taim sakaia sa. Kristian kum kum truk bila ra ai warkka ra auya ba ra daukisa. Wala nani ai kupia wal aisaia dukyara plun piaia pyua ra minit kum kum yus munisa. Kristian ailal ba smalkaia warkka ra kau taki waras kainara minit kum kum ra ai kupia wal aisisa, kan naha daukaia ba witin nani ra help munisa takaskraskira bara sîbrin apukira smalkaia.
4. Dia muni wan kupia wal aisaia sa ki?
4 Wan kupia wal aisaia ba help wan munisa Jehova kupia laka kau karna daukaia. Baku sin, spirit laka ra wan lukanka nani ba smalkaia warkka ra baman mangkaia, bara ban smalki kaia dukyara sin help wan munisa. Gâd warkka dadaukra kau tara, Jisas ba, ai kupia wal aisan ba wina, blisinka ailal brin bara yawan sin blisinka ailal bribia.