Pamali yamnika dukyara
1. Satadi yua ba nahki muni pamali nani ra yamni muni kan ki?
1 Satadi yua kulkaia lâka ba, Jehova mita Israel pamalika nani dukyara yamnika tara kum yaban kan. Baha yua ra Israel uplika nani ba ai warkka daukaia watlika ra ris brih bangwi kan, bara Gâd latwanka laka witin nani ra yabi kan ba ra luki kaiki kan, baku sin Jehova wal ai pânika laka kau pain briaia dukyara help muni kan. Aisa yapti nani ra sanska yabi kan ai luhpia nani ra Lâ ba smalkaia (K.smal 6:6, 7). Baku wik bani satadi yua ba Israel uplika ra sanska yabi kan ai spiritka laka ra pawaia.
2. Satadi yua kulkaia lâka, Jehova dukyara dia lan wan daukisa ki?
2 Param sa, nanara Jehova pamali nani ra satadi yua ba kulkbia makabras sa. Sakuna baha lâka ba Jehova dukyara diara kum lan wan daukisa: Witin ba ai uplika spirit laka ra pain kabia dukyara baman lukisa (Ais. 48:17, 18). Bara baha lukanka ba Pamali Mayunra Tihmika tnatka ba wankan sa.
3. Pamali Mayunra Tihmika ba dia muni daukisa ki?
3 Dia muni daukisa ki? Siakwa kati 2009 manka ra, Kangrigisan Baibil Stadika ba, Nahki Smalkaia ba Skulka bara Gâd Warkka Daukaia Aidrubanka dauki ba sim tihmika ra daukaia ta krikan. Baha baku daukan ba ra, bila kaikisa pamali nani ba wik bilara tihmia kum saki aikuki spirit laka ra kau pawaia. Baha mita sim yua Kangrigisan Baibil Stadika bri kan ba, pamali nani ra kupia bukan, sip kaka baha yua pali Pamali Mayunra Tihmika daukbia. Baku sin, Baibil tanka bara pamali nani dia trabilka bri kaka baha yua ra ai auyapah laki kaikaia.
4. Pamali Mayunra Tihmika ba awar kum baman kaia sa ki? Tanka mariks.
4 Kangrigisan Baibil Stadika ra aidrubi kan pyua ra, yawan taim nit kan ridi takaia bara impakaia. Upla kum kum mapara baha aidrubanka ba awar kum baman kaia watlika ra, awar ailal lus tiwi kan. Nanara aidrubanka chens munan mita kau taim ailal bara sa pamali nani ba Jehova ra mayunaia, nanara yawan baha sanska brih Jehova ra mayunaia dukyara nit apia sa awar kum ra baman daukaia. Kau ni, pamali nani ba dia nitka bri ba laki kaiki, pyua an yus munbia ba kaikaia sa.
5. Stadika ba pana pana laki kaikaia sa? Tanka mariks.
5 Stadika ba pana pana laki kaikaia sa? Pamali nani luhpa bri bara luhpa apu nani ba aikuki Baibil tanka laki kaikisa taim, kasak lukan laka ra pana pana help takisa (Rom 1:12). Pamali ba kau asla takisa. Bara Pamali Mayunra Tihmika ra Baibil tanka laki kaikaia ba kau tara kaia sa. Sakuna, pamali bilara kumi bani ba stadi takaia dukyara baha tihmika ba selp taim sakaia sa. Sampla kum, pamali kum tanka kum laki kaikan ningkara, sim pliska ra asla iwi kaia sip sa, sakuna kumi bani ba diara wala stadi takaia sip sa. Ban kra kumi bani ba wauhkataya nani aisi kaikisa, apia kaka aidrubanka aisanka nani ridi dauki kaia. Bara baha yua pamali kum kum tilivisan ba daski swisa.
6. Pamali Mayunra ba dia tnatka ra daukaia sip sa ki?
6 Nahki daukaia? Pamali mayunra daukisa taim, nit apia sa makabi walanka kum ansika yabi ba daukaia. Pamali kum kum ba wik bilara aidrubanka bri ba satka kum aikuki asla daukisa. Baku Pamali Mayunra Tihmika ba kau pain takisa. Witin nani kumi bani dia daukaia ba tnatka nani saki brisa. Sampla kum, pamali aikuki Baibil aisi kaikisa, aidrubanka nani aisanka kum kum laki kaikisa, bara smalkaia warkka ra dia help munaia sip ba dukyara, tanka kum kum laki kaikisa. Wahya 6 bara tanka wala nani takisa.
7. Aisa yapti nani ba nahki Pamali Mayunra lilia kum daukaia sip sa?
7 Pamali Mayunra lilia kum. Luhpa nani ba latwan laka bara auyapah ai dara walisa taim kau pain lan takisa. Bara pyua kum pain kaka, latara pasa pain brih pliska kum ra stadi takaia sip sa. Bara ris briaia want sa kaka sip sa. Pamali kum kum ba aisi dan takbia pyua ra piaia dukyara diara kum ridi brisa. Ban kra aisa yapti nani ba ai luhpia nani dia trabilka kum brisa kaka, taim sakaia nit kabia. Sakuna Pamali Mayunra Tihmika ba yua kum pain apia sa ai luhpia nani ra laui daukaia. Kau pain kabia ai luhpia kum trabil brisa kaka, yu wala witin wal baman kabia taim trabilka dukyara aisaia, baku ai luhpia wala nani mawanra swira paskbia apia. Pamali Mayunra Tihmika ba pyua kum tayat bara aihka daukaia apia sa, baha yua ba lilia kaia sa, kan Gâd liliakira kum ra mayunisa (1 Tim. 1:11).
8, 9. Pamali lalka ba nahki ridi takaia sa ki?
8 Pamali lalka ba nahki ridi takaia sa? Pamali kum kau yamnika brisa pamali lalka ba kaina manas wina Pamali Mayunra Tihmika ra dia aisaia bara nahki kau pain daukaia ridi takisa taim (Sins.l 21:5). Baha mita aitani sa maîa waitna ba baha dukyara ai maîa ra help makabia (Sins.l 15:22). Dia muni pyua kum kum ra luhpiam nani ra makabi walras baha tihmika ra dia daukaia sip sa? Baku daukma kaka, nu takma dia pali luhpiam nani ba kau lukisa bara dia want sa.
9 Pamali Mayunra Tihmika dauki bani pyua ra nit apia kabia aisa ba ridi takaia dukyara taim ailal yus munaia. Pamali nani ba wik bani diara kum sim sat daukaia want sa; baha mita pamali lalka ba nit apia kabia tnatka raya kum daukaia. Ban kra maîa waitna ba pain kaikbia stadika kum dan takbia ningkara ridi takaia, baku spirit laka ra pamali nitka kum bara sa kaka, ai auya tikras sa. Pamali lalka kum kum dia laki kaikbia ba upla sut kaikbia dukyara, wauhtaya kum ra ulbi, ais baks durka ra prakisa. Baha ba pamali mapara lilia bara baha yua ba aihni bila kaikisa, witin nani sin ridi takaia sanska yabisa.
10. Yakan iwi nani ba, dia daukaia sip sa?
10 Yakan iwisna kaka? Upla kum yakan sa kaka sip sa Pamali Mayunra Tihmika ba yakan ai stadika takaia. Wik bilara dia stadika nani daukaia ba, naha nani sa: Baibil aisi kaikaia, asla aidrubanka aisanka nani laki kaikaia, La Atalaya bara ¡Despertad! wauhkataya nani ba sin aisi kaia sa. Muihni lakri nani kum kum ba tanka ba kau pain laki kaikisa. Ban kra yua kum kum ra smalki tataukra kum apia kaka pamali kum ra paiwisa Baibil wina aisanka pain kum laki kaiki lilia luaia.
11, 12. Pamali Mayunra Tihmika daukaia yamnika saki ba dukyara aisas.
11 Pamali mayunra daukaia yamnika nani. Wan kupia aiska ni Gâd kasakkira mayunra ba daukisa kaka Jehova wal kau asla takisa. Baku sin, pamali nani aikuki daukisa taim pamali rayaka kau asla takisa. Naha sat yamnika dukyara, marit kum naku win: “Yawan wal ba taura smasmalkra sa bara luhpa apu, baha mita Pamali Mayunra Tihmika ba liliakira bila kaikisa. Wan maritka laka ba Jehova wal kau asla takisa. Nanara wan stadika yua aula taim titan buisa taim wan kupia kraukisa baha yua dia daukaia sa: Pamali Mayunra laka ba!”
12 Pamali Mayunra Tihmika yua dukyara awarka bara yua kum briaia ba pamali nani uba wark taki bangwi ba ra help munaia sip sa. Yapti kum ai luhpia waitna wal yakan pakisa bara taura smasmalkra warkka dauki ba, naku ulban: “Pamali baku taura wan stadika ba uba daukras kan. Uba swapan kapri ba mita pyu kum kum ra baman dauki kapri. Taim kum sakaia ba karna ai muni kan, baha mita ulbisna tingki maikaia Pamali Mayunra Tihmika ba dukyara. Nanara lika wan stadika ba daukisa bara yamnika nani kaikisa.”
13. Dia ba pamali nani ra help munbia yamnika sakaia?
13 Satadi yua kulkaia lâka kata baku, Pamali Mayunra Tihmika ba wan Aisa heven ra ba prisantka kum sa bara pamali nani sut ra yamni munisa (Jems. 1:17). Blasi pyua ra pamali bani satadi yua pain yus muni kan ba spirit laka ra yamnika tara bri kan. Naiwa pyua ra sin, Pamali Mayunra Tihmika daukbia kaka, yamnika ailal bribia (2 Kor. 9:6; Gal. 6:7, 8; Kol. 3:23, 24). Naha tihmika ba pamalikam wal pain yus munma kaka, lawana aîulbra kum lukan baku damra walma: “Sakuna yang lika Dawan lamara wamna baha ba kau pain sa, yang maipara. Man, Dawan Gâd man sika yang yukuwaika aihwa sma ba” (Lawana 73:28).
[Wahya 5 Lilkika ba]
Pamali Mayunra Tihmika ba pyua kum tayat bara aihka daukaia apia sa, baha yua ba lilia kaia sa, kan Gâd liliakira kum ra mayunisa
[Wahya 6 Lilkika ba]
YUS MUNAIA DUKYARA
Pamali Mayunra Tihmika ra dia daukaia
Baibil:
• Baibil aisi kaikanka wik bani dauki ba piska kum aisi kaikaia. Ulbanka ba, takan sturka kum baku daukaia sip sa kaka, pamali tila wina kum sturka ba aisi kaikaia sip sa bara wala nani sturka uplika nani dia aisi ba aisi kaikbia.
• Baibil sturka kum pulanka kum baku daukaia.
• Baibil wina saptika kum sakbia ba kaina manis ul aisi kaikaia sa, bara kumi bani makabi walanka kum apia kaka wal ulbaia sa dia aisi kaikan ba wina. Ningkara aikuki ansika nani ba pliki sakaia.
• Wik bani Baibil tikska kum wauhtaya lupia kum ra ulbaia bara trai kaikaia sa wan sinska ra mangki briaia baha wina tanka ba smalkaia. Wauhkataya lupia nani ba apahki brih, wik bani saki laki kaikaia wan kupia kraukisa sapa.
• Baibil tikska nani grabar munan ba walaia bara Baibil mihtam ra brih aisi kaikaia.
Aidrubanka nani:
• Aidrubanka kum kum stadi takaia.
• Wik wala dukyara lawana nani yus munai ba praptis munaia.
• Pamali tilara ya Nahki Smalkaia ba Skulka ra aisanka kum brisa bara Gâd Warkka Daukaia Aidrubanka ra marikanka brisa kaka, nahki daukaia ba tnatka nani pamali mawan ra marikaia sip sa.
Pamali nitka nani:
• Los jóvenes preguntan bukka nani, bara Aprendamos del Gran Maestro bukka wina tanka kum kum marikaia.
• Skul watla ra dia trabilka nani briaia sip ba dukyara bara nahki pura luaia ba dukyara marikanka nani daukaia.
• Sampla kum, luhpa nani ba aisa baku pulisa bara aisa nani ba luhpa baku takisa. Bara luhpa nani ba tanka kum ridi daukisa bara ai aisika ra smalkisa.
Smalkaia warkka:
• Wik tnata ra upla ra nahki aisaia ba tnatka nani praptis munaia.
• Pamali ba Jisas Pruan Kupia Kraukanka bara bakisan pyua ra smalkaia warkka ra kau daukaia sip tnatka nani bara ba, pliki aikuki laki kaikaia.
• Pamali tilara kumi bani ba ridi takaia sip sa nahki upla nani ra diara kum wan makabi walisa taim ansika yabaia bara ningkara aikuki praptis munaia.
Tnatka wala nani:
• Pamali aikuki wauhkataya kau raya ba wina ulbanka lalka kum aisi kaikaia.
• Pamali bila wina kumi bani ba wauhkataya kau raya ba wina dia kau laik kaikan ba aisi kaikbia. Bara ningkara aisanka kunhku kum daukbia.
• Pyua kum kum ra marit kum ra apia kaka smalki tataukra wala kum ra baha tihmika ra paiwaia bara makabi walanka nani daukaia sip sa.
• Lilka kum kum wan mihta ra bri ba kaikaia sip sa.
• “Los jóvenes preguntan” apia kaka, “Actividades para la familia” ¡Despertad! wauhkataya ra taki ba laki kaikaia.
• “De padres a hijos” apia kaka “El rincón del joven” La Atalaya wauhkataya ra taki ba laki kaikaia.
• Anuario bukka yus muni ba, apia kaka buk kum raya las Aidrubanka Kau Tara ba ra marikan ba laki kaikaia.
• Yu Kumi Aidrubanka, apia kaka Yu Wal Aidrubanka bara Aidrubanka Kau Tara kum wina dia lan takan ba laki kaikaia.
• Paskanka ba kaikaia, ningkara wan papaskra wina dia lan taki ba dahra aisaia.
• Aikuki asla wark kum daukaia, sampla baku map kum apia kaka lilka kum paskaia.