Wan kupia dara walra ba kan kahbaia sa

1. ¿Mani 2013 ra Yu Kumi Aidrubanka ba ani aisanka lalka kabia, bara nahki hilp wan munbia?

¹ Piua bani ra traika kaikanka ailal bâra sa. Naha ba wan kupia dara walra ba trabil ra dingkaia sip sa. Yu Kumi Aidrubanka 2013 ra kabia ba Wis kati 1, 2012 manka wina tâ krikbia. Naha Aidrubanka tara lalka ba naku kabia: “Wan kupia dara walra ba kan kahbaia sa” (1 Ti. 1:19). Naha aidrubanka ba hilp wan munbia silp laki kaikaia nahki naha prisantka tara Jehova wankan ba yus munisa.

2. ¿Aidrubanka ra ani makabi walanka nani ansika yabia?

² Naha makabi walanka nani ansika yabia. Wan kupia dara walra dukiara makabi walanka 7 ansika yabia:

• ¿Dîa dukia nani ba wan kupia dara walra ba sauhkaia sip sa?

• ¿Dîa ba hilp wan munbia wan kupia dara walra ba tânkira lâka wal yus munaia?

• ¿Nahki natka ra yawan pâtkas kaia sip sa upla nani rayaka lus tiwbia wina?

• Wan daukanka nani bara wan lukanka nani Baibil wi ba kat laki kaikisa taim, ¿dîa marikisa?

• ¿Nahki upla wala kupia dara walra ba rispik munaia sip sa?

• ¿Wahma tiara ba nahki traika kaikanka nani mapara buaia sip sa?

• Upla kum ai kupia dara walra Baibil dîa wi ba kat pain lan dauki brisa kaka, ¿dîa blisinka bribia?

3. ¿Yu Kumi Aidrubanka ba wina nahki yamnika ailal sakaia sip sa?

³ Sitan ba dîa sip ba kat trai munisa wan kupia dara walra ba sauhkaia. Sakuna Jehova hilp wan munisa traika kaikanka nani sut pura luaia. Ai Bîla bara ai asla takanka bâk, wan Aisa latwankira ba wan wisa: “Naha sika yabal, man nani bahak impaks” (Ais. 30:21). Natka kum Jehova yawan ra hilp wan muni ba sika, naha Yu Kumi Aidrubanka ba. Baha mita, trai muns naha aidrubanka ra kaia bara dîa aisabia ba pain wals. Bara, dîa lan takma ba nahki rayakam ra daukaia sip sma ba dukiara luks. Pamalikam wal dîa lan takram ba aisas. Baibil dîa wi ba kat iwisa taim, wan kupia dara walra ba pain bribia, bara sim piua ra naha tasba brinka nani wina sait ra kaia (1 Pi. 3:16).