Uya taim âpu kama sin, Baibil stadika kum briaia sip sma
1. ¿Dîa muni upla kum kum Baibil stadika kum tâ briaia sip apia lukisa?
1 Muihni lakri kum kum uba wark bri ba mita Baibil stadika nani tâ briaia sip apia lukisa. Baibil stadika kum tâ briaia dukiara wan taimka sakaia nit sa. Kan stadika kum kau tâ briras kainara, ridi takaia sa bara lukaia sa nahki stadi taki uplika ra hilp munbia ai trabilka nani pura luaia. Apastil Pal win ai rayaka yabaia wilin kan Tesalonaika uplika nani Jehova tânka kasak ba lan takbia dukiara (1 Tes. 2:7, 8). Uba wark bri kabia sin, ¿nahki Baibil stadika kum tâ briaia sip sa?
2. Jehova ra latwan kaikisa kaka, ¿nahki wan taimka sâkbia?
2 Gâd ra wan taimka yabaia. Gâd ra mayunaia dukiara wan taimka sakaia nit sa. Sampla baku, aidrubanka nani ra waia, utla utla ra smalkaia, Baibil aisi kaikaia bara wan pura sunaia dukiara wan taimka sakisa. Marit nani ba ai taimka sakisa aikuki kaia dukiara. Sim baku Jehova ra latwan kaiki ba mita ai warkka daukaia dukiara wan taimka sakaia sa (Epe. 5:15-17; 1 Jn. 5:3). Jisas aisan baku, Jehova ra mayunanka lâka ba tilara disaipil nani daukaia warkka bâra sa (Mt. 28:19, 20). Nahara lukbia kaka, yawan want kabia Baibil stadika kum tâ briaia.
3. Trabil nani bri kabia sin, ¿nahki Baibil stadika nani tâ briaia sip sa?
3 Wan warkka, siknis nani apia kaka kangrigisan ra wark wala nani dauki ba mita, uya taim âpu sa kaka, ¿dîa daukaia sip sa? Smalki tataukra kum kum sam taim ai stadika nani tâ brisa telepon apia kaka Internet bâk. Wala nani siknis brisa piua ra ai stadika nani ra paiwisa ai watla ra balbia stadi takaia dukiara. Bara kum kum ba uya taim âpu sa kaka, muihni lakri wala nani ra wisa witin âpu kabia taim ai stadika nani ra wih kaikbia.
4. Baibil stadika kum tâ briaia ba wina, ¿dîa yamnika sakisa?
4 Pal uba lilia ai dara walan ai taimka bara ai karnika upla wala nani ra hilp munaia dukiara yaban ba mita (Ap.St 20:35). Tesalonaika tawanka ra ai warkka ba wina mâ pain sakan taim, Pal ba Jehova ra tingkika lâka yaban (1 Tes. 1:2). Uba wark bri kabia sin, wan taimka saki Baibil stadika kum tâ brisa kaka, uba lilia wan dara walbia.