Prapit Jona samplika wina lan taks
1. ¿Ani daukanka painkira nani ba Jona bri kan?
1 Prapit Jona dukiara walisma taim, ¿dîa sinskam ra balisa? Ban kra upla kum kum lukbia witin ba sibrinkira kum apia kaka kupia saura bri waitnika kum sa. Sakuna witin bawan lâka bara kupia karna lâka marikan. Baku sin, ai rayaka ra sakripais ailal daukan. ¿Nahki muni Jona daukanka painkira nani ba “sampla baku” kaikbia? (Je. 5:10.)
2. ¿Jona bawan lâka marikan ba nahki tnata lukbia?
2 Bawan lâka. Pas tâura, Jona ba blikan tawanka wina sait wala ra plapan. Asiria uplika nani ba daukanka saura pali bri kan, baha mita Ninibi pliska ra “tala lalaikra tawanka” mâkan (Nah. 3:1-3). Sakuna, Jehova Jona ra lawi daukan taim witin bawan lâka marikan bara Jehova mita kli sanska wala yaban ba ra witin Gâd warkka ba daukan (S.L 24:32; Jon. 3:1-3). Tâura, Jona waia apia lâka marikan, sakuna witin Jehova kupia lâka daukan (Mt. 21:28-31). Sim baku, yawan sin sturi yamni ba takaskras kira daukbia lawi wan munbia kra apia kaka smalki ba pliska ba karna kabia sin.
3. ¿Ani piua ra kupia karna bara sakripais lâka ba marikaia sip sa?
3 Kupia karna bara sakripais lâka ba. Jona ai tânka brin Tarsis tawanka ra plapan ba mita, kabu ra wark taki uplika nani rayaka trabil ra dingkan, sakuna witin wilin takan ai rayaka sakripais munaia kabu uplika nani dukiara (Jon. 1:3, 4, 12). Jona Ninibi ra Gâd warkka daukaia dukiara tawan bilara diman, ban kra plis pain kum plikan Gâd dahra ba aisaia dukiara. ¡Witin sibrinkira kum apia kan, Gâd prapitka kupia karna bri uplika kan! (Jon. 3:3, 4.) Naiwa piua ra, ¿dîa wiaia sip sa? Kupia karna lâka Gâd wanki ba hilp wan munisa smalkaia warkka ba sibrin âpukira daukaia (Ap.St 4:29, 31). Smalkaia warkka ra wan taimka bara wan karnika sut yabaia dukiara sakripais lâka ba nit sa (Ap.St 20:24).
4. ¿Dîa muni Gâd prapitka pain nani samplika ba ra luki kaikaia sa?
4 Ani taim man Jehova prapitka nani dukiara aisi kaikisma taim, silp rayakam ra luki kaikisma kaka yamnika manis brima. Silp mamkabi wals: “¿Yang kaka dîa daukaia kapri? ¿Jona daukanka pain nani ba nahki rayakira briaia sip sna?” (Hib. 6:11, 12). Gâd Warkka Dauki wauhkataya wala nani ra takbia nahki Jehova prapitka nani kasak kan ba wina lan takaia.