¿Trai kaikisma kangrigisan ra spirit lâka ra pâwaia?
1. ¿Ahkia wina kristian wahma kum ba 1 Timoti 3:1 ba alki daukaia tâ krikaia sip sa?
1 ‘Upla kum kangrigisan ra pâwaia want sa kaka, witin ba wark pain kum daukaia want sa.’ (1 Ti. 3:1.) Naha bîla nani ba wal kristian waitna nani ra kupia bukisa kangrigisan ra wark takaia dukiara. ¿Man ba upla almuk kum kaia nit sma baha daukaia dukiara? Aitani kabia man kau wahma sma ba ra spirit lâka ra pâwma. Baha natka ra lan mai daukbia bara dîa sât uplika sma sapa marikma. Baha wina, kau wira almuk takma taim hilp mamunra kum kaia sip kama (1 Ti. 3:10). Man ba wahma kum pat aihtabi takan sma kaka, ¿nahki spirit lâka ra pâwaia sip sma?
2. ¿Upla wala nani ra hilp munaia dukiara nahki sakripais daukisma ba marikaia sip sma?
2 Sakripais daukaia. Kupiam kraukaia sma man ba wark pain kum daukaia want sma, kulkanka tara briaia lika apia. Baha mita, muihni lakri nani ra hilp munaia brinka ba pakaia sma. Natka kum ba sika Jisas samplika pain ra luki kaikaia sma (Mt. 20:28; Jn. 4:6, 7; 13:4, 5). Jehova ra makas upla wala nani dukiara lukaia hilp mai munbia (1 Ko. 10:24). ¿Kangrigisan ra upla sikniskira nani bara almuk nani ra hilp munaia sip sma? ¿Wilin takisma ki Aidrubanka Watla latka ra twi pâwi ba irbaia, plur ba pahbaia, apia kaka natka wala nani ra tâ baikaia? ¿Nahki Smalkaia ba Skulka ra aisanka kum yabaia dukiara wilin takaia sip sma? Natka wala nani sin bâra sa upla wala nani ra hilp munaia dukiara bara kaikma nahki lilia takma (Ap.St 20:35).
3. ¿Dîa muni spirit lâka ra pâwaia aitani sa, bara nahki daukaia sip sa?
3 Spirit lâka ra karna bas. ¿Kau pain sa hilp mamunra kum ba spirit lâka bribia wihki sins lâka tara, apia kaka lan kaia ba wal? Spirit lâka bri waitnika kum ba diara nani ba Jehova bara Jisas kaiki ba baku kaikisa (1 Ko. 2:15, 16). Witin ba ‘spirit mâ ba’ marikisa (Gal. 5:22, 23). Gâd Kingka lâka ba ai rayaka ra tâura mangkisa bara takaskraskira smalkisa (Mt. 6:33). Spirit lâka ra pâwaia dukiara, silp stadi takaia sma. Baha tilara Baibil ba yu bani aisi kaikaia sma, La Atalaya bara ¡Despertad! wauhkataya ulbanka lalka nani sut aisi kaikaia, bara aidrubanka nani ra dîa laki kaikbia ba stadi takaia (Law. 1:1, 2; Hib. 10:24, 25). Apastil Pal Timoti spirit lâka ra pâwbia kupia buki kan taim win: “Aman kaiki bas, bara smalkankam ba sin” (1 Ti. 4:15, 16). Baha mita, Nahki Smalkaia ba Skulka ra aisanka kum brisma kaka, wark karna taks. Smalkaia warkka dukiara ridi taks bara takaskraskira smalks. Spirit lâka ra nahki pâwaia sip sma lukanka bris, sampla baku, tâura smasmalkra kaia, Betel watla ra wark takaia, apia kaka Kristian Waitna Mayas nani ba dukiara Skulka ra waia. Spirit lâka ra pâwaia ba hilp mai munbia ‘wahma nani brinka karna ba wina tnaya ra tawaia’ (2 Ti. 2:22).
4. ¿Dîa muni kasak kaia lâka ba yamni pali sa?
4 Kasak kaia lâka ba. Patitara kristianka nani piua ra plun wahwanka tara kum takan taim, waitna kum kum ra wahbi sakan kangrigisan ra hilp munaia dukiara. Naha waitnika nani ba “sins lâka aitani” bri kan, wibia kaka, daukanka painkira bara kasak kan. Baha mita, apastil nani ba wari takras kan witin nani warkka ba daukbia sapa. Baku sin, naha ba witin nani ra sanska yaban wark kau tara nani ra ai taimka mangkaia (Ap.St 6:1-4). Baha mita, kangrigisan ra wark kum daukaia mai wibia kaka, trai muns pain pali daukaia. Noa samplika nina blîks. Witin ba aman kaiki pali Gâd nahki ark ba daukaia kan ba daukan (Bla.St 6:22). Kasak kaia lâka ba Jehova pain pali kaikisa bara spirit lâka ra pâwisma ba marikisma. (1 Ko. 4:2; “Lan daukaia yamnika ba” bakska ba kaiks.)
5. ¿Dîa muni kristian waitna ba spirit lâka ra pâwaia sa?
5 Prapit aisan baku, Jehova smalkaia warkka ba aihni munisa (Ais. 60:22). Mani bani, upla 250.000 baku aihtabi takisa. Upla manis Jehova asla takanka ra dimi ba mita, spirit lâka ra pâwan kristian waitna nit sa kangrigisan nani ba main kaikbia dukiara. Naiwa yua ra wark kau ailal bâra sa Jehova asla takanka ra (1 Ko. 15:58). Kristian waitna nani, ¿spirit lâka ra pâwisma? Baku sa kaka, ¡wark painkira kum daukaia brinkam sa!
[Wahya 2 lilkika ba]
Upla manis Jehova asla takanka ra dimi ba mita, spirit lâka ra pâwan kristian waitna nit sa kangrigisan nani ba main kaikbia dukiara
[Wahya 3 lilkika ba]
Lan daukaia yamnika ba
Kristian waitna nani ba yamnika manis sakisa, kangrigisan almukka nani mita wark daukaia lan daukisa piua ra. Aidrubanka luan ningkara, impaki pura kakaira ba aisanka yabi pliska ra iwi kristian kum ra kupia buki kan. Witin kaikan wahma lupia kum lamara bui kan. Baha mita, tuktika ra makabi walan witin wal aisaia want kan sapa. Wahma lupia ba win witin ba bîla kaiki kan, aidrubanka lubia ningkara witin baha pliska klin munaia sa. Aisika yaptika ba mahka waia bîla kaiki kan, sakuna wahma lupia want apia kan baha warkka ba daukras baku swiaia. Impaki pura kakaira ba liliakira pliska wina plis wala ra wan. Witin win: “Baha kangrigisanka ra almukka nani ba ridi kan kristian wahma nani ra lan daukaia: wark nani yabi kan kangrigisan ra. Baha mita, yang baha kangrigisanka ra kapri taim, witin nani mapara aihka apia kan kristian wahma nani ra hilp mamunra baku mangkaia.”