Prapit Miqueas samplika wina lan taks
1. ¿Ban kra Miqueas ba makabi walanka nani bri kan, bara dîa muni ai smalkanka ba bahki ra takaskras kan?
1 ¿Ahkia kat naha tasba saurka lâka ba danh takbia ki? Ban kra, prapit Miqueas ba naha sim makabi walanka daukan, witin piu ailal Israel kingka nani ra bara Juda uplika ra maisa pakan Jehova witin nani ra sauhki tikbia. Sakuna Miqueas smalkanka ba bahki ra takaskras kan. Mani 740 yawan piua ninara, Miqueas kau raya kan ba ra, Jehova dîa aisan ba daukan bara Samaria uplika ra klala yaban (Miq. 1:6, 7). Baha wina, mani 607 ra Jerusalem ba sauhki tikan (Miq. 3:12). Jehova naha tasba lâka kau wapnika mangkras ba ra, ¿nahki Miqueas baku kaia sip sa?
2. ¿Nahki bara dîa muni Jehova yua ba dukiara wihka bîla kaikanka briaia sa?
2 Wihka bîla kaikanka briaia sa. Miqueas ulban: Sakuna yang lika Jehova ra baman bîla kaikamna; Gâdki swaki ai saki ba bîla kaikamni (Miq. 7:7). Naha tânka apia sa Miqueas ba diara daukras iwi bîla kaiki kan. Witin prapit warkka ba takaskraskira daukan. Sim baku, Jehova ai yua bri ba bîla kaiki ba ra, wark pain nani bara daukanka holi nani ba dauki kaia sa (2 Pi. 3:11, 12). Jehova wihka bîla kaikanka ba upla manis ra sanska yabisa ai kupia lakaia (2 Pi. 3:9). Baha mita, Baibil ra wi ba baku, prapit nani wihka bîla kaikanka brin ba yawan sin trai munbia tnata lukaia (Je. 5:10).
3. ¿Dîa muni ban Jehova ra ai spiritka holikira ba makabi kaia sa?
3 Jehova wina karnika wankbia. Miqueas warkka ba daukaia isi apia kan, bara witin Jehova hilpka plikan karnika briaia dukiara (Miq. 3:8). Jehova nu sa yawan Ai hilpka nit sa, bara Baibil ra wan kupia bukisa wan pura sunra bâk makabaia. Swapan wan dara walbia kaka, Witin sip sa karnika wankaia bara baku sip kabia spirit lâka dukia nani ba daukaia (Law. 84:5, 7; Ais. 40:28-31). ¿Kristian baku, Jehova karnika wangki ba dukiara rayakam ra pat kaikram ki? ¿Jehova spiritka holikira karnika ban makabisa ki? (Lk. 11:13.)
4. ¿Miqueas rayaka ba wina dîa samplika pain nani briaia sip sa naiwa piua ra?
4 Miqueas mapara, Jehova kupia lâka daukaia ba kau tara kan. Witin iwi kan piua ra upla daukanka nani ba saura pali kan, sakuna witin wilin kan kasak kaia. Wan kasakka lâka sauhkaia dukiara piu bani ra mina prukanka takisa. Baha mita, takaskraskira Jehova wan Gâdka nina blîkbia (Miq. 4:5).