¡Mani 100 brisa Gâd Kingka lâka dukiara smalki ba!
1. Mani 100 luan ra Gâd uplika nani ra, ¿dîa warkka daukaia kupia bukan ki?
1 “¡Kaiks, King ba pat aimakan sa! Man nani maisa pakaia uplika nani sma. Baha mita, smalki, smalki, smalki banhs naha Kingka lâka bara ya tâ bri ba dukiara sin”. Naha bîla nani wal 100 mani luan ra kristian waitna Rutherford ba Gâd uplika nani ra kupia bukan Kingka lâka ba tasba aiska ra smalkaia. ¡Yawan naha warkka ba pain daukan sa! Patitara kristianka nani baku, Kingka lâka sturka yamni ba “tasba aiska ra smalkan sa” (Kol. 1:23). Gâd Kingka lâka smalkaia dukiara, ¿mani 100 luan ra dîa daukan? Naha Kingka aimakan ba wina 100 mani alkuya ba ra, ¿yawan nahki sip kabia ban naha Kingka dukiara aisi kaia?
2. Wan ulbi sakanka nani ba, ¿nahki natka ra Gâd Kingka lâka tâwan aisan sa?
2 ¿Patitara piua ra nahki kan? Wan ulbi sakanka nani ba mani ailal wina Gâd Kingka lâka dukiara aisi aula sa. Mani 1939 wina wauhkataya kau yus muni ba sika La Atalaya. Anunciando el Reino de Jehová. Naha wauhkataya Kingka lâka dukiara bara naha ba yamnika manis daukbia ba dukiara sin aisisa. ¡Despertad! ba sin marikisa Kingka lâka baman yawan bîla kaikanka briaia sip sa. Uba lilia wan dara walisa naha wauhkataya nani ba baman tasba aiska ra bîla aisanka ailal ra takisa bara upla mihta ra swisa (Par.M 14:6).
3. Kingka lâka upla nani ra smalkaia dukiara ani natka yus munan ba aisas.
3 Gâd napakanka nani ba smalkaia natka sât sât yus munan sa Kingka lâka smalkaia dukiara. Pas ba truk nani binka tara dauki masinka nani yus muni kan, radio apiska nani ra programa nani dauki kan bara gramófono masinka nani ba sin brih tauki kan. Baha natka nani kan ba yus tara bri kan upla manis ra Kingka lâka dukiara aisaia smalki tataukra wiria baman bâra kan piua ra (Law. 19:4). Mani luan nani ra jw.org pliska ra naha Kingka dukiara tânka manis mangkan sa, baku natka ra upla milian milian ra smalkisa kau pali smalkaia warkka daukaia adar âpu pliska nani ra.
4. ¿Ani natka painkira nani ba yus muni aula sa?
4 Gâd napakanka nani ba natka pain nani wala sin daukan sa King lâka sturka ba smalkaia dukiara. Mani 1990 wina utla utla ra smalki ba wina kau daukisa. Sampla baku, parki nani ra, truk takaski pliska nani bara bisnis pliska nani ra sin smalkisa. Bisi pali tasba aiska ra tawan tara nani ra upla ailal bâra sa pliska nani ra wih smalkaia natka raya ba dauki aula sa. Kangrigisan ailal ba ai pliska ra naha smalkaia natka raya ba tâ baikisa bara trukka lupia, tibil nani yus munisa ulbi sakanka nani marikaia dukiara bara ani ani ra upla ailal bâra sa kaka daukisa. Ban sakuna, utla utla ra smalkaia natka ban yus munisa King lâka smalkaia dukiara (Ap.St 20:20).
5. ¿Yawan dîa sanska bribia smalkaia manka raya tâ krikbia ba ra?
5 ¿Kaina piua ba nahki kabia? Mani raya ba Wîs kati wina tâ krikbia ba, upla manis tâura smasmalkra warkka ba tâ krikbia. ¿Man sin baha uplika nani tila ra kama? Baku apia sa kaka, ¿pat luki kaikram sa tâ baiki smasmalkra baku takaia kati kum kum ra? Naha smalkaia natka kumi sin sip daukras kama sin, Kingka lâka tâwan dîa sip sma ba kat smalkaia tâ baikma kaka, Jehova blisin mai munbia (Mal. 3:10).
6. ¿Dîa muni Waupasa kati 2014 ra kati kum tara kabia?
6 Waupasa kati 2014 ra Gâd Kingka lâka aimakan ba wina mani 100 alkisa, baha mita La Atalaya wauhkataya upla sut dukiara sâkbia ba Gâd Kingka lâka dukiara aisi kabia. Kasak trai munbia La Atalaya wauhkataya ba upla sut ra yabaia. Naha piua dukiara luki, kaisa “Gâd King aimaki ba sturka yamni ba smalkaia” ya ya walan dauki nani ra (Ap.St 8:12).