Smalkaia dukiara hilpka nani
1. Upla kum ai mihta ni diara papaskra ba, ¿nahki ai talika sa kristian nani wal?
1 Kiamda kum ba wark takaia tulska ailal brisa. Tulska kum kum ba diara pranakira kum daukisa taim yus munisa, bara wala nani ba piu bani ra yus munisa. Bara kau lankira nani ba aima bani baks kum bilara ani tulska kau yus muni ba brih wisa, baha nani ba witin kau pain yus munaia lan ba mita brih taukisa. Baibil ba wan kupia bukisa smalkaia warkka kau pain daukaia. Baha mita, bîla kaikisa Jehova Witniska kumi bani ba “wark tatakra kum ai warkka ba tâwan ai swira lukras baku” kabia (2 Ti. 2:15). ¿Ani ba wark takaia hilpka kau tara yawan brisa? Baibil ba, naha wal sika disaipil daukisa (Mt. 28:19, 20). Baha mita, ani sip ba kat trai munbia “Gâd kasakkira tânka bîla ba wapni kat smalki uplika baku” kaia. Kristian bani lan takaia sa hilpka wala nani bri ba sin pain yus munaia tânka kasak ba smalkaia dukiara (S.L 22:29).
2. ¿Lan daukaia hilpka nani bri ba ani sa?
2 Lan daukaia hilpka nani ba. ¿Baibil ba wina ani hilpka wala sin brisa? Rait pali Baibil ba Dia Smalkisa ki? bukka ba kau yus munisa Baibil stadika yabaia dukiara. Naha bukka danh takisa taim, “Gâd Latwanka laka ra ban Bas” bukka wal tâ krikisa Baibil smalkanka nani ba ai rayaka ra alki daukbia dukiara. Baha mita, naha bukka wâl ba pain kakaira takaia sa bara pain yus munaia lan kaia. Baha mita ulbi sakanka nani brih tauki ba tilara wauhkataya tara nani sin brih tauki kaia sa. Sampla baku, ¡Gâd sturka yamni nani ba! wal Baibil stadika nani tâ krikaia sip sa. Smalki ba pliska ra upla kum kum aisi kaikaia karna munisa apia kaka ai bîla aisanka ra ulbi sakanka kum kum baman brisa, apia kaka kumi sin âpu sa kaka, Gâd bîla wals bara ban kaia ra iwma apia kaka Gâd bîla wals wauhkataya nani yus munaia sip sa. Ulbi sakanka wala yus munaia sip ba, ¿Ya nani Jehova kupia lâka daukisa naiwa piua ra? wauhkataya, naha ulbi sakanka na stadi tatakra nani ra hilp munisa wan asla takanka ba kau kakaira takaia. Lilka kum kum ba sin yus tara brisa disaipil daukaia dukiara, baha mita aitani sa pain yus munbia. Sampla baku, ¿Dîa muni Baibil stadi takaia sa?, ¿Wan aidrubanka nani ba nahki sa? bara ¿Baibil stadika nani ba nahki dauki banhwisna?
3. Gâd Warkka Dauki wauhkataya balbia nani ra, ¿dîa lan taki kabia?
3 Gâd Warkka Dauki wauhkataya balbia nani ra lan takbia nahki wan ulbi sakanka nani lan daukaia dukiara ba pain yus munaia. Pain yus munaia trai munbia kaka, naha Baibil kupia kraukanka dauki kabia: “Man pali wînam ba kat aman kaiki bas, bara smalkankam ba sin, naha nani na ban dauki bas. Man naha na daukma kaka, wînam ba swaki sâkma, bara upla nani man ra wali banhwi ba sin baku takbia” (1 Ti. 4:16).