¿Jisas Pruan Kupia Kraukanka dukiara nahki ridi takbia ki?

Naha manka wina yawan kau taim aitani bribia Jisas Pruan Kupia Kraukanka ra luki, ridi takaia dukiara. Jisas Pruan Kupia Kraukanka yua ba wik bilara kauhisa kaka, Rayaka bara Smalkaia aidrubanka ba daukbia apia, bara wik tnata ra kauhisa kaka, upla sut dukiara aisanka bara La Atalaya Stadika ba daukbia apia. Aidrubanka âpu yua nani ra, ¿wan taimka nahki yus munaia sip sa? Nawas piua ra, pas handat manka nani piua ra dauki kan baku, naha yua pranakira kulkaia dukiara diara nani ba ridi daukaia sa (Lk 22:7-13; km 3/15 1). Sakuna yawan kumi bani wan kupia ba ridi daukaia sa. ¿Nahki daukaia sip sa ki?

• Luki kaikaia sa dîa muni diara tara sa baha yua ra aisanka tara ba walaia (1Ko 11:23-26).

• Jehova ra wan pura suni bara witin wal nahki asla lâka yawan bri ba laki kaikaia (1Ko 11:27-29; 2Ko 13:5).

• Baibil smalkanka nani Jisas Pruan Kupia Kraukanka dukiara aisi ba stadi muni bara tihu luki kaikaia (Jn 3:16; 15:13).

Smalki tataukra kum kum ba Jisas Pruan Kupia Kraukanka dukiara Baibil aisi kaikanka Examinando las Escrituras diariamente wauhkataya ra taki ba aisi kaikisa bara baha dukiara tihu luki kaikisa. Muihni, lakri wala nani sin naha bakska ra tikska nani taki ba aisi kaikisa. Baku sin muihni bara lakri wala La Atalaya tânka nani Jisas Pruan Kupia Kraukanka dukiara aisi ba stadi munisa, Jehova bara Jisas nahki latwan lâka wan marikan ba tânka sin. Dîa dîa tânka pliki kaikaia want kama ba hilp mai munbia Jehova bara ai Luhpia wal kau asla kama dukiara.