Wahma bara tiara nani sma ba ‘diara yamni dauki uplika kaia’ trai muns

Pal ba Taitus ra wauhkataya ba ulban taim, witin win wahma nani ba trai munaia sa wark yamni nani daukaia upla sut mawanra, Taitus kat sin baha daukaia kan (Tai 2:6, 7). Ningkara, sim saptika ra, Pal ba win Jehova uplika nani ba klin takan sa “wark yamni nani sin kasak pali dauki kabia dukiara” (Tai 2:14). Baha sât warkka yamni kum ba sika Gâd Kingka Lâka dukiara smalki taukaia bara lan daukaia. Wahma bara tiara sma kaka, ¿karnikam ba yus munaia sip sma tâ baiki smasmalkra kaia, apia kaka tâura smasmalkra kaia dukiara? (S.L 20:29).

Man tâura smasmalkra kaia want sma kaka, rayakam warkka nani ba kau isi dauks bara luks nahki pain ridi takma (Lk 14:28-30). Naha dukiara lukaia sip sma: man tâura smasmalkra, apia kaka tâ baiki smasmalkra kama taim, ¿diara nani nit sma ba nahki atkaisma apia kaka nahki aibapaisma ki? ¿Smalkaia warkka ra awarka nani aiska ba nahki daukma? Jehova ra hilp makas (Law 37:5). Man dîa daukma ba dukiara aisikam nani ba wal aisas bara tâura smasmalkra lankira nani ba wal sin. Ningkara man tâmra was, bara dîa sakripaiska karna daukma ba Jehova blisin munbia.

WAHMA BARA TIARA NANI BA JEHOVA RA KULKANKA LÂKA YABISA LILKIKA BA KAIKBIA NINGKARA, NAHA MAKABI WALANKA NANI LAKI KAIKS:

• ¿Muihni, lakri kum kum ba tâura smasmalkra kaia dukiara dîa trabilka nani pura luan, bara nahki daukan?

• ¿Aisa bara yapti nani ba ai luhpia nani ra nahki hilp munaia sip sa tâura smasmalkra kaia dukiara?

• ¿Dîa muni nit pali sa smalkaia awarka nani nahki daukbia ba ulbi briaia?

• ¿Kangrigisan muihka bara lakri nani ba dîa daukaia sip sa tâ baiki smasmalkra nani ra bara tâura smasmalkra nani ra kupia bukaia dukiara?

• ¿Tâ baiki smasmalkra nani bara tâura smasmalkra nani ba dîa sât blisinka nani sakisa?