“Nahki upla wala ra smalkaia” pîska ba nahki yus munaia

“Nahki upla wala ra smalkaia” pîska ra mariki lukanka nani ba pain laki kaiki ridi munan sa, bara smalki tataukra manis bila ai tawanka nani ra pain yus takisa. Sakuna, plis bani dîa taki ba sât wala sa. Baha mita, smalki taki wisa taim, smalki tataukra nani ba tawanka uplika nani dîa nu takan dauki ba ra luki, chens munaia sip sa aisaia nahki tâ krikbia ba, apia kaka dîa dukiara aisabia ba sin. Ban sakuna, smalkaia warkka tara kum daukisa taim lika, dîa wan mariki ba kat nina bliki daukaia sa. Wan âuya tikaia apia sa, Jisas wan blikan baku wan warkka ba sika Kingka lâka sturka yamni nani upla ra smalkaia (Mt 24:14).

Smalki tataukra kum wik bilara aidrubanka ra aisanka brisa taim, Ridi takaia wauhkataya ra “Nahki upla wala ra smalkaia” pîska lukanka tara ba yus munaia sa (wibia kaka, julio bara agosto kati sa kaka, lukanka tara ba upla dukiara Gâd kupia lâka ba). Kuna, dîa daukaia sa sitnika kat wiras kaka, smalkisa pliska ra luki chens munaia sip sa makabi walanka, Baibil tikska, kli aisaia dukiara makabi walanka, apia kaka dîa sât uplika ra smalkbia ba. Ridi takaia wauhkataya 2020 junio kati wahia 8 ra dîa ulban kan ba, nanara naha ulbanka ba wal chens munan sa.